II Xwmtxheej Vajntxwv 14:1-7
Nqe cim:
“Axas hais kom cov Yudas mloog tus Tswv uas yog lawv cov yawgkoob tus Vajtswv lus, thiab ua raws li tus Tswv tej lus qhia thiab tej lus samhwm” (II Xwmtxheej Vajntxwv 14:4).
Lus nug rau sawvdaws xav:
- Cov Yudas lub tebchaws tiam uas vajntxwv Axas kav zoo li cas?
- Vim li cas thiaj tau zoo li ntawd?
- Raws li Axas xav, kev mloog Vajtswv yuav tsum ua dab tsi ntxiv thiab?
- Koj tab tom ua dab tsi qhia hais tias koj nrhiav kev ua haum Vajtswv siab?
Lub ntsiab hauv ntu Vajluskub no yog hais txog vajntxwv Axas kav tebchaws muaj kev thajyeeb. Kev thajyeeb tau hais txog peb zaug hauv xya nqe Vajluskub uas yog: “lub tebchaws muaj kev thajyeeb tau kaum xyoo” “lub tebchaws nyob thajyeeb” thiab “tus Tswv pub nws muaj kev thajyeeb.” Tau kev thajyeeb yog ib qhov zoo uas tus Tswv pub rau nws haiv neeg thaum tseem muaj kev tsov rog nrog tej tebchaws ib ncig. Tsis muaj kev tsov rog txhais tau hais tias lub neej tsis muaj kev txob txhawj, muaj kev kaj siab thiab ua tiav txhua yam uas tau npaj tseg. Vim yog muaj kev thajyeeb thiaj ua tau tus ntsayeej thaiv lub tebchaws Yudas tej nroog ruaj khov (nqe 6).
Yog ua cas lub tebchaws thiaj muaj kev thajyeeb tau kaum xyoo? Yog vajntxwv Axas txawj tswj kav tebchaws lov? Vajluskub qhia meej hais tias yog: “Axas ua zoo thiab ua ncaj ncees haum tus Tswv uas yog nws tus Vajtswv siab nyiam” (nqe 2). Vajntxwv nrog tej pejxeem puavleej nrhiav ua raws Vajtswv siab nyiam los ntawm kev mloog Vajtswv lus (nqe 4). Dhau ntawd, vajntxwv kuj rhuav tej chaw teev dab hauv lawv lub tebchaws huv tibsi pov tseg (nqe 5). Qhov uas lub tebchaws muaj kev thajyeeb yog tus Tswv pub. Vajtswv Axas hais tias: “Nws tiv thaiv peb txhua phab thiab pub peb nyob kaj siab lug.” (nqe 7b).
Vajntxwv nrog rau tej pejxeem tsis yog ua raws li Vajtswv siab nyiam xwb, thov Vajtswv coj lawv txoj hau kev thiab ua raws li Vajtswv tej lus qhia huv tibsi. Kev ua raws Vajtswv siab nyiam hauv nruab siab muaj tshwm tawm sab nraud los ntawm muab tej chaw teev mlom rhuav pov tseg. Los ntawm kev paub mloog Vajtswv tej lus thiaj tau tus Tswv foom hmov thiab pub rau “lub tebchaws nyob thajyeeb”.
Niaj hnub nimno, yog xav muaj kev thajyeeb hauv lub neej, peb yuav tsum rhiav kev ua haum Vajtswv siab los ntawm mloog Vajtswv tej lus qhia thiab rhuav tej chaw teev mlom pov tseg. Tej chaw teev mlom hauv peb lub siab qee zaus yog lub siab ntshaw ib yam dab tsi twg, lossis muab ib yam dab tsi twg saib hlob dua Vajtswv. Thov Vajtswv pab kom peb muab qhov uas ua raws li Vajtswv siab nyiam thiab kev ua raws li Vajtswv tej lus qhia saib hlob dua txhua yam huv tibsi kom tau sib txuas nrog tus Tswv. Tsis yog peb nyeem thiab kawm Vajluskub kom paub Vajtswv lub siab nyiam xwb, tiamsis peb yuav tsum ua raws Vajtswv siab nyiam los ntawm ua haujlwm tshwm hauv peb lub neej; “ua raws li tus Tswv tej lus qhia thiab tej lus samhwm”.
Thov Vajtswv,
Tus Tswv, thov pab nyuam yaus muaj lub neej tas siab ua raws li Koj lub siab nyiam los ntawm kev mloog Koj tej lus qhia, paub rhuav tej mlom hauv nyuam yaus lub siab kom tau txais Koj tej koob hmoov. Amees.
Puas muaj yam mlom twg tseem nyob hauv peb lub siab, ua rau peb tsis muaj kev thajyeeb?
Nyeem Vajluskub hauv peb lub xyoo: Pajlug 31
Kênh Youtube BHKTHN:
