Klei Aê Diê Blŭ: II Klei Yăl Dliê 14:1-7
Êlan kliăng: “Leh anăn mtă kơ phung Yuđa duah Yêhôwa, Aê Diê phung aê diñu, leh anăn djă pioh klei bhiăn leh anăn klei mtă” (II Klei Yăl Dliê 14:3b-4).
Klei êmuh ksiêm mĭn: Si ngă boh klei čar Yuđa hlăm ênuk Mtao Asara? Ya ngă snăn? Hŏng MtaoY‑Asara bruă tui duah Aê Diê brei nao hŏng ya klei? Ya klei hlăm hdĭp drei brei ƀuh drei dôk tui duah Aê Diê?
Klei êđăp ênang jing mta phŭn hlăm trăn Klei Aê Diê Blŭ lač kơ gưl tal êlâo mtao Y‑Asa kiă kriê. Klei êđăp ênang dưi lač tlâo blư̆ hlăm kjuh êlan: “čar mâo klei mdei êjai pluh thŭn”, “čar amâo mâo klei bi blah ôh” leh anăn “čar mâo klei êđăp ênang jŭm dar.” Dưi hdĭp hlăm klei êđăp ênang jing sa klei hơêč hmưi prŏng hĭn kyua ênuk anăn phung ƀuôn sang Aê Diê hdĭp hlăm klei blah ngă nanao hŏng Israel nah Dưr amâodah hŏng dŭm ala čar riêng gah. Amâo mâo klei bi blah mđrĭng hŏng klei hdĭp jăk mơak, êđăp ênang, djăp mta klei mĭn srăng mâo boh tŭ. Ăt kyua klei êđăp ênang mơh phung Yuđa rŭ mdơ̆ng leh dŭm ƀuôn prŏng kjăp (êlan 6).
Ya klei ngă kơ čar mâo klei êđăp ênang hlăm pluh thŭn? Djŏ mơ̆ kyua klei gĭt gai thâo mbruă mơ̆ng Mtao Y‑Asa? Klei Aê Diê Blŭ brei thâo mta phŭn jing Mtao “Y‑Asa ngă klei jăk leh anăn djŏ ti anăp ală Yêhôwa Aê Diê ñu” (êlan 2). Mtao leh anăn phung ƀuôn sang ñu duah leh Aê Diê leh anăn hlue ngă klei bhiăn Aê Diê (êlan 4). Mbĭt anăn, Mtao Asa ăt lăm lui klei kkuh rup yang hlăm čar (êlan 5). Klei êđăp ênang klei Aê Diê pah mni kơ diñu. Mtao Asa ăt lač: “kyuadah drei duah leh Yêhôwa Aê Diê drei; drei duah Ñu leh, leh anăn Ñu brei leh kơ drei klei êđăp ênang jŭm dar.” (êlan 7b).
Klei mtao leh anăn phung ƀuôn sang Yuđa duah Aê Diê amâo djŏ knŏng duah klei Aê Diê čiăng, akâo kơ Ñu atăt gai ôh ƀiădah lŏ mguôp hŏng bruă hlue ngă Klei Aê Diê Blŭ mtô. Klei tui duah Aê Diê hlăm lam ai tiê dưi bi êdah kyua bruă ngă klă klơ̆ng jing gưt hlue si klei bhiăn Aê Diê leh anăn lui rup yang. Kyua anăn Aê Diê brei kơ diñu klei hơêč hmưi, klă klơ̆ng jing “anôk mâo klei êđăp ênang”.
Hruê anei, čiăng mâo klei êđăp ênang hlăm klei hdĭp, brei drei ăt jih ai tiê tui duah Khua Yang. Mbĭt anăn ăt brei lăm lui klei soh, bruă ngă amâo bi mơak kơ Aê Diê, ya rup yang dôk hlăm klei hdĭp ngă kơ drei lui wir hŏng Khua Yang leh anăn čiăng kơ bruă mă hlue si Klei Aê Diê Blŭ jing phŭn. Năng ai jing sa klei soh amâodah klei gĭr čiăng mâo klei hing ang, klei tŭ dưn, klei dưi hlăm klei hdĭp ngă kơ drei wơr hĕ Klei Aê Diê Blŭ, ba rup yang jing mnơ̆ng kkuh mpŭ hlăm ai tiê pô. Akâo kơ Khua Yang brei kơ drei mđing tui duah Aê Diê nanao hlăm Klei Aê Diê Blŭ leh anăn djăp pioh klei bi mguôp siă suôr hŏng Ñu. Drei amâo djŏ knŏng dlăng, hriăm Klei Aê Diê Blŭ čiăng thâo klei Khua Yang čiăng ôh ƀiădah klei drei tui duah Khua Yang lŏ bi êdah bi klă klơ̆ng hlăm klei hdĭp “gưt leh anăn hlue ngă klei bhiăn Ñu”
Drei dôk mâo mơ̆ ya rup yang hlăm klei hdĭp pô brei lăm lui čiăng jih ai tiê mă bruă tui duah Aê Diê leh anăn hlue ngă hdră bhiăn Ñu?
Wah lač: Ơ Khua Yang, akâo kơ Ih đru kâo mâo sa klei hdĭp tui duah Ih jih ai tiê, bi êdah hlăm bruă gưt Klei Aê Diê Blŭ, hriăm lăm lui jih djăp rup yang hlăm klei hdĭp pô čiăng thâo kơ sa klei hdĭp bŏ hŏng klei jăk jĭn Aê Diê brei.
Dlăng Klei Aê Diê Blŭ hlăm tlâo thŭn: Klei Bi Hriêng 31:1‑31
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
