Yelemis 38:24-28
Nqe cim:
“Koj tsis txhob ntshai cov neeg ntawd, rau qhov kuv yuav nrog nraim koj thiab tsomkwm koj. Kuv yog tus Tswv uas hais li ntawd” (Yelemis 1:8).
Lus nug rau sawvdaws xav:
- Tus cev lus Yelemis tab tom ntsib yam xwm zoo li cas?
- Yelemis txiav txim siab ua li cas?
- Yelemis tau tus Tswv pab cawm zoo li cas?
- Peb pheej ua li cas thaum ntsib tej xwm tsis zoo hauv lub neej?
Thaum vajntxwv Xedekiyas hnov tus cev lus Yelemis hais Vajtswv tej lus ntsigtxog haiv neeg Yudais thiab lub nroog Yeluxalees yuav raug puastsuaj, vajntxwv yeej siab tawv qhawv tsis txiav txim siab ua raws li Vajtswv tej lus qhia. Dhau ntawd, vajntxwv tsis xav kom nws tej nomtswv paub txog qhov uas nws thiab tus cev Vajtswv lus Yelemis sib tham txog yam dabtsi, nws thiaj txwv tsis pub Yelemis qhia tej ntawd rau lwm tus paub thiab vajntxwv yuav tsi muab Yelemis rau lawv coj mus tua (nqe 24). Muaj raws li vajntxwv xub xav tseg lawm, vajntxwv tej nomtswv tuaj nug Yelemis txog qhov uas nws nrog vajntxwv sib tham saib yog hais txog dabtsi, tiamsis Yelemis teb raws li vajntxwv qhia kom hais rau tej nomtswv.
Txawm hais tias ntsib kev txiv ob sab tuaj rau Yelemis, tiamsis Vajtswv tus tub txib Yelemis kuj muaj tswvyim los teb tau tej kev nyuaj ntawd. Yelemis tsis hais dag thiab tsis hais yam li tsis muaj chaw txawb uas yuav ua rau cov neeg tawm tsam tsis txaus ntseeg. Yelemis hais qhov tseeb thiab nws tsuas hais tej uas tsimnyog hais xwb, tsis hais tas nrho txhua yam. Vajntxwv tseem muab Yelemis kaw ntxiv thiab muaj tub rog zov khov kho mus txog thaum lub nroog Yeluxalees rau puastsuaj. Zoo heev uas Yelemis tau saj Vajtswv kev pab cawm nws raws li Vajtswv tau hais tseg thaum pib hu nws los ua tus cev lus hauv (Yelemis 1:8) los lawm, txawm lub nroog Yeluxalees uas nws nyob tab tom raug puastsuaj (nqe 28). Tej subtawg subntsha uas Yelemis hais txog Vajtswv tso tuaj raug cov Yudas yog: hniav ntaj hniav riam, kev tshaib kev nqhis, kev mob kis, raug mus ua cev qhev…tiamsis qhov chaw nkaum uas Yelemis nyob muaj tub rog zov khov kho, nws tsis ntsib ib yam xwm dabtsi li thiab tau ncuav noj tsau txhua hnub (Yelemis 37:21). Yelemis kuj tsis pom kev sib ntaus sib tuas uas tshwm muaj thaum ntawd thiab nws tsis raug ntes coj mus ua cev qhev.
Vajtswv muaj ncauj kev zoo los pab cawm cov neeg uas tas siab ntsws tso siab rau Vajtswv tej lus cog tseg. Raws li peb tibneeg saib, qhov uas raug kaw thiab muaj tub rog zov khov kho tsis yog chaw nkaum zoo ib zaug li, tiamsis raws li Vajtswv kev paub txhua yam, ces hauv tsev lojcuj los yeej yog chaw nkaum zoo kawg rau Vajtswv tej tub txib uas muaj siab ncaj ncees. Hauv lub neej txhua hnub, thaum ntsib teebmeem peb kheev txhawj ntshai thiab thov Vajtswv pab kom tej ntawd ntxov dhau mus, tiamsis yam uas Vajtswv xav kom peb cov ntseeg yuav tsum ua yog paub vam khom Vajtswv pab, ua neej tiv dhau teebmeem xwb tsis yog thov Vajtswv tshem tawm teebmeem. Thov Vajtswv pab kom peb muaj kev ntseeg txaus nyob twjywm tos thiab saib tes haujlwm pab cawm uas Vajtswv ua pub rau peb.
Thov Vajtswv,
Vajtswv tus uas ncaj ncees! Nyuam yaus ntseeg hais tias txhua yam tshwm muaj tuaj rau lub neej Koj yeej ua kom muaj qab hau rau cov uas fwm Koj. Thov pab nyuam yaus pib lub neej tso siab rau Koj txhua lub sijhawm, muaj lub neej cob rau Koj txhais tes cia Koj siv thiab saib xyuas raws li Koj pom zoo. Amees.
Peb puas muaj kev ntseeg txaus hais tias Vajtswv muaj peevxwm siv teebmeem los pab cawm tau peb raws li Nws pom zoo?
Nyeem Vajluskub hauv peb lub xyoo: Yelemis 7
Kênh Youtube BHKTHN:
