Levis Kevcai 19:1-2, 11; Mathais 5:13-16
Nqe cim zaj kawm:
“Nej tsis txhob ua tubsab, tsis txhob ua tsis ncaj rau lwm tus thiab tsis txhob dag” (Levis Kevcai 19:11)
Lus nug xav:
– Nyob tiam Vajluskub Qub, Vajtswv samhwm kom Nws haivneeg ua dabtsi?
– Nyob tiam Vajluskub Tshiab, Tswv Yexus qhia cov thwjtim ua neej ncaj ncees li cas?
– Peb yuav qhia tshwm qhov tseeb thiab ci tus Tswv qhov kaj rau peb tsevneeg thiab lwm tus li cas hauv peb lub neej txhua hnub?
Nyob tiam Vajluskub Qub, Vajtswv tau samhwm rau Nws haivneeg hais tias: “Nej yuav tsum ua neeg dawbhuv, rau qhov kuv yog tus TSWV uas yog nej tus Vajtswv, kuv yog tus dawbhuv” (nqe 2). “Dawbhuv” txhais hais tias raug cais tseg rau Vajtswv thiab ua neej huv si hauv lub neej txhua hnub (I Petus 1:15-16). Vim peb yog Vajtswv Tus uas dawbhuv cov menyuam, peb lub neej yuav tsum qhia tshwm Nws tus yamntxwv uas tseeb thiab ncajncees. Vajluskub qhia meej hais tias: “Tus TSWV ntxub tej neeg uas hais lus dag, tiamsis nws txaus siab rau cov neeg uas hais lus tseeb” (Pajlug 12:22).
Nyob hauv Levis Kevcai 19:11, kev dawbhuv qhia tshwm dhau ntawm tej haujlwm uas pom tseeb, xws li: tsis ua tubsab, tsis hais lus dag, tsis ntxias lwm tus. Lub neej zoo li no ua rau muaj kev sib ntseeg siab thiab kev ncajncees hauv zejzog. Kev ua tubsab rhuav kev ncajncees, kev hais lus dag rhuav kev sib raug zoo, hos kev ntxias dag ua rau zejzog ntxhov. Vim li ntawd, kev ua neej ncaj yog kev qhia tshwm Vajtswv tus yamntxwv dawbhuv thiab tsis txawj hloov.
Txog tiam Vajluskub Tshiab, Tswv Yexus rov hais ntxiv txog lo lus nqua hu no thaum Nws qhia cov thwjtim hais tias lawv yog “cov ntsev uas las neeg ntiajteb” thiab yog “lub teeb uas ci rau neeg ntiajteb pom kev” (Mathais 5:13-16). Ntsev las kom txhob lwj; qhov kaj ci rau qhov tsaus thiab taw kev rau lwm tus. Yog ntsev tsuag lawm lossis qhov kaj raug npog cia lawm, ces ob yam ntawd tsis muaj nqis lawm. Vim li ntawd, kev dawbhuv tsis yog tsuas muaj nyob hauv peb tus kheej xwb, tiamsis yuav tsum qhia tshwm rau sab nraud; qhov uas ze thiab pom meej tshaj yog hauv tsevneeg dhau ntawm lub neej ncaj ncees thiab ua tej haujlwm zoo.
Tswv Yexus yog tus uas ua neej ncaj ncees zoo kawg nkaus, raws li Vajtswv Txojlus qhia hais tias: “Yexus tsis tau ua ib qho txhaum, thiab tsis muaj leejtwg hnov nws hais ib lo lus dag li” (I Petus 2:22). Thaum peb raws tus Tswv qab thiab cia Vaj Ntsujplig Dawbhuv coj, ces peb lub neej yuav qhia tshwm qhov tseeb ntawd dhau ntawm qhov uas peb tsis kam hais lus dag, xaiv qhov tseeb thiab ua neej ncaj ncees. Peb tabtom ua ntsev las tibneeg txhob puas tsuaj thiab ua qhov kaj coj lwm tus los cuag tus Tswv.
Txawm li ntawd los, kev ua neej ncaj ncees tsis yog ib qho yooj yim txhua lub sijhawm. Hauv lub neej niaj hnub nimno, thaum tibneeg saib “hais dag me me” tsis txhaum, lossis kam txuas tes nrog kev txhaum kom muaj nqis rau tus kheej, ces kev coj lub neej raws qhov tseeb yuav dhau los ua ib lo lus timkhawv uas muaj zog heev. Thaum peb xaiv hais lus tseeb, ua siab ncaj hauv tes haujlwm, thiab coj sib haum hauv peb tej kev sib raug zoo, peb lub neej yuav qhia tshwm Vajtswv lub hwjchim ci ntsa iab thiab ua qauv zoo rau peb tej menyuam xeebntxwv. Kev ua neej ncaj ncees tsis yog tsuas coj koob hmoov los rau peb tus kheej thiab peb tsevneeg xwb, tiamsis kuj ua rau Vajtswv tau koob meej thiab muaj kev tsuas zoo rau peb tej kwvtij neejtsa thiab cajces.
Thov Vajtswv,
Tus Tswv, thov Koj pab kom nyuam yaus ua neej dawbhuv thiab ncaj ncees, kom nyuam yaus lub neej dhau los ua ntsev thiab qhov kaj, ua rau Koj lub npe tau koob meej thiab coj tau lwm tus los cuag Koj. Nyuam yaus tuav Tswv Yexus Khetos lub npe thov, Amees.
Peb coglus yuav hloov yam dabtsi kom peb ua tau lub neej dawbhuv?
Nyeem Vajluskub hauv peb lub xyoos: Xakhaliyas 9
Kênh Youtube BHKTHN:
