Loos 5:1-11
Nqe cim
“Yog li ntawd, vim peb ntseeg, Vajtswv thiaj suav hais tias peb yog neeg ncaj ncees, peb tau nrog Vajtswv sib raug zoo, rau qhov peb tus Tswv Yexus Khetos pab peb.” (Loos 5:1).
Lus nug rau sawvdaws xav:
– Peb tau txais yam dabtsi thaum los ntseeg Tswv Yexus?
– Cov ntseeg Yexus khav txog tej yam twg thaum muaj lub neej tshiab nyob hauv Yexus Khetos?
– Zaj kawm hnub no muaj ntsiab lus li cas rau peb lub neej nrog tus Tswv mus?
Thaum peb ntseeg Tswv Yexus tus uas ris peb tej kev txhaum saum tus ntoo khaublig, Nws cov ntshav ntxuav peb tej kev txhaum huv tibsi mus. Kiag lub sijhawm ntawd, peb tau suav hais tias yog neeg ncaj ncees, tau nrog Vajtswv sib raug zoo (nqe 1). Peb muaj txojkev sib raug zoo tshiab nrog Vajtswv Vaj Peb Leeg, muaj cai mus cuag Nws thiab tau txais lub meejmom ua menyuam zoo ib yam li tus tub uas yuam kev lawd tig rov los cuag leej txiv, tau leej txiv zoo siab hlo txais yuav thiab rov pub cai los ua menyuam hauv tsevneeg li qub. Vaj Ntsujplig nyob hauv peb lub siab, qhib peb lub qhov muag siab kom peb pom Vajtswv, Nws txojkev hlub thiab tej uas Nws npaj pub rau peb (nqe 5). Peb yuav vamkhom Tswv Yexus txojsia sawv rov los kom peb dim hnub uas Nws los txiav txim (nqe 10).
Tus ntseeg Yexus tsis yog dim vim ua haujlwm zoo tiamsis yog Vajtswv pub dawb xwb. Vaj Leej Txiv npaj txojkev cawm dim, Vaj Leej Tub los ua txojkev cawm dim, thiab Vaj Ntsujplig ua homthawj nias, pub lub zog rau cov ntseeg ua tus sawv cev qhia tawm ntuj ceebtsheej. Yog li, txhua tus neeg tsis muaj cuabkav khav tej uas nws ua tau, tiamsis tsuas khav tau txojkev cia siab hauv Vajtswv lub tshwjchim xwb (nqe 2). Peb ntseeg ruaj hais tias peb lub siab ntseeg Tswv Yexus, peb yeej muaj cuabkav mus cuag tau Vajtswv thiab cia siab rau Vajtswv lub tshwjchim cia ntsa iab. Peb khav tau hauv Vajtswv vim muaj Tswv Yexus, vamkhom Nws peb tau nrog Vajtswv sib raug zoo (nqe 11).
Peb kuj khav tau thaum raug kev txomnyem (nqe 3). Cov ntseeg ua neej nyob hauv lub ntiajteb no, lub hwjchim tsaus ntuj niaj hnub tawmtsam. Tswv Yexus hais rau cov thwjtim hais tias: “Tsis muaj ib tug tub kawm ntawv uas yuav paub tshaj nws tus xibhwb, thiab tsis muaj ib tug tubqhe uas yuav muaj hwjchim dua nws tus tswv.” (Mathais 10:24). Tswv Yexus twb raug liam txim, tsimtxom, ntaus… Cov ntseeg kuj yuav raug tej ntawd thiab. Txawm li ntawd los, tus Tswv yeej tsomkwm, nrog nraim thiab pab kom peb tiv taus tej kev nyuaj hauv lub neej… “txojkev txomnyem ntawd ua rau peb ua taus siab ntev, qhov uas peb ua taus siab ntev haum Vajtswv siab, thiab qhov uas peb ua haum Vajtswv siab ua rau peb muaj kev cia siab.” (nqe 3-4). Cov tibneeg tsis ntseeg lawv yeej tsis muaj kev zoo siab thaum txomnyem, tiamsis cov ntseeg Yexus zoo siab thaum raug txomnyem, rau qhov paub hais tias tus Tswv cia tej kev sim siab ntawd los raug kom peb ua tau zoo dua, muaj kev ntseeg ruaj khov thiab loj hlob nyob hauv Nws.
Thov Vajtswv,
Vajtswv Vaj Peb Leeg, Koj yog tus pub kev ncaj ncees rau nyuam yaus thiab tau nrog Koj sib raug zoo! Thov Vaj Leej Txiv Koj ua rau nyuam yaus muaj kev ntseeg, kev cia siab, kev hlub thiab ncaj ncees nrog Koj mus txog thaum kawg. Nyuam yaus tuav Tswv Yexus lub npe thov, Amees.
Peb puas zoo siab thaum muaj lub neej tshiab nyob hauv Yexus Khetos?
Nyeem Vajluskub hauv peb lub xyoo: Khiavdim 24
Kênh Youtube BHKTHN:
