Henplais 9:1-10
Nqe cim:
“Txoj qub kevcai yeej muaj lus qhia kom neeg paub pehawm Vajtswv, thiab muaj ib qho chaw uas neeg ua cia rau sawvdaws mus pehawm Vajtswv. Chav ntawd piv txog daim ntaub ntag” (Henplais 9:1, 9a).
Lus nug rau sawvdaws xav:
– Lub Tsevntaub muaj qabhau licas rau cov neeg Yudais kev pehawm tus Tswv?
– Lub Tsevntaub muaj tej yam dabtsi thiab tej ntawd ntsistxog cov ntseeg Tswv Yexus li cas?
Ib tug neeg sojntsuam Vajluskub tau tshawb pom ib yam ntxim siab heev, ntawd yog Vajluskub tsuas siv 2 tshooj los hais txog kev tsim txhua yam tiamsis ho siv 50 tshooj los hais txog Lub Tsevntaub. Qhov ntawd qhia pom txog kev tseemceeb ntawm Lub Tsevntaub nyob hauv cov neeg Yudais txojkev pehawm tus Tswv. Thaum muab txoj kevcai rau cov Yixalayees, tus Tswv hais kom Mauxes ua Lub Tsevntaub, Nws hais tias: “Lawv yuav tsum ua ib lub Tsevntaub rau kuv, kuv thiaj nrog lawv nyob” (Khiavdim 25:8). Tus sau phau Henplais rov hais rau cov uas nyeem nco txog tej yam muaj nyob hauv Lub Tsevntaub thiab nws hais tias, “Chav ntawd piv txog daim ntaub ntag” (Henplais 9:9a).
Lub Tsevntaub muaj 2 feem, Chav Dawbhuv thiab Chav Dawbhuv Kawg Nkaus. Chav Dawbhuv muaj lub teeb uas txhab roj tsis tu ncua vim yuav tsum cig kaj nrig tsis tseg nyob hauv Lub Tsevntaub. Txuas ntxiv “muaj rooj thiab muaj cov ncuav fij rau Vajtswv”, muaj tagnrho 12 lub ncuav piv rau 12 xeem Yixalayees. Cov ncuav ntawd tau hloov tshiab hauv txhua hnub Xanpataus, cov ncuav qub muab rau tus povthawj tau noj. Nyob kiag ntawm daim ntaub cais Chav Dawbhuv thiab Chav Dawbhuv Kawg Nkaus, muaj qhov chaw hlawv hmoov tshuaj tsw qab. Nyob hauv Hnub Theej Txhoj, tus Povthawj Hlob yuav hlawv hmoov tshuaj tsw qab kom txhawb mus rau saum lub hau Phijxab.
Nyob hauv Chav Dawbhuv Kawg Nkaus muaj lub Phijxab, hauv Phijxab muaj ib lub tais kub ntim manas ua cim rau cov pejxeem nco txog Vajtswv txojkev tu lawv, muaj tus pas nrig hlav nplooj hais txog qhov uas tus Tswv xaiv Aloos thiab nws cajces los ua tes haujlwm Povthawj, thiab muaj ob daim txiag zeb uas sau Kaum Nqe Kevcai qhia lawv txog kev ua raws txoj kevcai. Hau uas npog lub Phijxab hu ua lub hau Phijxab uas roos kev txhaum, muaj ob tug qhelunpees nthuav tis vov, ua yamntxwv txog Vajtswv lub zwmtxwv hauv ntiajteb.
Lub Tsevntaub thiab tej yam nyob hauv tseemceeb kawg li, yog chaw rau cov Yixalayees tau ntsib Vajtswv. Tiamsis ntawd tsuas yog “qhov chaw dawbhuv hauv lub ntiajteb” uas muaj nrim xwb, tsis yog leejtwg kuj mus tau lawm hauv thiab tsis yog xav mus thaum twg los tau. Tus sau phau Henplais kuj hais tias nws hais tsis tau txhua nrho rau ntawm no (nqe 5) vim raws li nws tus kheej, Lub Tsevntaub thiab txhua yam nyob hauv tsuas yog tus duab uas siv los hais txog tus Cawmseej lubcev thiab tus Tswv tes haujlwm xwb. Los ntawm Tswv Yexus, txhua tus neeg uas muaj kev ntseeg puavleej muaj cuabkav los cuag thiab pehawm Vajtswv (Yauhas 14:6). Niaj hnub nimno, Tus Cawmseej thiaj yog tus tseemceeb, nyob nruab nrab ntawm kev pehawm. Qhov txaus tu siab yog muaj ib txhia neeg tsis saib kev tau los pehawm tus Tswv tim ntsej tim muag yog qhov tseemceeb, ntawd yog yam uas cov neeg Yudais thaum ub tos nrhw tiamsis tsis tau.
Thov Vajtswv
Tswv Yexus, nyuam yaus ua Koj tsaug, vim Koj tau los yug thiab ua lub neej nrog tibneeg kom txhua tus uas paub Koj ces paub txog Leej Txiv, muaj cuabkav los cuag tau Leej Txiv tim ntsej tim muag. Thov pab nyuam yaus niaj hnub saib hlob kev pehawm Leej Txiv thiab pehawm los ntawm ntsujplig thiab qhov tseeb. Amees.
Yam dabtsi tabtom tav peb txojhau kev pehawm tus Tswv kom tsimnyog?
Nyeem Vajluskub hauv peb lub xyoos: Lukas 20:1-26
Kênh Youtube BHKTHN:
