Tes Haujlwm 16:16-34
Nqe cim:
“Txawm yog nej raug txomnyem thiab tau zoo los nej yuav tsum ua Vajtswv tsaug. Vajtswv xav kom nej txhua tus uas nrog Yexus Khetos koom ib txoj sia lawm ua tej no” (I Thexalaunikes 5:18).
Lus nug rau sawvdaws xav:
- Timthawj Paulus lawv npoj xa moo zoo ntsib teebmeem dabtsi hauv nroog Filipis?
- Paulus thiab Xilas nkawd ua dabtsi hauv tsev lojcuj?
- Muaj xwm tshwm li cas hauv tsev lojcuj thiab hauv tus zov tsev lojcuj tsev neeg?
- Yuav ua li cas peb thiaj niaj hnub hu nkauj qhuas Vajtswv thiab ua Vajtswv tsaug?
Timthawj Paulus lawv npoj xa Moo zoo tabtom qhia txog tus Tswv zaj, zaum tim ob nyob hauv lub nroog Filipis. Thaum ntawd muaj ib tug ntxhais muaj dab ua rau nws paub txog yav tomntej, nws ua rau nws tus tswv tau nyiaj ntau heev los ntawm nws kev saib hmoov. Timthawj Paulus tuav Tswv Yexus lub npe ntiab dab tawm hauv tus ntxhais ntawd mus lawm. Thaum pom hais tias tus ntxhais ntawd nrhiav tsis tau nyiaj lawm, tus ntxhais ntawd tus tswv thiaj coj Paulus thiab Xilas nkawd mus cob rau tej nom tswv, lawv liam hais tias nkawd ua rau muaj kub ntxhov hauv lub nroog. Tej nom tswv tsis tau taug nkawd zaj tiamsis twb muab nkawd coj mus kaw rau hauv tsev lojcuj thiab muab xauv kotaw huv tibsi.
Raug liam txim, raug nplawm ib ce mob ntsoog qees, muab xauv kotaw, los nkawd yeej tsis yws tiamsis nkawd tseem thov Vajtswv thiab hu nkauj qhuas Vajtswv ua rau cov neeg raug kaw hauv tsev lojcuj puavleej tau hnov nkawd lub suab qhuas Vajtswv. Nkawd lub suab nkauj hu thaum ib tag hmo yog yam khoom fij tsw qab mus txog saum ntuj! Ib zaj txujci tshwmsim uas yog Vajtswv ua rau muaj av qeeg loj heev, lub tsev lojcuj tej qhov rooj qhib plho thiab tej xauv ntawm cov neeg raug kaw tej kotaw puavleej plam huv tibsi. Thaum pom li ntawd, tus neeg zov lub tsev lojcuj xav hais tias tej neeg raug txim twb khiav tas lawm, nws yuav rov tua nws tus kheej. Tiamsis Paulus cheem tsis pub nws ua li ntawd, thiab hais rau nws hais tias cov neeg raug txim txhua tus puavleej tseem nyob ntawd huv tibsi. Tus neeg zov tsev lojcuj thiaj hloov siab los txhos caug ntawm Paulus nkawd xub ntiag thiab nug nkawd hais tias nws yuav ua li cas thiaj tau txais kev dim txim? Tomqab tus zov lub tsev lojcuj hnov Paulus nkawd qhia nws paub txog txoj kev cawm dim lawm, tagnrho nws tsev neeg puavleej ntseeg Yexus thiab ua kevcai raus dej hmo ntawd.
Ua Vajtswv tsaug thiab qhuas Vajtswv thaum tau zoo ces yog yam ua tsis nyuaj, tiamsis tas siab qhuas Vajtswv thiab ua Vajtswv tsaug thaum ntsib kev txomnyem ces tsis yog yam yuav yoojyim ua li. Txawm li ntawd los, Vajtswv xav kom peb cov ntseeg Nws yuav tsum niaj hnub ua Vajtswv tsaug rau txhua lub tsamthawj (I Thexalaunikes 5:18). Tus cev Vajtswv lus Hanpakus hais tias: “Txawm yog tej ntoo txiv ncuavpias tsis tawg paj thiab tej txiv hmab tsis txi txiv, txawm yog tej ntoo roj txiv zeeg tas thiab tej liaj tej teb qoob loo tsis tuaj, txawm yog tej yaj tuag tas thiab tej nkuaj nyuj khoob lug cia xwb los kuv tseem muaj kev zoo siab thiab txaus siab, vim muaj tus TSWV uas yog Vajtswv ua kuv tus Cawmseej.” (Hanpakus 3:17-18).
Muaj ib zaj nkauj sau hais tias: “Lub hnub yeej ci, saum toj txheej fuab tsaus, …txawm sab tid pom tsis tseeb, tus Tswv txhais tes tseem tswj.” Qhov uas yuav pab tau peb niaj hnub ua Vajtswv tsaug rau txhua lub tsamthawj yog: “…Vajtswv xav kom nej txhua tus uas nrog Yexus Khetos koom ib txoj sia lawm ua tej no” (I Thexalaunikes 5:18b). Txawm yuav zoo lossis phem, tau zoo lossis txomnyem tuaj raug peb lub neej los yeej muaj tus Tswv txhais tes tswj kav, ib yam li Yauj lub neej tau muaj dhau los. Cia li ua Vajtswv tsaug, vim txhua yam uas Vajtswv ua thaum kawg yeej yog yam zoo xwb.
Thov Vajtswv,
Tus Tswv, thaum ntsib teebmeem ib ncig hauv lub neej, thov pab nyuam yaus paub tig saib saud kom pom koj yog Leej Txiv uas zoo, yog tus Vajtswv uas muaj fwjchim thiab ncaj ncees uas tswj kav txhua lub tsamthawj, kom nyuam yaus niaj hnub paub ua koj tsaug tsis tseg. Amees.
Peb puas niaj hnub ua Vajtswv tsaug rau txhua lub tsamthawj lawm tau?
Nyeem Vajluskub hauv peb lub xyoo: Yaxayas 57
Kênh Youtube BHKTHN:
