Klei Aê Diê Blŭ: Galati 1:11‑24
Êlan kliăng: “Kyuadah kâo amâo mă tŭ ôh klei anăn mơ̆ng mnuih, kăn mnuih tuôm bi hriăm kâo rei, ƀiădah ñu kbiă hriê mơ̆ng klei Yêsu Krist bi êdah leh kơ kâo” (Galati 1:12)
Klei êmuh ksiêm mĭn: Ya Khua ƀĭng kna Y‑Pôl lač kơ Klei Mrâo Mrang Jăk ñu dôk mtô? Si ngă klei mdê klei ñu bi knal kơ Klei Mrâo Mrang Jăk hŏng klei ñu bi knal klei phung Yuđa đăo êlâo tinăn? Hŏng ya êlan drei mă tŭ Klei Mrâo Mrang Jăk?
Leh lač klei ñu kñăm čiăng yuôm hĭn jing amâo djŏ tui duah klei mnuih tŭ ôh, Khua ƀĭng kna Y‑Pôl lŏ wĭt lač msĕ mơh kơ klei phung bi kdơ̆ng hŏng ñu lač: Diñu lač Klei Mrâo Mrang Jăk ñu mtô kbiă mơ̆ng mnuih duah mčeh mă (êlan 11). Khua ƀĭng kna Y‑Pôl hngah kơ klei anăn leh anăn lač amâo mâo mnuih tuôm bi hriăm ñu Klei Mrâo Mrang Jăk anăn ôh, wăt phung khua ƀĭng kna leh anăn phung đăo ti čar Yuđa kăn tuôm rei (êlan 12, 17‑22).
Ya ngă klei ñu amâo mă tŭ Klei Mrâo Mrang Jăk anăn mơ̆ng mnuih jing yuôm bhăn msĕ snăn lĕ? Čiăng bi klă kơ klei anăn, Khua ƀĭng kna Y‑Pôl yua klei ñu pô lŏ wĭt đăo ngă klei bi hmô. Ñu lač mphŭn dô ñu “sĭt suôr snăk” tui “klei mưng phung aê”. Amâodah lač snei, klei phung Yuđa đăo ñu đăo mphŭn dô, wăt tơdah ñu hur har snăk ƀiădah klei đăo anăn jing klei đăo tui si klei bhiăn, klei đăo “klei bhiăn mưng phung aê”, klei bi knal “kâo-hmư̆-arăng-lač”, dưi pia jing “klei bi knal lŏ mă mơ̆ng mnuih mkăn”. Amâo djŏ klei bi knal mă mơ̆ng Aê Diê pô ôh.
Ƀiădah lĕ, bi hŏng Klei Mrâo Mrang Jăk amâo djŏ msĕ snăn ôh. Dua blư̆ Khua ƀĭng kna Y‑Pôl mñă ñu mă tŭ Klei Mrâo Mrang Jăk anăn mơ̆ng klei Khua Yang bi êdah leh kơ ñu (êlan 12, 15‑16). Snăn yơh, mdê hŏng klei phung Yuđa đăo, Klei Mrâo Mrang Jăk ñu mtô kbiă hriê mơ̆ng Aê Diê pô, tơl ñu lač ñu kăn tuôm mă tŭ Klei Mrâo Mrang Jăk anăn mơ̆ng Khua ƀĭng kna Y‑Pêtrôs, Y‑Yakơ amâodah mơ̆ng sa čô mkăn ti čar Yuđa rei, kyuadah wăt tơdah ñu mâo klei bi hriăm mơ̆ng phung mă tŭ leh Klei Mrâo Mrang Jăk mơ̆ng Khua Yang dưn, hŏng ñu, klei đăo anăn jing klei đăo klei bhiăn mưng, jing klei đăo “kâo-hmư̆-arăng-lač” mơh. Ñu čiăng bi tuôm mă ñu pô hŏng Khua Yang. Jih jang phung đăo sĭt kơ Khua Yang msĕ si H’Mari, Y‑Sakari, H’Ana, Y‑Simêôn…hŏng lu êlan mdê mdê, digơ̆ mă tŭ klei bi êdah mơ̆ng Aê Diê pô sơăi, amâo djŏ knŏng đăo tui si klei čih hlăm hră mơar amâodah tui si klei bhiăn mưng phung aê đuč ôh. Mniê Samari leh bi tuôm leh anăn đăo kơ Khua Yang, wĭt hưn kơ phung ƀuôn sang, ƀiădah tơdah leh digơ̆ hmư̆ klei Khua Yang mtô, “Digơ̆ lač kơ mniê anăn, “Hmei đăo leh amâo djŏ kyua knŏng klei ih hưn ôh, ƀiădah kyua hmei pô hmư̆ leh, leh anăn hmei thâo sĭt Pô anăn jing Pô Bi Mtlaih lăn ala”(Y‑Yôhan 4:42).
Hruê anei, grăp čô drei đăo kơ Khua Yang mơ̆ng klei pô mkăn hưn sơăi, leh anăn drei lač jăk kơ Khua Yang lu snăk kơ klei anăn, ƀiădah brei Klei Mrâo Mrang Jăk drei mă tŭ ti knhal tuč jing klei bi êdah mơ̆ng Khua Yang pô mơh. Năng ai drei tuôm hmư̆ leh klei arăng lač: “Aê Diê amâo mâo čô ôh!” Brei grăp čô drei mâo klei đăo, klei bi mguôp hjăn hŏng Khua Yang.
Phung drei jing “anak” hĕ amâodah jing “čô” Khua Yang?
Wah lač: Ơ Khua Yang, kâo lač jăk kơ Ih kyuadah mâo pô atăt leh anăn bi hriăm kyuanăn kâo thâo kral Ih. Ƀiădah akâo Ih đru kâo dưi bi tuôm leh anăn thâo kral Ih hjăn kâo pô, čiăng kơ klei kâo hưn jing klei sĭt mơ̆ng klei bi knal kâo pô. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y‑Luk 14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
