LĐ Êyiptơ 32:11-13
“Mă-lei Môis krao apinh hloi Kră Yang ‘Bok Kei-Dei sư khan, Ơ Kră Yang, liơ Ih ơh blĕk hil mĭl kơ kon pơlei pơla Ih, khul bơngai mă Ih đei chông tơlĕch bơih đơ̆ng char Êyiptơ hăm tơdrong mơsêh tih hăm ti pran kơtang Ih?” (LĐ Êyiptơ 32:11)
Nơ̆r jet tơchĕng pơwao:
– Kơplah Kră Yang ‘Bok Kei-Dei blĕk, ‘bok Môis pơm thoi yơ?
– Sư đei iŏk nơ̆r thoi yơ lăm tơdrong krao khan tơplih?
– Lu bơ̆n đei pơhrăm iŏk tơdrong kiơ lăm tơdrong krao khan tơplih đơ̆ng ‘bok Môis?
‘Bok Môis blĕk dêh kơ tơdrong răm ‘băm lăm lu bơngai Israel păng sư ‘băt kơ tơdrong blĕk đơ̆ng ‘Bok Kei-Dei, mălei ‘bok Môis ưh kơ kơdŭn kơplah sư mơ̆ng kơtơ̆ng tơdrong phak đơ̆ng Kră Yang ‘Bok Kei-Dei kơ lu bơngai Israel na sư kư̆ kơ krao khan tơplih kơ lu sư. Krao khan tơplih kơ bơngai mă bơ̆n ‘mêm dah bôl juăt bơ̆n noh jơ̆ minh tơdrong ‘bônh dêh, mălei krao khan kơ kon pơlei mă arăng kơ̆l, ưh kơ chu, đei pơm yoch tih hăm ‘Bok Kei-Dei, noh jơ̆ tơdrong phara. Athei pơ’lơ̆ng yua kơ phŏ kơnh bơ̆n dai hơdai hăm tơdrong yoch na bơ̆n lăng areh, lăng ưh kơ ai, hăm tơdrong mă bơ̆n ưh kơ đei tơchĕng wă krao khan tơgŭm sư.
Mă khan ‘Bok Kei-Dei đei sek tơlang ưh kơ wă kơ ‘bok Môis pơgăn (trong 10), mălei ‘bok Môis oei krao khan ‘bơ’bel apinh ‘Bok Kei-Dei mơnat kơ bơngai Israel. Tơpă ‘bok Môis ưh kơ pơ̆n pơm tơplơ̆ kơ tơdrong ‘Bok Kei-Dei wă, mălei sư “pơ̆n krao apinh tơplih” Kră Yang đĕch. Sư đei krao khan apinh yua kơ ‘bok Môis lui ngheh kơ ‘Bok Kei-Dei “Mălei, ơ Kră Yang! Ih boih Kră Yang ‘Bok Kei-Dei mă ‘mêm băt mơnat. Hiơ̆ kơ hil, ‘bĕnh kơ tơdrong ‘mêm păng tơdrong tơpăt sĭt” (Hơriso 86:15). Mă mônh, sư đei pơma dơnuh hăm ‘Bok Kei-Dei thoi âu, Israel noh jơ̆ “kon pơlei Ih” (trong 11). Lăm tơdrong mă ‘Bok Kei-Dei oei blĕk, ‘Bok Kei-Dei đei pơma khan kơ ‘bok Môis bơngai Israel noh jơ̆ “kon pơlei ih…” (trong 7), mălei ‘bok Môis pơma khan kơ ‘Bok Kei-Dei ưh ôh noh jơ̆ kon pơlei Ih, lu bơngai mă Ih rơih iŏk. Đơ̆ng rŏng kơ noh sư roi ‘Bok Kei-Dei bơih Tơ’ngla ‘bĕnh tơdrong mơsêh gơh dŏng pơklaih kon pơlei Sư păng Kră Yang bơih gơh pơm pơkeh nơ̆r Sư pơkă mă ‘lơ̆ng. ‘Bok Môis sư roi gah tơdrong ‘lơ̆ng rŏ ‘Bok Kei-Dei păng tơdrong pơkă sĭt Sư (trong 11-13). Thoi noh, dôm nơ̆r krao khan tơplih ‘bok Môis dan dôm nơ̆r sư noh kiơ̆ thoi ‘Bok Kei-Dei sư thoi yơ ưh kơ kiơ̆ kơ tơdrong sư băt đơ̆ng lăm kon pơlei pơla sư. Yua kơ sư băt kon pơlei ưh kơ đei tơdrong ‘lơ̆ng kiơ wă kơ đei tơdrong đơ̆ng Kră Yang mơnat. Dôm tơdrong mă đơ̆ng ‘Bok Kei-Dei đei ăn kơ kon bơngai bơ̆n noh tơm sư jơ̆ đơ̆ng dôm tơdrong ‘lơ̆ng Sư, tơdrong pơkă sĭt, păng tơdrong mơnat đơ̆ng Kră Yang. Tơdrong kăl lăm nơ̆r ‘bok Môis krao khan apinh noh jơ̆ chă dôm tơdrong ‘lơ̆ng rŏ lăm Kră Yang ‘Bok Kei-Dei păng tơdrong mơnat đơ̆ng Kră Yang ăn kơ lu bơngai Israel mă khan lu sư ưh kơ trŏ đei tơdrong mơnat bơih ră.
‘Bok Môis đei ăn kơ bơ̆n minh tơdrong kơmĭl lăm tơdrong krao khan tơplih. Mă khan sư ưh kơ đei yă kiơ kơplah sư krao khan tơplih kơ kon pơlei Israel, mă khan tơdrong krê hơmơt kơ tơdrong blĕk đơ̆ng ‘Bok Kei-Dei, păng hiong tơdrong jing bơngai mă pơjing adrĕch ‘nao plơ̆ng (trong 10), mălei yua kơ đon lui lăm Kră Yang ‘Bok Kei-Dei jơ̆ Tơ’ngla tơpăt sĭt, ‘mêm mơnat kơ lu kon pơlei Israel na sư đĭ jơhngơ̆m krao khan tơplih kơ lu sư.
Ơ Kră Yang, apinh Ih tơgŭm inh đei jơhngơ̆m ‘mêm mơnat thoi ‘bok Môis wă kơ inh adrin krao khan tơplih kơ lu ‘nhŏng oh năm lăm tơdrong wơ̆l jrok, păng đĭ lu bơngai hiong răm wă kơ lu sư gơh jing hiôk hơiă hăm ‘Bok Kei-Dei. Krao khan yua anăn Kră Yang Yêsu Krist, Amen.
Tơdrong kiơ pơgăn bơ̆n krao khan tơplih kơ bơngai nai?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Êsai 2
Kênh Youtube BHKTHN:
