Tĭt 3:8-11
“Dôm tơdrong inh bơtho âu trŏ tơpă. Păng dôm tơdrong inh bơtho ih lăm kơthơ âu ih bơtho khŏm khŏm kơ lu bơngai lui wă kơ sư pơm ‘lơ̆ng păng đe ling lang; kơlih kơ dôm tơdrong inh bơtho âu ‘lơ̆ng ngăl păng yua kơ bơ̆n.” (Tĭt 3:8)
Nơ̆r jet tơchĕng pơwao:
– Tĭt kăl kơ pơma tơdrong kiơ wă pơlung lu bơngai lui pơm ‘lơ̆ng?
– Bơngai lui kăl kơ weh dah pơm tơdrong kiơ?
– Lu bơ̆n kăl kơ pơm kiơ wă kơ huay kơ ‘bơm lăm tơdrong bơtho ưh trŏ?
‘Bok Pôl đei tơ’blŏk kơ Tĭt athei pơma mă pran gah tơdrong dŏng pơklaih đơ̆ng Pêng Anăn ‘Bok Kei-Dei đơ̆ng sư bơtho lăm chăl 2 păng 3:3-7 dôm nơ̆r kăl kơ lui yom. Kơplah lu bơngai lui ‘bĕnh kơ tơdrong ‘mêm păng tơdrong mơnat đơ̆ng Kră Yang, lu sư rai kơjăp, pran kơtang, adrin pơm ‘lơ̆ng noh tơdrong trŏ tơpă păng pơyua kơ lơ bơngai. Lu tơdrong pơm ‘lơ̆ng thoi lĕ kơ jet gia dih băl, đei ‘blŏk dih băl minh tơdrong pơm tơ’bôh gơh tơgŭm băl… arih hơdai hăm kon pơlei tơ Bŏl đak kret ưh kơ băt sơng iŏk păng alah tăm, lu tơdrong pơm ‘lơ̆ng lu bơngai lui tơ’bôh băt ‘mêm mơnat gô tơgŭm lơ bơngai băt kơ Kră Yang păng ư-ang anăn Sư. Kră Yang Yêsu khan: “Lu iĕm athei pơchrang hơdah kơ đe tơdrong hơdah lu iĕm thoi noh mơ̆n, na đe băt kơ tơdrong iĕm pơm ‘lơ̆ng, na đe bơnê hăm ư-ang kơ ‘Bă bơ̆n tơ plĕnh ti.” (Mathiơ 5:16).
Lăm tơdrong arih păng pơma dơnuh Tĭt kư̆m thoi lu bơngai lui, “Ih ‘nĕ ăn đe bơtho adrĕch adrung yă ‘bok bơngai Juđê sơ̆ hŏ. Sư bơtho kư̆ kă đĕch, ưh kơ tơpă ôh. Lu sư kư̆m pơjah pơjăng tơhil băl gah tơdrong juăt ‘Bok Kei-Dei pơkă sơ̆. Dôm tơdrong lu sư chă bơtho ưh kơ yua kiơ ôh.” (trong 9). Noh bơih lu tơdrong pơjah pơjăng băl ưh kơ đei yua kiơ, lu tơdrong kơ hlôh kơwao, păng yua iŏk lu adrĕch đơ̆ng yă ‘bok sơ̆ na bơtho păng pơjah pơjăng tơhil băl gah tơdrong juăt ‘Bok Kei-Dei, dôm tơdrong lu sư chă bơtho ưh kơ yua kiơ ôh, kang pơrăm bơngai lui đĕch. ‘Nâu bơih lu bơngai bơtho ưh kơ trŏ, thoi bơbe pơm triu wă kơ gơh mơ̆t lăm khul bơngai lui wă chông bơngai lui kiơ̆ trong kư̆ kă.
Kơlih kơ thoi noh, hăm lu bơngai bơtho ưh kơ trŏ, ‘bok Pôl đei bơtho: “Bơngai lui bu mă bơtho tơdrong ‘Bok Kei-Dei sư bơtho chroih tơ nai, sư wă kơ đe kiơ̆ gah tơdrong sư đĕch, ih athei khă sư truh ‘bar ‘măng hŏ. Na ih khă dơ̆ng truh pêng ‘măng boih, sư tam mă chu kơ ih, ih pơih sư ‘nĕ pă ăn sư bơtho dơ̆ng.” (trong 10). Mă khan sư bơngai lui đunh, mă khan jô̆ kơ sư “’bok khan lê̆ adrol” dah “’Bok bơtho”… mălei mưh đei kiơ̆ lu bơngai bơtho ưh kơ trŏ bơih pơm rŭng răng dih băl, bơtho tơdrong ‘Bok Kei-Dei chroih tơ nai, sư wă kơ đe kiơ̆ sư đĕch… dah đei khă sư truh tơ ‘bar pêng ‘măng bơih, lei pơlung sư wih brŏk tơ Kră Yang na sư ưh kơ wă tơplih hloi, lei ‘nĕ pă ngôi hơdai sư dơ̆ng “Ih kư̆m băt mơ̆n bơngai bu pơm thoi noh sư tŭk tơdrong ‘lơ̆ng sư boih, na jing pơm tơdrong yoch. Sư bơtho ưh kơ trŏ thoi noh, sư kư̆m băt kơdih sư pơm yoch mơ̆n.” (trong 11 BTTHĐ).
Na dang ei, lu bơngai bơtho ưh kơ trŏ gô pơhlŭ lu bơngai lui, lu sư chă klĕnh mơ̆t hơdai hăm bơngai lui wă pơrăm kon pơlei Kră Yang. Lu bơ̆n athei lui gơnang kơ tơdrong ‘mêm mơnat đơ̆ng Kră Yang ăn đĕch, adrin pơm ‘lơ̆ng, ‘nĕ kơ pơjah pơjăng tơdrong ưh kơ đei yua păng athei pơma mă rơđah, ‘nĕ kơ mơ̆ng đe bơtho tơdrong ưh kơ trŏ. Adrol hloh, athei đŏk păng pơhrăm nơ̆r ‘Bok Kei-Dei wă chĕp kơjăp nơ̆r Kră Yang bơtho.
Kơkuh kơ Ih Kră Yang mă ‘mêm, bơnê kơ Ih yua kơ tơdrong ‘mêm Ih ‘măn kơ inh. Apinh Ih tơgŭm inh wă kơ inh mêm kơ Ih, adrin pơm ‘lơ̆ng wă kơ huay kơ pơjah pơjăng kư̆ kă păng ưh kơ mơ̆ng đe bơtho tơdrong ưh kơ trŏ, krao khan yua anăn Kră Yang Yêsu Krist, Amen.
Lu bơ̆n kăl kơ pơm kiơ kơplah bơ̆n đei tơdrong dŏng pơklaih đơ̆ng Kră Yang ăn?
Đŏk Sơ̆p Hla bơar ‘Bok Kei-Dei lăm pêng sơnăm: II Lu Pơtao 22
Kênh Youtube BHKTHN:
