Henplais 12:7-11
Nqe cim:
“Peb muaj niam muaj txiv qhuab ntuas peb, peb thiaj hwm nkawd. Yog li ntawd hajyam tsimnyog peb mloog peb Txiv tus uas nyob saum ntuj ceebtsheej lus, peb thiaj tau txojsia ntev dhawv mus ibtxhis?” (Henplais 12:9).
Lus nug rau sawvdaws xav:
– Qhov uas tus Tswv qhuab ntuas Nws cov menyuam tau muab piv rau yam dabtsi?
– Qhov kev sib piv ntawd hais tawm yam dabtsi?
– Vim licas yuav tsum mloog tus Tswv kev qhuab ntuas?
– Peb ua qhia tshwm kev mloog tus Tswv qhuab ntuas zoo licas?
Tus sau phau Henplais muab tus Tswv kev qhuab ntuas Nws cov menyuam piv rau leejtxiv kev qhuab ntuas menyuam, thiab nws kuj hais ntxiv hais tias yog peb tsis tau tus Tswv qhuab ntuas ces peb tsis yog tus Tswv cov menyuam tiag (nqe 8). Qhov kev sib piv ntawd qhia meej hais tias qhov uas tau tus Tswv qhuab ntuas yog ib yam timkhawv qhia hais tias peb yog tus Tswv tug, tau Nws hlub thiab saib zoo li menyuam. Tseeb tiag tus Tswv yeej tsis zoo siab thaum qhuab ntuas Nws cov menyuam, vim “Thaum lawv raug kev txomnyem nyuaj siab Nws kuj nrog lawv raug thiab” (Yaxayas 63:9a HMOWSV). Tus Tswv qhuab ntuas peb vim Nws hlub peb kawg nkaus li, yog li ntawd peb yuav tsum paub ua tsaug thiab mloog tus Tswv lus.
Tsis tas li ntawd xwb, peb yuav tsum mloog tus Tswv kev qhuab ntuas vim qhov ntawd muaj nqis rau peb, pab peb loj hlob hauv kev dawbhuv, kaj siab thiab ua neeg tsimtxiaj (nqe 10-11). Tsis muaj leejtwg yuav muaj kev zoo siab thaum raug qhuab ntuas. Yuav muaj kev mob, nyuaj siab, txhawj, ntshai… raws li nyias yam kev qhuab ntuas. Tiamsis thaum totaub qhov muaj nqis ntawm kev qhuab ntuas, zoo li tus muaj mob paub txog qhov muaj nqis ntawm cov tshuaj uas yuav kho tau nws tus mob, ces txawm tej tshuaj yuav iab yuav daw npaum twg los nws yeej txaus siab hlo tiv. Thaum totaub lub homphiaj tus Tswv qhuab ntuas ces txawm yog thaum tabtom tiv kev txomnyem, los peb yeej muaj kev kaj siab vim paub tias tus Tswv tabtom xyaum kho kom peb ua tau zoo li Nws tus Tub.
Tej zaug tus Tswv yuav siv ntau yam sib txawv los qhuab ntuas peb, tej zaug yuav yog tej kev khwv hauv kev ua haujlwm, teebmeem hauv lub cuabyig, kev mob nkeeg, lossis kev nyuaj siab hauv tes haujlwm. Thaum ntsib tej tsamthawj zoo li ntawd peb yuav mloog tus Tswv lus licas? Puas yog thaum raug mob ces cia nyob twjywm tsis mus nrhiav tshuaj? Lossis tsis nrhiav kev daws thaum cuabyig ntsib teebmeem? Lossis “tabtom nyob twg ces nyob twjywm, txhob ua dabtsi?” Qhov xubthawj nyob hauv kev mloog lus yog nplooj siab, tshuav tes haujlwm tsuas yog yam qhia tshwm sab nraud. Tsis muaj dabtsi txhaum thaum taij thov tus Tswv pab yus tiv dhau tej kev txomnyem. Tiamsis qhov tseemceeb tshajplaws yog thaum ntsib tej uas tus Tswv cia tuaj raug lubneej, peb cia li nyob twjywm thiab tig saib yus lub siab. Lub siab uas mloog lus yuav niaj hnub nrhiav ua raws tus Tswv siab nyiam txhua lub tsamthawj, thiab taij thov tus Tswv ua raws li Nws pom zoo ib yam li Tswv Yexus taij thov Leej Txiv hais tias: “Txiv, Kuv Txiv, koj ua tau ib puas tsav yam huv tibsi, thov koj muab lub khob no tshem ntawm kuv mus. Txawm li cas los thov koj tsis txhob ua raws li kuv lub siab nyiam, tiamsis ua raws li koj lub siab nyiam xwb” (Malakaus 14:36).
Thov Vajtswv,
Tus Tswv, thov Koj pab nyuam yaus totaub hais tias Koj xav kom nyuam yaus tau txais yam zoo kawg nkaus thaum Koj qhuab ntuas nyuam yaus. Thov pub rau nyuam yaus muaj nplooj siab txo hwjchim thiab zeem paub Koj lub siabnyiam, thiab thov pub nyuam yaus muaj dag zog tiv dhau tej kev qhuab ntuas thiab loj hlob hauv Koj txhua hnub. Nyuam yaus tuav Yexus Khetos lub npe thov, Amees.
Peb txais tau tej yam dabtsi thaum tiv dhau tus Tswv tej kev qhuab ntuas?
Nyeem Vajluskub hauv peb lub xyoo: Levis Kevcai 10
Kênh Youtube BHKTHN:
