Klei Aê Diê Blŭ: Klei Kbiă 32:9-14
Êlan kliăng: “Leh anăn Yêhôwa bi mlih klei Ñu mĭn čiăng ngă jhat kơ phung ƀuôn sang Ñu” (Klei Kbiă 32:14)
Klei êmuh ksiêm mĭn: Ya boh tŭ dưn mâo mơ̆ng klei Y-Môis wah lač brei? Si drei thâo kral klei yuôm kơ klei wah lač brei? Si klei anei bi mđĭ ai drei hlăm bruă wah lač brei?
Klei Y-Môis kwưh akâo ba hriê leh boh tŭ dưn prŏng prĭn, “Leh anăn Yêhôwa bi mlih klei Ñu mĭn čiăng ngă jhat kơ phung ƀuôn sang Ñu”. Boh blŭ “lui” dưi mblang jing “bi mlih klei mĭn”. Aê Diê jing jăk kluôm dhuôm amâo tuôm mlih amâodah “bi mlih klei mĭn” (Klei Yap 23:19). Kyuanăn, pruê̆ êlan Klei Aê Diê Blŭ anei, drei dưi thâo săng snei, kyua klei khăp snăn Khua Yang amâo lŏ bi kmhal ôh phung ƀuôn sang Ñu msĕ si klei Ñu lač leh.
Ti djiêô anăn, bruă Khua Yang “bi mlih klei mĭn” leh klei Y-Môis kwưh akâo, brei ƀuh Ñu ruah leh klei wah lač amâodah klei wah lač brei mơ̆ng phung mnuih huĭ mpŭ kơ Aê Diê čiăng bi êdah klei ktang myang leh anăn klei khăp klei pap Ñu. Klei anei bi êdah klă mngač hlăk Khua Yang hưn klei Ñu srăng phat kđi: “Snăn ară anei, lui Kâo” (êlan 10). Tơdah Khua Yang amâo čiăng ôh Y-Môis ghă mgang, snăn ya ngă Ñu hưn hŏng Y-Môis msĕ snăn? Klei sĭt, Aê Diê dôk čiăng atăt ba Y-Môis mŭt hlăm klei wah lač brei kơ phung ƀuôn sang Ñu yơh, kyuadah knŏng hjăn klei wah lač brei yơh dưi bi mtlaih phung ƀuôn sang Ñu. Hŏng klei anăn, Khua Yang mtô lač kơ phung ƀuôn sang Ñu wăt kơ phung drei hruê anei, klei yuôm kơ klei wah lač brei msĕ mơh. Blŭ mdê, Aê Diê dưm leh klei Y-Môis wah lač brei ti krah phung ƀuôn sang leh anăn Aê Diê, amâodah dưm Y-Môis ti anôk jing pô wah lač brei ti krah Aê Diê leh anăn phung ƀuôn sang.
Y-Môis dưi wah lač brei kơ phung ƀuôn sang Aê Diê čiăng tui duah klei Aê Diê pap brei klei soh kơ diñu kyuadah ñu pô pap brei leh kơ klei soh diñu. Ñu khăp kơ phung ƀuôn sang Aê Diê hŏng jih ai tiê, ñu dưm klei tŭ dưn diñu ti dlông klei tŭ dưn kơ ñu pô, leh anăn kdlưn hĭn kơ jih jang, kyuadah ñu yap klei guh kơang kơ Aê Diê jing mrô sa. Lu thŭn êdei kơnăn, Khua Yang Yêsu Krist – Pô wah lač brei prŏng prĭn – ăt wah lač akâo Aê Diê pap brei kơ phung pơ̆ng msei kđĭn Ñu ti kyâo bi kal (Y-Luk 23:34). Msĕ si sa čô dĭng buăl hlăm Y-Mathiơ 18:23-35, drei đuôm nư Khua Yang nư klei khăp drei amâo dưi tloh tla wĭt ôh, mbĭt anăn phung mkăn đuôm nư drei mơh, nư đơ điêt. Tơdah hdơr knga kơ Khua Yang tla brei leh nư klei soh drei, snăn brei drei pap brei msĕ mơh kơ ayŏng amai adei ngă soh hŏng drei, khăp kơ diñu, klam brei klei ktrŏ leh anăn wah lač brei kơ diñu (Galati 6:1-2).
Hruê anei, Khua Yang Yêsu ăt dôk wah lač brei kơ drei nanao (Hêbrơ 7:25; I Y-Yôhan 2:1-2), leh anăn iêô mthưr drei mŭt hlăm bruă wah lač brei kơ mnuih mkăn msĕ mơh (Êphêsô 6:18; I Y-Timôthê 2:1-2). Brei hdơr snei, lu mnuih tuôm wah lač brei leh kơ drei kơ klei hdĭp myang leh anăn klei hdĭp kđeh drei, wăt kơ klei drei ngă soh, snăn brei drei tui hriăm rup bi hmô mơ̆ng Khua Yang Yêsu leh anăn Y-Môis, wah lač brei kơ phung riêng gah drei, čiăng kơ diñu ăt dưi mă tŭ klei pap brei leh anăn dưi bi grăng hŏng Aê Diê.
Drei dôk wah lač brei kơ hlei pô, kơ ya mta klei?
Wah lač: Ơ Khua Yang, bi mni lač jăk Khua Yang kơ klei pap Ih brei kơ kâo, lač jăk kơ Khua Yang kyua Ih hmư̆ leh klei wah lač brei kơ kâo mơ̆ng lu mnuih mkăn. Brei kâo tui čuê bruă wah lač brei kơ lu mnuih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsai 3-4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
