Chivkeeb 38:12-26
Nqe cim:
“Yexus hais rau lawv hais tias: Kuv qhia tseeb rau nej hais tias txhua tus uas ua txhaum puavleej ua txojkev txhaum qhev” (Yauhas 8:34).
Lus nug rau sawvdaws xav:
– Ua pauj kev dag ntxias thiab tsis ncaj ncees ntawm Yudas tsevneeg, Tamaj tau ua dabtsi?
– Qhov ntawd ua rau muaj teebmeem licas?
– Muaj lus ceebtoom twg rau peb thiab peb tsevneeg?
Tamaj paub hais tias Selas twb hlob tiav lawm tiamsis nws txivyawg tseem pheej tsis muab nws txis rau Selas yuav ua pojniam, nws thiaj tuav tau ib lub tswvyim yuam kom Yudas yuav tsum ua qhov no. Thaum paub tias Yudas tuaj txiav plaub yaj hauv lub nroog Teenas, Tamaj txawm tuaj rau qhov ntawd, ua txuj ua li ib tug niam ntiav thiab mus nrog nws txivyawg pw, tus nqi yog ib tug tshis. Vim tsis tau coj tshis tuaj, Yudas tau muab nws lub homthawj uas muaj txoj hlua thiab tus pas nrig rau Tamaj khaws ua puavpheej (nqe 12-19). Tomqab ntawd, thaum Yudas tso nws tus phoojywg coj tus tshis tuaj txhiv tej khoom coglus ces nrhiav tsis pom tus niam ntiav ntawd lawm (nqe 20-23).
Pom tau hais tias, kev phem hauv Yudas cuabyig yim hnub yim huamvam zuj zus thaum Yudas mus nrog niamntiav pw, tshuav tus nyab Tamaj ua txhua yam kom tau raws li nws lub homphiaj. Thiab ib zaug ntxiv peb pom hais tias kev txhaum xeeb kev txhaum ntxiv thaum Yudas dag Tamaj ua rau Tamaj rov dag Yudas, thiab thaum kawg, ob tug ua txhaum pw ua ke (nqe 14-19). Kev txhaum tseem ua rau muaj kev puastsuaj (Yakaunpaus 1:14-15). Peb lub hli tomqab, thaum paub tias Tamaj muaj menyuam, Yudas tau hais kom coj Tamaj mus hlawv kom tuag, thiab thaum ntawd Tamaj mam qhia qhov tseeb kom dim kev tuag (nqe 24-26). Kev txhaum uas zais cia tau nthuav tawm, Yudas thiab Tamaj lub koob npe puavleej raug thuam.
Zaj xwm nyuaj siab thiab tsaus ntuj nti hauv Yudas tsevneeg ceebtoom ib zaj tseemceeb, ntawd yog leejtwg los kuj txawj ua txhaum, txawm yog tus ntawd yuav yog ib tug yug hauv yawgkoob Anplahas, Ixaj, Yakhauj tsevneeg. Yog li ntawd, tsis txhob saib yau hwjchim ntawm kev txhaum (Pajlug 14:9). Tej zaug Tamaj xav hais tias nws lub tswvyim yog ntse, thiab tej zaug nws tsuas xav yug menyuam twjywm kom yuam tau Yudas muab tej cuab txheej cuab tam rau nws. Yudas kuj xav hais tias nws lub tswvyim yog ntse, tiamsis los ntawm nws kev tsis quavntsej, tsis hlub tus nyab tau nthuav tawm nws txojkev txhaum. Tagnrho Yudas tsevneeg puavleej raug them nqi rau nyias tej kev txhaum.
Ntawd kuj yog ib lo lus ceebtoom rau peb lub cuabyig, vim thaum ua txhaum, peb kuj xav hais tias peb muaj peevxwm zais tau thiab tswj taus kev txhaum, tiamsis kev txhaum yeej yuav raug nthuav tawm thiab yuav raug txiav txim. Vajtswv yog tus ncajncees thiab txhua tus yuav tau txais raws li tej uas nyias tau ua los lawm (Pajlug 14:14; 23:17).
Thov Vajtswv,
Tus Tswv, thov zamtxim rau nyuam yaus tej kev ruam vim ntau zaug tsis saib hlob teebmeem ntawm kev txhaum thiab ua txhaum rau Koj. Thov pab nyuam yaus zeem paub kev txhaum muaj peevxwm nkag rau nyuam yaus tsevneeg, thiab thov pab nyuam yaus txawj ua neej hwm Koj. Nyuam yaus tuav Yexus Khetos lub npe thov, Amees.
Peb tabtom muaj yam kev txhaum zais ntshis twg? Peb yuav tsum txiav txim siab licas?
Nyeem Vajluskub hauv peb lub xyoo: Pajlug 7
Kênh Youtube BHKTHN:
