Klei Aê Diê Blŭ: Y‑Mathiơ 26:36-46
Êlan kliăng: “Ơ phung ayŏng adei, hŏng Khua Yang drei Yêsu Krist leh anăn hŏng klei khăp mơ̆ng Yang Mngăt Jăk, kâo kwưh kơ diih đru bi blah mbĭt hŏng kâo hŏng klei diih wah lač kơ Aê Diê kyua kâo,” (Rôm 15:30)
Klei êmuh ksiêm mĭn: Hlăm mlam arăng jao, ya klei rŭng răng Khua Yang găn? Si Khua Yang wah lač leh? Ya klei hriăm kơ drei mơ̆ng klei Khua Yang bi hmô bi blah hlăm klei wah lač?
Hlăm mlam Y‑Yuđas Iskariôt lhiăr kơ Khua Yang, phung ƀĭng kna lui Ñu, leh anăn Ñu dơ̆ng tŭ klei arăng pơ̆ng msei kđĭn, Khua Yang Yêsu tuôm hŏng klei rŭng răng prŏng, Ñu “ênguôt leh anăn rŭng răng snăk”. Khua Yang dơ̆ng klam klei soh phung mnuih ti dlông kyâo bi kal tơl Ñu čiăng kah mbha jih jang klei rŭng răng anăn hŏng phung ƀĭng kna Ñu. Leh anăn Ñu thâo săng, čiăng snăk bi blah hlăm klei wah lač, boh nik nak wah lač hrăm mbĭt. Ƀiădah lĕ, klei Khua Yang hmăng hmưi anăn amâo jing ôh!
Si ngă tlâo čô ƀĭng kna Ñu khăp hĭn dưi pĭt jăk êjai Khua Yang Yêsu dôk rŭng ênguôt tơl hnơ̆ng leh anăn bi blah hjăn păn hlăm klei wah lač? Klei wĭt lač jing klă leh, diñu amâo thâo săng leh anăn amâo mđing uêñ ôh klei srăng truh kơ nai diñu pô, leh anăn wăt klei awăt hlăm kđeh diñu mơh (êlan 41). Khua Yang čŏng iêô hjăn tlâo čô čiăng wah lač mbĭt hŏng Ñu, ƀiădah diñu ăt kăn mâo ai tiê klei mĭn bi blah leh anăn lui Khua Yang wah lač hjăn păn! Khua Yang Yêsu bi blah leh hlăm klei wah lač tơdah “êa kơhŏ Ñu jing msĕ si kdrah êrah” (Y‑Luk 22:44). Bruă êa drao pia anăn jing klei bi knăl êa kơhŏ êrah (Hematidrosis) tơdah sa čô mnuih tuôm hŏng klei rŭng răng tơl hnơ̆ng. Khua Yang wah lač lu mmông leh anăn msĕ si knŏng lŏ mñă klei wah lač (êlan 40, 44)! Pô čih hră Hêbrơ lŏ brei thâo: “Êjai Ñu dôk hdĭp hlăm asei mlei, Yêsu wah lač leh anăn kwưh hŏng klei ur ktang leh anăn hŏng êa ală kơ Pô dưi bi mtlaih Ñu mơ̆ng klei djiê; leh anăn Aê Diê hmư̆ Ñu leh kyua Ñu huĭ mpŭ kơ Aê Diê.” (Hêbrơ 5:7). Êjai bi blah hlăm klei wah lač, tal êlâo hĭn leh anăn ăt jing tal knhal tuč mơh, klei Khua Yang čiăng mdê hŏng klei Ama Ñu čiăng! Klei anăn brei ƀuh klei soh kjham kjhuê̆ êdimima! Khua Yang amâo knŏng wah lač bi blah hlăm war djam Gêtsêmanê ôh, ƀiădah êlâo kơnăn Khua Yang ăt wah lač sui snăk kơ klei klă kluôm leh anăn bi mguôp sa ai kơ phung biăp Ñu (Y‑Yôhan 17). Leh anăn tơl truh kơ hruê anei, Khua Yang ăt adôk bi blah hlăm klei wah lač brei kơ grăp čô drei: “…Pô dôk tĭng hnuă kơ Aê Diê leh anăn đru wah lač brei kơ phung drei.” (Rôm 8:34); leh anăn “Kyua anăn Ñu dưi bi mtlaih hlŏng lar phung nao giăm Aê Diê hlăm Ñu, kyuadah Ñu dôk hdĭp nanao đru wah lač brei kơ digơ̆.” (Hêbrơ 7:25).
Khua Yang Yêsu, Anak Aê Diê bi blah leh hlăm klei wah lač tơl truh mnĭt mmông knhal tuč ti lăn ala, bi drei, jing phung mnuih soh amâo klă kluôm, ƀiădah lĕ amâo wah lač ôh, amâodah knŏng wah lač mă khă bi leh bruă, mĭndah msĕ snăn djăp ênŭm leh yơh! Khua Yang Yêsu brei leh kơ drei sa klei bi hmô čiăng kơ drei tui hlue kru Ñu, bi blah amâo mdei ôh hlăm klei wah lač.
Dôk ti anăp klei dleh dlan hlăm klei hdĭp, si drei bi blah leh hlăm klei wah lač?
Wah lač: Ơ Ama khăp hơiêng! Brei kâo dôk răng leh anăn wah lač nanao, čiăng kơ đăm dluh lĕ hlăm klei mplư, mbĭt hŏng klei anăn brei kâo tui hriăm klei Khua Yang Yêsu bi hmô bi blah hlăm klei wah lač tơl truh knhal tuč! Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Bruă Mtao 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
