Mathais 26:36-46
Nqe cim:
“Cov kwvtij, vim peb cov uas ntseeg peb tus Tswv Yexus Khetos thiab vim Vaj Ntsujplig twb ua rau peb txawj sib hlub lawm, yog li ntawd kuv thov nej kub siab lug thov Vajtswv pab kuv.” (Loos 15:30)
Lus nug rau sawvdaws xav:
– Hmo uas yuav raug ntes, Tswv Yexus muaj qhov kev nyuaj dabtsi?
– Nws thov Vajtswv zoo li cas?
– Peb kawm tau dabtsi los ntawm Yexus tus qauv kub siab lug thov Vajtswv?
Hmo uas raug Yudas Ixakali-us ntxeev siab, cov thwjtim muab tso tseg, thiab yuav raug ntsia saum ntoo khaublig, Tswv Yexus muaj kev nyuaj siab heev, Nws “ntxhov siab kawg li”. Tus Tswv yuav ris neeg ntiajteb tej kev txhaum saum ntoo khaublig, nws xav kom muaj cov thwjtim txhawb zog lub sijhawm ntawd. Thiab Nws paub hais tias yuav tau kub siab lug thov Vajtswv, tshwjxeeb yog ib leeg thov Vajtswv pab rau ib leeg. Tiamsis qhov kev xav ntawd tsis muaj!
Vim li cas peb tug thwjtim uas nrog nraim Yexus tseem pw tsaug zog ncaws nruj nris thaum Tswv Yexus raug kev nyuaj siab thiab ib leeg thov Vajtswv? Nqe lus teb, yog lawv tsis zeem paub thiab tsis hmov tshua txog tej uas yuav tshwmsim rau lawv tus xibhwb, thiab yog lawv txojkev qaug zog sab nqaij tawv (nqe 41). Tus Tswv coj Nws peb tug thwjtim mus nrog Nws thov Vajtswv, los lawv tseem tsis muaj lub siab kub lug thov Vajtswv, cia tus Tswv ib leeg thov xwb! Tswv Yexus kub siab lug thov Vajtswv mus txog qib uas “hws nrog ua ntshav” (Lukas 22:44). Sab kev kho mob muab qhov no hu ua tus mob hws ntshav thaum ib tug neeg ntsib kev nyuaj siab kawg nkaus. Nws thov Vajtswv sijhawm ntev loo thiab zoo li thov mus thov los lus qub (nqe 40, 44)! Tus uas sau tsab ntawv Henplais qhia paub: “Thaum Yexus tseem nyob hauv ntiajteb no, Nws thov Vajtswv tus uas pab tau kom Nws dim kev ploj kev tuag. Thaum Nws thov Nws quaj thiab los kua muag kawg li. Vajtswv mloog Nws tej lus thov, rau qhov Nws txo Nws lub hwjchim thiab muab Nws txojsia tso plhuav rau Vajtswv kav.” (Henplais 5:7). Thaum siv zog thov Vajtswv, thawj zaug thiab kuj yog zaum kawg, Nws lub siab nyiam txawv Leej Txiv lub siab nyiam! Qhov ntawd qhia paub lub txim ntawm txojkev txhaum txaus ntshai kawg nkaus li! Tus Tswv tsis yog kub siab lug thov Vajtswv hauv lub vaj Khexemanes xwb, tiamsis ua ntej ntawd Nws twb siv sijhawm ntev loo los thov Vajtswv pab rau Nws cov menyuam kom ua tau zoo thiab koom tau ua ke (Yauhas 17). Thiab los txog rau tiam no, tus Tswv tseem tabtom thov Vajtswv pab rau peb txhua tus: “Nws nyob ntawm Vajtswv sab xis thiab thov Vajtswv pab peb.” (Loos 8:34); thiab “Twb yog vim li ntawd, Nws thiaj pab tau cov neeg uas Nws coj los cuag Vajtswv, tsis hais nimno lossis yav tom ntej, rau qhov Nws muaj sia nyob mus ibtxhis thiab thov Vajtswv pab cov neeg ntawd.” (Henplais 7:25).
Tswv Yexus, yog Vajtswv tus Tub, Nws twb kub siab lug thov Vajtswv mus xaus kiag lub neej hauv ntiajteb, peb yog cov neeg txhaum ua tsis zoo tiamsis peb tseem tsis thov Vajtswv lossis thov kom tas cai es xav tias txaus lawm ces tsis tau! Tswv Yexus twb tseg tus qauv rau peb kawm xyaum, thov Vajtswv yog thov tsis tso tseg.
Thov Vajtswv,
Leej Txiv tus uas muaj kev hlub! Thov Koj pab kom nyuam yaus paub ceevfaj thiab thov Vajtswv thiaj tsis poob rau kev sim siab, kawm xyaum Tswv Yexus tus qauv kub siab lug thov Vajtswv mus txog thaum kawg! Nyuam yaus tuav Tswv Yexus lub npe thov, Amees.
Thaum ntsib teebmeem hauv lub neej, peb yuav tsum kub siab lug thov Vajtswv zoo li cas?
Nyeem Vajluskub hauv peb lub xyoo: I Vajntxwv 2
Kênh Youtube BHKTHN:
