Klei Aê Diê Blŭ: Hêbrơ 12:7-11
Êlan kliăng: “Êbeh hĭn kơ anăn, drei mâo leh ama ti lăn ala čiăng mkra mjuăt drei, leh anăn drei mpŭ kơ diñu. Amâo djŏ hĕ kdlưn hĭn drei srăng gưt Ama kơ mngăt leh anăn dôk hdĭp?” (Hêbrơ 12:9)
Klei êmuh ksiêm mĭn: Hŏng rup bi msĕ klei Khua Yang mkra mjuăt phung anak Ñu? Klei bi msĕ anăn čiăng lač kơ ya klei? Ya ngă brei drei gưt kơ klei Khua Yang mkra mjuăt? Si ngă drei srăng bi êdah kơ klei gưt kơ Khua Yang?
Pô čih hră Hêbrơ bi msĕ klei Khua Yang mkra mjuăt phung anak Ñu hŏng klei sa čô ama mkra mjuăt anak, mbĭt hŏng klei anăn ñu mblang mơh tơdah drei amâo tuôm ôh hŏng klei Khua Yang mkra mjuăt snăn drei jing anak ƀă pum, amâo djŏ anak Khua Yang pô ôh (êlan 8). Klei bi msĕ anăn čiăng kñăm brei drei thâo klei Khua Yang mkra jing klei hưn bi sĭt kơ drei jing anak Khua Yang, Ñu khăp kơ drei leh anăn dlăng kơ drei msĕ si sa čô anak. Boh sĭt gơ̆ Khua Yang amâo mơak ôh tơdah mkra mjuăt phung anak Ñu, kyuadah “hlăm jih jang klei knap mñai digơ̆, Ñu mâo klei knap mơh” (Y-Êsai 63:9a). Khua Yang mkra mjuăt kyuadah Ñu khăp êdimi kơ drei, kyuanăn brei drei thâo hdơr knga leh anăn gưt kơ Ñu.
Êngao tinăn, brei drei gưt mơh kyuadah Khua Yang mkra mjuăt čiăng bi jăk kơ drei, čiăng drei đĭ hriê kơ prŏng hlăm klei doh jăk, mâo klei êđăp ênang leh anăn klei kpă ênô (êlan 10-11). Amâo mâo pô srăng mơak ôh tơdah tŭ klei mkra mjuăt. Srăng mâo klei ruă, klei ênguôt, klei rŭng răng, klei huĭ…tui si hnơ̆ng klei mkra mjuăt. Ƀiădah tơdah thâo săng klă kơ klei tŭ dưn mơ̆ng klei mkra mjuăt, msĕ si sa čô mnuih ruă thâo săng kơ boh yuôm êa drao dưi mdrao klei ruă, sĭt nik wăt tơdah phĭ amâodah ruă dưn, ăt srăng tŭ mơh. Thâo săng klă kơ klei kñăm čiăng kơ klei Khua Yang mkra mjuăt snăn wăt tơdah dôk hlăm klei knap mñai dưn, ăt drei dôk êđăp ênang mơh kyuadah drei thâo Aê Diê dôk bi hriăm drei čiăng drei jing msĕ si Anak Ñu.
Khua Yang srăng mkra mjuăt drei hŏng lu êlan mdê mdê, klei mkra mjuăt anăn tăp năng jing klei dleh dlan hlăm bruă knuă, klei dleh dlan hlăm gŏ sang, klei amâo suaih pral amâodah klei dleh dlan hlăm bruă klam. Snăn, si ngă srăng gưt kơ Khua Yang hlăm klei truh msĕ snăn? Tơdah mâo klei ruă, djŏ mơ̆ drei dôk ñăt amâo duah êlan mdrao mgŭn ôh? Amâodah amâo duah êlan msir mkra ôh tơdah gŏ sang mâo klei dleh dlan? Amâodah “ti anôk dôk, dôk phĭt tinăn yơh, đăm ngă sa mta klei ôh?” Gưt tal êlâo hĭn jing bruă kơ ai tiê, bi klei si srăng ngă jing knŏng klei bi êdah đuč. Amâo soh ôh tơdah akâo kơ Khua Yang đru drei găn jih klei dleh dlan. Ƀiădah klei yuôm hĭn jing tơdah bi tlă anăp hŏng klei dleh dlan Khua Yang brei truh kơ klei hdĭp drei, brei drei mdei hĕ leh anăn ksiêm dlăng kơ ai tiê drei pô. Ai tiê thâo gưt srăng tui duah nanao klei Khua Yang čiăng hlăm grăp mta klei truh, leh anăn wah lač akâo kơ klei čiăng jăk Khua Yang srăng bi êdah msĕ si Khua Yang Yêsu pô wah lač leh hŏng Aê Diê Ama snei, “Ơ Ama ơi, jih jang mnơ̆ng Ih dưi ngă sơăi. Mă mđuĕ hĕ atŏ anei mơ̆ng Kâo. Amâo djŏ tui si klei Kâo čiăng ôh, ƀiădah tui si klei Ih pô čiăng” (Y-Markôs 14:36).
Ya klei drei dưi mă tŭ grăp blư̆ tŭ klei Khua Yang mkra mjuăt?
Wah lač: Ơ Khua Yang, đru kâo thâo săng Ih čiăng mâo klei jăk hĭn kơ kâo tơdah Ih mkra mjuăt kâo. Brei bĕ kơ kâo ai tiê thâo luă gŭ leh anăn djăl mâo klei thâo săng čiăng dưi thâo kral klei Ih čiăng, leh anăn msĕ mơh, thiăm bĕ klei ktang kơ kâo čiăng kâo dưi găn klei mkra mjuăt leh anăn đĭ hriê kơ prŏng hĭn grăp hruê. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Bruă Lêwi 10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
