Klei Aê Diê Blŭ: Klei Mtô Mñă Klei Bhiăn 24:17-22
Êlan kliăng: “Ƀiădah brei diih hdơr klei diih jing leh hlŭn hlăm čar Êjip leh anăn Yêhôwa Aê Diê diih bi tui leh diih mơ̆ng anôk anăn; kyuanăn kâo mtă kơ ih ngă klei anei” (Klei Mtô Mñă Klei Bhiăn 24:18)
Klei êmuh ksiêm mĭn: Kơ hlei pô hlăm čar Aê Diê mtă brei phung ƀuôn sang Ñu uêñ mĭn leh anăn si srăng dôk dơ̆ng hŏng digơ̆? Ya ngă brei phung ƀuôn sang Aê Diê ngă msĕ snăn? Ya klei yuôm bhăn mâo mơ̆ng klei anăn kơ klei hdĭp drei hruê anei?
Trăn Klei Aê Diê Blŭ anei mñă wĭt mñă nao lu blư̆ kơ tlâo phung, anăn jing pô dôk jưh bhiâo, anak êrĭt leh anăn mniê djiê ung. Anôk msĕ digơ̆ jing – jing phung arăng lui ti êngao hlăm klei hdĭp phung ƀuôn sang, amâo mâo pô mpŭ, amâo mâo pô uêñ, ênưih êka kƀeh leh anăn tŭ klei arăng ktư̆ juă. Digơ̆ amâo mâo dŏ ngăn, lăn ala, kăn mâo gŏ sang kăp đru răng mgang brei rei. Digơ̆ amâo dưi răng mgang digơ̆ pô ôh, kăn mâo mnơ̆ng lŏ wĭt lač jăk rei tơdah mâo klei đru. Klei bhiăn Aê Diê mtă kơ phung ƀuôn sang Ñu amâo dưi bi mjhua leh anăn ngă klei wê kơ digơ̆ ôh ƀiădah brei ngă klei kpă leh anăn klei kmah. Boh klă msĕ si tơdah puôt wiă mdiê brei lui đa đa čăp mdiê, lui pioh sa kdrêč boh ôliu, boh kriăk ƀâo hlăm đang pioh kơ digơ̆ duñ. Jih jang mnơ̆ng lui pioh anei amâo djŏ mnơ̆ng êbeh ôh ƀiădah jing sa kdrêč boh mnga mơ̆ng mnơ̆ng buh pla năng hrui mă leh, pioh đru phung kƀah ciăng kơ digơ̆ mâo mnơ̆ng ƀơ̆ng huă.
Jih jang klei mtă anei jing klei mphŭn kčưm kơ phung ƀuôn sang Aê Diê ngă klei dôk dơ̆ng ƀơ̆ng huă hŏng klei kpă ênô leh anăn kmah. Brei digơ̆ thâo săng kơ lăn leh anăn dŏ ngăn jing dŏ Aê Diê sơăi. Anôk digơ̆ dôk hdĭp, dŏ ngăn digơ̆ mâo amâo djŏ dŏ digơ̆ pô ôh, ƀiădah jing dŏ Pô atăt leh digơ̆ kơ anôk anei. Brei digơ̆ hdơr kơ klei Aê Diê bi mtlaih leh găp djuê digơ̆. Hdơr hlei digơ̆ jing, si ngă Aê Diê bi mtlaih leh digơ̆ čiăng kơ digơ̆ hdĭp djŏ hŏng knuih mơ̆ng sa phung găp djuê Aê Diê ruah leh anăn bi mtlaih leh. Knuih anăn bi êdah klei Aê Diê jing, Pô uêñ kơ jih jang mnuih, Pô kpă ênô leh anăn bŏ hŏng klei pap – Pô jing Aê Diê digơ̆. Aê Diê bi êngiê leh digơ̆ leh anăn Aê Diê čiăng digơ̆ msĕ mơh ngă klei jăk kơ phung ƀun ƀin, phung arăng ktư̆ juă, phung anak êrĭt leh anăn mniê djiê ung hŏng klei kpă leh anăn klei khăp. Jih jang knuih jăk anăn brei phung ƀuôn sang Aê Diê bi êdah hlăm klei digơ̆ duah ƀơ̆ng huă, hlăm bruă digơ̆ ngă grăp hruê.
Phung đăo kơ Krist hruê anei amâo dưi ngă ngơi ôh kơ “phung riêng gah” Aê Diê mdưm leh jŭm dar drei. Klei pap drei mă tŭ leh đru drei mâo klei kmah msĕ si Aê Diê brei leh klei pap kơ drei bŏ hŏng klei kmah. Grăp cô phung đăo, grăp boh gŏ sang, Phung Sang Aê Diê mâo klei lông dlăng hlăm klei yua hruê mông, dŏ ngăn, klei thâo leh anăn klei bi mguôp hŏng mnuih ƀun ƀin hlăm ƀuôn sang pô.
Ti phung Aê Diê čiăng drei bi êdah klei kpă leh anăn klei kmah hŏng digơ̆? Ya klei drei čuăn ngă?
Wah lač: Ơ Khua Yang, lač jăk kơ Ih kyuadah Ih săn leh asei mlei tuh êrah čiăng bi mtlaih kâo. Đru kâo hdơr hlei kâo jing leh anăn čiăng kâo hdĭp kpă ênô leh anăn mâo ai tiê kmah msĕ si Ih ngă jăk leh kơ kâo hŏng klei pap amâo mâo knhal. Kâo wah lač hlăm anăn Yêsu Krist. Amen.
Dlăng Klei Aê Diê Blŭ hlăm tlâo thŭn: II Y‑Yôhan – III Y‑Yôhan
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
