Pajlug 24:10
Nqe cim
“Yog koj qaug zog thaum raug kev ntxhov siab, ces yog koj siab yau heev” (Pajlug 24:10).
Nyeem ntxiv Phau Txhais Tshiab (HMOWSV)
“Yog koj poob siab nthav rau hnub uas koj raug ceeblaj, koj kuj tsis muaj zog”
Lus nug rau sawvdaws xav:
– Lo lus “hnub…raug ceeb laj” txhais licas?
– Lub homphiaj tus Tswv cia tej kev txomnyem, sim siab tuaj raug peb yog dabtsi?
– Nqe Pajlug no txhawb koj lub zog licas?
“Hnub… raug ceeb laj” pib ntawm ib lo lus hais txog tej yam raug zuaj nqaim lossis raug kaw, zoo li txojkev sib tawmtsam loj heev hauv nruab siab (Ntawv Nkauj 25:17), tus pojniam yug menyuam (Yelemis 4:31), kev txhawj ntshai thaum ntsib yeebncuab (Yelemis 6:24),… Yog li ntawd, lo lus “hnub… raug ceeb laj” tsis yog tsuas hais txog hnub uas ua tsis tau raws siab xav xwb, tiamsis tseem yog hnub muaj kev tsaus ntuj thiab txomnyem. Thiab “hnub… raug ceeb laj” kuj muaj nqis heev vim tsawg tshajplaws hnub ntawd qhia peb zeem paub hais tias peb “lub zog” puas muaj zog ib yam li peb pheej xav. Zoo ib yam li ib zaj ntsuas kev kawm, Vajtswv kuj pom zoo cia tej kev txomnyem sim siab tuaj raug zoo li lub tsom iav kom peb zeem paub tus kheej kev loj hlob sab ntsujplig txog qib twg lawm.
Nyob hauv Lukas 22:31-32, Tswv Yexus qhia rau timthawj Petus paub ua ntej ob yam, Xatas yuav tawmtsam Petus thiab Petus yuav raug swb! Tiamsis tus Tswv tsis tav Xatas tes haujlwm vim Nws xav kom Petus zeem paub tus kheej, tso tseg tej kev khav txog nws lub dag zog thiab tso tseg nws kev cia siab rau tus kheej (Lukas 22:33-34), tsis tas li ntawd xwb dhau kev swb tsam zaum no, Petus yuav loj hlob tuaj thiab muaj nqis dua qub. Vim licas tus Tswv paub hais tias Petus yuav tsis raug kev puastsuaj zoo li Yudas Ixakali-us? Vim Tswv Yexus yeej tseem nrog nraim thiab pab Petus thaum Petus raug swb, thiab vim Petus yog “tus Tswv tus menyuam” raug swb thaum dab ntxwgnyoog sim siab, tiamsis Yudas Ixakali-us yog tus “tshwj tseg rau kev puastsuaj” (Yauhas 17:12 HMOWSV) nws muab tus kheej muag rau dab ntxwgnyoog. Petus nyuaj siab thaum swb, tiamsis Tswv Yexus ntsib nws ntawm ntug hiavtxwv Kalilais txhawb nws zog, muab haujlwm cob rau nws (Yauhas 21).
Tej kev sim siab lossis kev dag ntxias tus Tswv cia tuaj raug peb yog pab kom peb loj hlob dua qub tsis yog cia los qhuab yuam lossis ua rau peb raug kev puastsuaj. Nyob ntawm no peb kawm tau ob zaj. Thib ib, hais txog tus kheej, txhob ua neej nrog kev txajmuag vim yus raug swb, txhob maj thaub qab tawm ntawm tus Tswv kev nqua hu yus. Vim licas coob tug ntseeg xav phem thaum qaug zog? Tej zaum yog vim ntshai poob ntsejmuag vim muab saib hlob yus tus kheej dhau! Thib ob, hais txog lwm tus poob rau kev txhaum, peb tsis txhob thuam, tiamsis yuav tsum qhib kev rau lawv rov qab los thiab thov tus Tswv siv peb los pab lwm tus tig rov los cuag tus Tswv (Pajlug 10:12; Yakaunpaus 5:19-20; Kalatias 6:1-2).
Thiab peb tau txhawb zog heev thaum paub hais tias timthawj Petus, yav tas los raug qaug zog, tiamsis nws tau Tswv Yexus siv los pab txhim kho lwm tus qaug zog uas yog Yauhas Malakaus lubneej thiab txojkev ntseeg. Haleluyas! Ua tus Tswv tsaug!
Thov Vajtswv,
Tus Tswv, thov ua Koj tsaug vim Koj txojkev hlub muab pub rau nyuam yaus txawm yog nyuam yaus tau khav thiab xav hais tias tus kheej txaus dag zog tiv taus tej kev ntxhov siab hauv lubneej. Thov pab nyuam yaus cia siab ntsoov rau Koj thiab thov Koj siv nyuam yaus los pab lwm tus uas tabtom qaug zog. Nyuam yaus tuav Cawmseej Yexus lub npe thov, Amees.
Peb puas qaug zog thaum ntsib teebmeem? Koj pab lwm tus qaug zog licas?
Nyeem Vajluskub hauv peb lub xyoo: Chivkeeb 38
Kênh Youtube BHKTHN:
