Chivkeeb 4:8-16

Nqe cim: 

“Peb tsis txhob ua li Ka-ees; Ka-ees cia dab Ntxwgnyoog kav nws lub siab, nws muab nws tus kwv Anpees tua povtseg. Vim licas Ka-ees thiaj tua nws tus kwv? Rau qhov nws tes haujlwm phem, thiab nws tus kwv tes haujlwm zoo” (I Yauhas 3:12).

Lus nug rau sawvdaws xav: 

• Vajtswv nug Ka-ees yam li cas tom qab uas nws ua txhaum? 
• Ka-ees teb Vajtswb li cas? 
• Los ntawm Ka-ees lo lus teb qhia peb paub dabtsi txog Ka-ees thiab kev txhaum fuam loj hauv nws? 

Ib tsoom cov mloog txhua tus,

Coob leej hais tias Ka-ees tua nws tus kwv yog tim Vajtswv ua tsis ncaj ncees rau Ka-ees, tiamsis Vaj Ntsujplig teb rau peb lo lus hais no thaum Ka-ees tua nws tus kwv vim yog nws chim heev, thiab vim Anpees ua tes haujlwm zoo (I Yauhas 3:12b). Yog li ntawd, tes haujlwm uas Ka-ees fij khoom rau tus Tswv yog ua yuam kev, yog kev txhaum. Vim licas Ka-ees paub qhov uas nws ua yuam kev thiab hnov tus Tswv ceebtoom los nws tseem tua Anpees thiab? Vim Ka-ees cia dab Ntxwvnyoog kav nws lub siab (I Yauhas 3:12a). Thawj tus tibneeg yug los hauv ntiajteb tua tus tibneeg tim ob yug los hauv ntiajteb uas yog nws tus kwv, qhov no yog tus neeg ua kev txhaum qhev tes haujlwm! 

Qhov uas Ka-ees muaj lub siab tawv, qhia tshwm txog nws tus tibneeg tseeb uas yog dab Ntxwgnyoog li lossis yog Vajtswv li. Ka-ees paub tus Tswv, mloog Nws qhia, fij khoom rau Nws tiamsis Vajtswv tsis yog Ka-ees tus Tswv vim nws tsis mloog Vajtswv lus, vim li ntawd Ka-ees yog dab Ntxwgnyoog menyuam thiab nws ua txojkev txhaum qhev (II Petus 2:18-19; Loos 6:16). Ka-ees lub siab tawv tsis yog los ntawm qhov nws muab Anpees tua tiamsis yog los ntawm nws tus cwjpwm tsis txais yuav tus Tswv kev ua siab ntev thiab kev hlub los nrhiav nws, tom qab uas nws poob kev txhaum lawm (nqe 9). Ka-ees cov lus teb rau tus Tswv yog cov lus dag thiab tsis lees ris yam uas nws tau ua. Thaum kawg, yam uas Ka-ees ua tsuas txhawj txog nws txojsia xwb, nws tsis lees txim thiab tsis muaj yam qhia tshwm txog tus neeg tso kev txhaum tseg (nqe 13-14). Nws muaj lub siab tawv tsis lees txim. 

Peb pom qhov txaus ntshai uas kev txhaum huam hauv ib tug tibneeg yog li no. Thaum chivthawj, Adas thiab Evas ob tug, ib leeg liam txim rau ib leeg (Chivkeeb 3:9-13), tiamsis tiam neeg tim ob kev txhaum twb huam loj heev dua qhov ntawd ua rau Ka-ees tsis yog tsis kam lees txim xwb nws tseem kam hais dag Vajtswv thiab. Dua li ntawd, Ka-ees tseem nug tus Tswv hais tias: “Kuv yog tus uas saib xyuas kuv tus kwv los? Qhov no yog thawj lo lus nug uas tibneeg kam hais ua nug rau Vajtswv uas tau Vajluskub sau tseg. Kev txhaum yim hnub yim huam loj hauv Adas caj ces, “ua txhaum ib yam li Ka-ees ua”, lossis ua neej zoo li neeg ntiajteb ua (Yudas 11a).

Txawm yog paub ib tug neeg ua phem ua qias thiab muaj lub siab tawv zoo ib yam li Ka-ees ua los Vajtswv tseem qhia tshwm Nws txojkev hlub, kev tiv thaiv Ka-ees (nqe 15) thiab tibneeg txog niaj hnub nimno. Thov kom peb zeem paub Vajtswv txojkev hlub thiaj paub tig rov los cuag tus Tswv thaum peb muaj lub siab tawv ua txhaum rau tus Tswv, peb thiaj tau txais kev zam txim (I Yauhas 1:9).

Thov Vajtswv,

Tus Tswv, thov Koj hlub nyuam yaus. Nyuam yaus paub hais tias kev txhaum lub zog txaus ntshai heev. Thov Koj cawm nyuam yaus dim tej kev phem kev qias, thiab thov pub rau nyuam yaus muaj lub siab txawj lees txim tabmeeg Koj, kom tau txais Koj kev hlub. Amees. 

Ib tsoom cov mloog uas hmov thiab tshua,

Zaj kawm hauv Ka-ees lub neej qhia peb txog dab tsi ntawm kev txhaum? 

Nyeem Vajluskub hauv peb lub xyoo: Exalas 10:18-44

Phab Xa Suab Lus nrog rau Phab Cob Qhia Tus Ntseeg koom tes txhim muaj.

Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com

Tshooj Youtube BHKTHN: https://www.youtube.com/c/bhkthn