Luka 18:1-8
“Pơma kơ kiơ kơ ‘Bok Kei-Dei Sư gô tơdŏng tơpă lu bơngai mă Sư đĭ rơih boih mă oei krao khan kơ Sư măng năr. ‘Bok Kei-Dei hăm ngê̆ gô đunh ưh!” (Luka 18:7)
Nơ̆r jet tơchĕng pơwao:
– ‘Bok sek tơlang lăm tơdrong pơtih gia Yêsu jô̆ kơ sư bơngai thoi yơ?
– Lĕch đơ̆ng jơhngơ̆m adrin yă adro noh kiơ?
– Kră Yang wă bơtho bơ̆n tơdrong kiơ đơ̆ng tơdrong pơtih gia ‘nâu?
Kră Yang Yêsu roi hơ’mon kơ lu bơngai pơhrăm păng Sư gah tơdrong pơtih gia ‘nâu wă pơlung lu sư athei “krao khan ling lang” păng “Huay kơ hăl” (trong 1). Yă adro lăm tơdrong hơ’mon ‘nâu sư oei tơ’bơ̆p đe jâu sư na sư kăl kơ ‘bok sek tơlang tơpăt. ‘Bok Luka đei tơbăt ‘bar wơ̆t khan ‘bok sek tơlang ‘nâu ưh kơ chu yom kơ Kră Yang ‘Bok Kei-Dei păng ưh kơ hli kơ đe (trong 2, 4). Kră Yang Yêsu tơbăt ‘bok sek tơlang ‘nâu bơngai ưh kơ ‘lơ̆ng ră (trong 16 BTTHĐ). Mă khan lei ră, ‘bôh ‘bok sek tơlang ưh kơ ‘lơ̆ng ră, mălei yă adro ‘nâu apinh ‘bơ’bel “apinh ‘bok sek tơlang tơpăt tơdrong đe jâu sư, mălei yă adro apinh ‘bơ’bel kư̆m đunh, ‘bok sek tơlang ưh kơ hiơ̆k. Mă khan đei lơ wơ̆t ‘bok sek tơlang ưh kơ wă tơgŭm sư, yă adro huay kơ hăl ôh, huay kơ achăng tŭk. Jơhngơ̆m adrin păng nơ̆r krao apinh trŏ na pơm kơ ‘bok sek tơlang ‘nâu pă gơh ĕnh bơih, sư hơhrah yua kơ yă adro apinh ‘bơ ‘bel na đei hloi kơ sư tơpă, ‘bok sek tơlang noh tơdŏng sư hloi.
Đơ̆ng rŏng kơ sư roi tơdrong pơtih gia ‘nâu, Kră Yang Yêsu đei tơ’bôh lơ tơdrong ‘lơ̆ng pơma ‘bơm kơ Sư păng ‘bơm kơ tơdrong lui. Kră Yang yua nơ̆r ‘bok sek tơlang ưh kơ tơpăt ‘nâu nhen thoi tơdrong pơtơm blŭng a wă pơma kơ tơdrong sek tơlang tơpăt ‘Bok Kei-Dei ‘măn kơ đe bu mă kơ “măng năr krao khan apinh Kră Yang”. ‘Bok sek tơlang lăm tơdrong pơtih gia ‘nâu minh ‘nu bơngai ưh kơ ‘lơ̆ng ưh kơ tơpăt, ưh kơ hiơ̆k dôm tơdrong yă adro kăl. Mălei tuch luch sư yua kơ yă adro adrin na sư kư̆m chu tơdŏng yă adro. Thoi noh, pơma kiơ kơ Kră Yang ‘Bok Kei-Dei ‘mêm mơnat păng tơpăt sĭt tơpă Sư gô tơl tơwih nơ̆r bơ̆n krao khan apinh tơpă, lu bơngai adrin krao khan apinh Kră Yang tơgŭm.
Tơdrong adrin yă adro ‘nâu đei pơtih kơ tơdrong lu bơ̆n adrin krao khan ưh kơ pơdơh (I Kôrintô 5:17). Krao khan tơgŭm bơ̆n tơplih lơ ‘biơ̆ păng tơplih lu bơngai jum dăr kơ bơ̆n. Krao khan adrin tơgŭm kơ bơ̆n kang lui gơnang kơ Kră Yang păng pơjao kơ Sư tôm tơdrong lăm đon lui wă kơ Sư pơgơ̆r. Noh bơih tơdrong mă yua kơ kiơ Kră Yang Yêsu pơtôch tơdrong hơ’mon lăm tơdrong pơtih gia hăm nơ̆r thoi âu: “Inh khan kơ iĕm tơpă, ‘Bok Kei-Dei gô tơdŏng hloi lu sư noh. Mă-lei lăp Inh Kon Bơngai jur dơ̆ng ning-mônh, Inh hăm oei ‘bôh lu bơngai lui dơ̆ng ưh kơnh lah?” (trong 8). Kră Yang wă tơ’blŏk kơ kon pơlei Sư athei adrin krao khan ding truh năr Kră Yang jur. Kră Yang kư̆m tơbăt tơdrong kăl wă đei jơhngơ̆m adrin păng băt gơnang kơ Kră Yang kơplah oei chang gô Kră Yang wă jur dơ̆ng, mă khan chăl arih tơ ala teh âu oei ‘bĕnh kơ tơdrong ưh kơ ‘lơ̆ng. ‘Bai pơhrăm ‘nâu wă pơlong lăng bơ̆n ưh kơ sĭ krao khan ling lang đĕch ôh, mălei athei gơnang kơ Kră Yang ling lang mă khan tơdrong ‘lơ̆ng mă bơ̆n oei chơ chă ưh kơ jah truh hloi.
Ơ Kră Yang, mă inh oei tơ’bơ̆p lơ tơdrong ưh kơ ‘lơ̆ng, pơlong lăng lăm chăl arih inh. Apinh Ih tơgŭm inh adrin krao khan, huay kơ hăl păng tơpăt lăm đon lui truh năr Ih jur dơ̆ng. Krao khan yua anăn Kră Yang Yêsu Krist, Amen.
Lu bơ̆n hăm ‘bônh kơ hăl ưh kơplah krao khan? ‘Bai pơhrăm ‘nâu đei tơ’blŏk kơ lu bơ̆n tơdrong kiơ?
Đŏk Sơ̆p Hla bơar ‘Bok Kei-Dei lăm pêng sơnăm: Êsai 35
Kênh Youtube BHKTHN:
