II Hơ’mon 30:1-6
“Inh pôm đon hăm lu sư păng ba pôm đon dih băl, wă kơ lu sư pôm đon tơduă lu sư mơ̆n; na lu bơngai ala teh âu băt kơ Ih wơh Inh tơpă păng lu bơngai ala teh gô băt kơ Ih ‘mêm kơ lu bơngai pơhrăm păng Inh, noh kư̆m thoi Ih ‘mêm kơ Inh mơ̆n.” (Yôhan 17:23)
Nơ̆r jet tơchĕng pơwao:
– Pơtao Hesekia hơpơi ‘maih wă tơdrong kiơ?
– Pơtao đei pơm tơdrong noh thoi yơ?
– Lu bơ̆n kăl kơ pơm tơdrong kiơ wă kơ hŭt lê̆ tơdrong ưh kơ hiôk hăm lu ‘nhŏng oh na wang hơdai kơkuh kơ Kră Yang ‘Bok Kei-Dei?
Đơ̆ng rŏng kơ hnam akŭm đei pơyơ̆r kơ Kră Yang ‘Bok Kei-Dei, pơtao Hesekia ‘maih wă kơ đĭ đăng kon pơlei Israel đơ̆ng gah tu năm tơ gah dêh Juđa tơ gah bơbah wă pơjing phĕt năm brih yua kơ đunh dêh bơih kon pơlei ưh kơ pơm phĕt mă lơ bơngai kiơ̆ kơ đei chih lăm Sơ̆p hla bơar khôi juăt Kră Yang (trong 5). Bơ̆n đei ƀôh tơdrong tơchĕng kơ pơm phĕt năm brih đei krao wơ̆n kon pơlei đơ̆ng gah tu hăm gah bơbah đei pơlơ̆k lơ wơ̆t lăm chăl mă đei đŏk ‘nâu. ‘Bok pơtao đei wơh bơngai khan kơ “đĭ đăng lu bơngai Israel păng Juđa” (trong 1), Pơtao kŭm chih hla bơar ăn kơ lu bơngai Epraim păng Manase, lu sư jơ̆ lăm adrĕch lu bơngai Israel mă đei lơ bơngai na krao wơ̆n lu sư pơm phĕt năm brih. Pơtao hăm lu ƀok Kuan hăm đĭ lu kon pơlei Juđa đei pơm phĕt năm brih lăm khei mă ‘bar tơplih kơ khei mă mônh kiơ̆ kơ lăm khôi juăt yua kơ đei dôm tơdrong pơgăn păng lu sư “đei roi tơbăt kơ đĭ lăm dêh char Israel, đơ̆ng Bêesêba truh tơ Đan” (trong 5) noh jơ̆ ‘bar tŏ pơlei gah bơbah hăm gah tu lăm dêh Israel. Đơ̆ng noh, lu sư đei ba kơ thơ ƀok pơtao hăm lu bơngai pơgơ̆r năm ba tơjơ̆p kơ dêh char Israel păng Juđa đei nơ̆r krao wơ̆n đĭ đăng bơngai “athei wih tơ Kră Yang ‘Bok Kei-Dei…wă kơ Kră Yang ‘Bok Kei-Dei đei lăng lăi lu bơngai oei pă tŏ sĕt lăm lu bơ̆n…” (trong 6). Mă ‘bar tŏ teh đak đei lơ tơdrong ưh kơ hiôk đei gơnăm băl ră, mă lei Kră Yang oei lăng măr sư nhen thoi ‘nhŏng oh minh pôm ‘Bă, noh jơ̆ lu sư bơih kon pơlei ‘Bok Kei-Dei, Pơtao Hesekia hlôh lăm jơhngơ̆m Kră Yang na sư wă kơ minh jơhngơ̆m đon lăm tơdrong lui, păng wă kơ đĭ đăng kon pơlei kơ kuh kơ Kră Yang ‘Bok Kei-Dei dơ̆ng yua kơ đei đunh sơnăm bơih lu sư kơ kuh kơ rup yang.
Ưh kơ đei tơdrong hiôk kiơ hloh kơ kon pơlei pơla minh jơhngơ̆m đon, Kră Yang Yêsu đei krao khan kơ lu bơngai pơhrăm păng sư “wă kơ lu sư minh jơhngơ̆m đon nhen thoi Sư lăm Ƀă păng Ƀă lăm Sư” (Yôhan 17:21). Đơ̆ng minh jơhngơ̆m đon păng arih pơm kơdranh ăn kơ Kră Yang na đĭ đăng kon bơngai lăm teh đak gô băt kơ Kră Yang ‘Bok Kei-Dei păng Kră Yang Yêsu noh jơ̆ đơ̆ng ‘Bok Kei-Dei wơh, păng lu sư gô băt trong tơdrong dŏng pơklaih Kră Yang (Yôhan 17:3,21,23). Apinh Kră Yang ăn kơ bơ̆n hŭt lê̆ dôm tơdrong gơnam băl, dôm tơdrong mă ưh kơ drơ̆ng hơdai băl wă kơ đĭ đăng jing “minh jơhngơ̆m đon” . Kiơ̆ thoi kơmĭl đơ̆ng pơtao Hesekia, lu bơ̆n kăl kơ đĭ jơhngơ̆m tơgŭm bơngai đơ̆ng tu truh gah bơbah păng wă kơ đĭ đăng kon bơngai lăm teh đak wih brŏk tơ sư. Đơ̆ng noh lu sư sơng iŏk ‘Bok Krist pơm ‘Bok dŏng pơklaih lăm chăl arih lu sư păng minh jơhngơ̆m đon lui lăm Kră Yang.
Ơ Kră Yang apinh ih ăn kơ inh đei jơhngơ̆m ‘mêm mơnat păng minh jơhngơ̆m đon hăm lu ‘nhŏng oh lăm Kră Yang. Apinh Ih ăn kơ inh đei jơhngơ̆m ba ăn kơ đĭ đăng bơngai ưh tam mă băt kơ Kră Yang wă kơ đei rai lơ bơngai minh jơhngơ̆m đon lăm tơdrong lui kơ Kră Yang Yêsu Krist. Yua anăn Kră Yang Yêsu Krist, Amen!
Lu bơ̆n hăm đei pơm tơdrong kiơ pơm kơ bơ̆n ưh kơ minh jơhngơ̆m đon hăm lu ‘nhŏng oh lăm Kră Yang ưh?
Đŏk Sơ̆p Hla bơar ‘Bok Kei-Dei lăm pêng sơnăm: Luka 12
Kênh Youtube BHKTHN:
