Klei Aê Diê Blŭ: Klei Mphŭn Dơ̆ng 38:12-26
Êlan kliăng: “Yêsu lŏ wĭt lač kơ diñu, “Kâo lač kơ diih klei sĭt nik, grăp čô hlei pô ngă soh jing hlŭn kơ klei soh.” (Y-Yôhan 8:34)
Klei êmuh ksiêm mĭn: Čiăng bi wĭt kơ klei gŏ sang Y-Yuđa luar, amâo bi sĭt klei ƀuăn, ya klei H’Tamar ngă leh? Ya boh tŭ truh mơ̆ng klei ngă anăn? Mâo mơ̆ klei hưn êlâo brei răng kơ drei leh anăn kơ gŏ sang drei?
H’Tamar thâo Y-Sêla anak êkei kluč prŏng leh ƀiădah kmha ñu amâo čiăng brei gơ̆ jing mô̆ kơ Y-Sêla ôh, snăn gơ̆ mkra hdră čiăng mgô̆ Y-Yuđa bi sĭt klei ñu ƀuăn leh. Tơdah thâo Y-Yuđa nao ti ƀuôn Timna čiăng kăp mlâo biăp, H’Tamar nao tinăn mtam, mgưt ngă sa čô mniê knhông leh anăn dôk hŏng kmha pô hŏng ênoh sa drei êđai bê, kyuadah amâo djă bê snăn Y-Yuđa brei krah, klei, leh anăn giê ngă mnơ̆ng ƀuăn (êlan 12-19). Êdei tinăn, tơdah ñu yua pô ba êđai bê čiăng lŏ mă wĭt mnơ̆ng ƀuăn, arăng duah amâo lŏ ƀuh mniê knhông anăn ôh (êlan 20-23).
Dưi ƀuh klei hroh trŭn knhuah kpă hlăm gŏ sang anei ƀrư̆ hruê ƀrư̆ đĭ hĭn êjai, hlăk Y-Yuđa dôk hŏng mniê knhông, bi H’Tamar mtâo mniê ñu ăt kăn uêñ duah mnêč khă bi dưi mâo klei ñu kñăm čiăng. Leh anăn lŏ sa blư̆ dơ̆ng drei ƀuh klei soh atăt kơ klei soh, tơdah Y-Yuđa mplư H’Tamar atăt kơ klei H’Tamar lŏ wĭt mplư ñu, leh anăn ti knhal tuč jih diñu dua ngă klei knhông hdơ̆ng diñu (êlan 14-19). Klei soh ăt lŏ atăt truh kơ klei rai tuč (Y-Yakơ 1:14-15). Tlâo mlan êdei, tơdah thâo H’Tamar ba tian, Y-Yuđa mtă brei arăng čuh hdĭp gơ̆, leh anăn hlăk anăn kơh H’Tamar hưn mdah klei hgăm čiăng mgang klei hdĭp gơ̆ pô (êlan 24-26). Klei soh mdăp hgăm bi êdah leh, knuih kơhưm Y-Yuđa wăt H’Tamar jing klei hêñ mlâo sơăi.
Klei yăl dliê ênguôt dhuôt leh anăn mmăt tĭt hlăm gŏ sang Y-Yuđa bi êdah sa klei hưn êlâo brei răng ktang tĭt, djăp pô dưi lĕ hlăm klei soh sơăi, wăt sa čô mnuih msĕ si Y-Yuđa, kkiêng mơ̆ng găp djuê phung aê đưm Y-Abraham, Y-Isăk, Y-Yakôp. Kyuanăn đăm dlăng hơăi mang ôh klei dưi ktang mơ̆ng klei soh (Klei Bi Hriêng 14:9). Năng ai H’Tamar mĭndah mnêč ñu ngă jing thâo mĭn, leh anăn năng ai ñu knŏng mĭn kkiêng anak kriêp hjăn čiăng mgô̆ Y-Yuđa bi sĭt klei ƀuăn, leh anăn lŏ sua wĭt klei dưi dưn ala lăn. Y-Yuđa ăt mĭndah hdră ñu ngă jing thâo mĭn mơh, ƀiădah kyua klei ñu ngă amâo mâo klei khăp ôh kơ mtâo mniê ñu pô snăn yơh lŏ bi êdah klă klei soh ñu ngă. Jih jang sang Y-Yuđa tla ênoh kơ klei soh diñu pô ngă sơăi.
Anei ăt jing sa klei hưn êlâo brei răng ktang snăk kơ gŏ sang drei, kyua tơdah leh ngă soh, jih jang mĭndah dưi mdăp hgăm leh anăn dưi kiă krơ̆ng klei soh, mbĭt anăn dưi tlaih mơ̆ng boh tŭ jhat, ƀiădah klei soh srăng bi êdah nanao leh anăn mâo klei bi kmhal kơ ñu. Aê Diê jing kpă ênô leh anăn grăp čô mnuih srăng mă tŭ tui si klei năng hŏng ñu mă tŭ (Klei Bi Hriêng 14:14; 23:17).
Ya klei soh drei dôk mdăp? Ya klei brei drei čuăn ngă?
Wah lač: Ơ Khua Yang, pap brei kơ klei mluk mgu kâo kyuadah lu blư̆ kâo dlăng hơăi mang boh tŭ jhat mơ̆ng klei soh, leh anăn ngă soh hŏng Khua Yang. akâo Khua Yang brei kâo thâo kral klei jhat kjham mơ̆ng klei soh dưi bi hmăi truh kơ gŏ sang kâo, leh anăn đru kâo dôk hdĭp huĭ mpŭ kơ Khua Yang nanao. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Bi Hriêng 7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
