Êphêsô 6:14-20
“Păng bơ̆n ‘nĕ hiơt krao khan kơ ‘Bok Kei-Dei, wă kơ bơ̆n hưch-hanh kơ tơdrong krao khan ling lang, gô mơ̆ng kơ Yang Bơhngol ‘Lơ̆ng wă kơ bơ̆n krao khan tơdrong kiơ, krao khan tơgŭm băl tơduă lu kon ‘Bok Kei-Dei dah krao khan kơ tơdrong kiơ nai.” (Êphêsô 6:18)
Nơ̆r jet tơchĕng pơwao:
– Yang Bơhngol ‘Lơ̆ng đei tơdrong jang kiơ lăm tơdrong krao khan?
– Nơ̆r krao khan đei puăn tơdrong gĭt kăl ayơ?
– Lu bơ̆n ‘bôh kơdih akâu kăl kơ adrin tơdrong kiơ?
Tơdrong krao khan ưh kơ đei chih roi lăm tơmam tơblah ‘Bok Kei-Dei (trong 14-17). Mălei kăl kơ đei lăm tơdrong tơblah gah bơhngol. Hơmet tơmam tơblah ‘Bok Kei-Dei ưh kơ trŏ wă pơtrŏ đĕch, mălei bơ̆n athei tơ’bôh bơ̆n gah Kră Yang păng krao khan noh tơ’bôh rơđah tơpă. Krao khan bơih hơnă wă pơm kơ bơ̆n gơh hơmet tơmam tơblah gah bơhngol, dah chăl arih ưh kơ gơh jê̆ Kră Yang lăm tơdrong krao khan lei lu bơ̆n ưh kơ đei jơhngơ̆m pran wă tơblah hăm măng mu. Yă Corrie Ten Boom, minh ‘nu Bơngai Lui tơ pơlei Ha Lan arih lăm Bơsŭn anih Teh đak Đư̆k sư khan: “Kơplah minh ‘nu Bơngai Lui mă ưh kơ tơ’bưh hăm bơngai lui nai. Lei yang kơnê̆ sư hiĕk chhôk. Mưh bơngai noh ưh pă đŏk Nơ̆r ‘Bok Kei-Dei, yang kơnê̆ ôr re kang dêh.
Krao khan noh tơ’bưh hăm ‘Bok Kei-Dei. Thoi noh na athei ăn Yang Bơhngol ‘Lơ̆ng chông anhăk yua kơ Sư Yang băt ‘Bok Kei-Dei lăp đon păng tơgŭm lu bơ̆n krao khan kiơ̆ thoi ‘Bok Kei-Dei wă (Rôm 8:27). Nơ̆r krao khan kăl kơ đei puăn tơdrong gĭt thoi âu: Mă mônh “Hmă hmă sư” wă khan “ling lang” “khŏm khŏm” dah “rim jơ”. Đei lơ bơngai krao khan dah đei tơdrong anat truh, mălei krao khan ưh kơ trŏ kơ trong wă tơgŭm bơ̆n đei tơdrong anat noh đĕch ôh mălei noh wă kơ bơ̆n tơ’bưh hăm ‘Bok Kei-Dei păng lu bơ̆n athei ling lang krao khan yua kơ tơdrong tơblah hăm măng mu ưh kơ đei layơ tôch ôh.
Mă ‘bar, pơm tơ’bôh hloi “đei lơ tơdrong krao khan păng apinh: Đei lu mơ’nah wă kơ krao khan apinh dah krao apinh, mălei krao khan dai đei hơri păng kơkuh kơ Kră Yang (Mathiơ 6:9-10), pơih jơhngơ̆m kơ Kră Yang (II Samuel 7:27). Păng iung đơ̆ng hrôih tơ’blŏk kơ đon inh wă mơ̆ng nơ̆r Sư bơtho (Êsai 50:4).
Mă pêng, “Athei kral kơchăng” kơchăng ‘nâu bơih gĭt lăm tơdrong krao khan, Kră Yang Yêsu tơ’blŏk kơ lu bơngai pơhrăm păng Sư athei lu sư kral kơchăng wă huay kơ lui kơ yang satan pơhlŭ (Markôs 14:34-38). Lu bơ̆n athei kơchăng yua kơ lu bơngai ayăt kơ lu bơ̆n ưh kơ đei pơdơh ôh (I Pêtrôs 5:8). Păng yua kơ bơ̆n tep hiơt kơplah lu bơ̆n kăl kơ krao khan. Tơdrong kơchăng noh bơih pơm kơ bơ̆n kơjăp păng adrin krao khan.
Mă puăn, “Krao khan tơgŭm đĭ đăng bơngai lui.” Lu ‘nhŏng mŏ oh lăm đon lui oei dơ̆ng hơdai lăm tơdrong tơblah gah bơhngol hăm lu bơ̆n, păng đĭ đăng kơ lu bơ̆n kăl kơ krao khan tơgŭm dih băl ‘bôk Pôl kư̆m hơpơi khul bơngai lui krao khan tơgŭm sư (trong 19-20). Yua kơ sư băt kơdih akâu ưh kơ kĕ ôh wă tơblah hăm tơdrong kơnê̆ tơdah khul bơngai lui ưh kơ krao khan tơgŭm sư.
Ơ Kră Yang, inh bơnê kơ Ih, inh băt lu ‘nhŏng mŏ oh lăm bơngai lui ling lang krao khan tơgŭm inh. Apinh Ih tơgŭm inh kư̆m dai ‘blŏk kơ lu ‘nhŏng mŏ oh păng adrin krao khan tơgŭm lu sư. Krao khan yua anăn Kră Yang Yêsu Krist, Amen.
Lu bơ̆n hăm adrin, kơchăng păng krao khan tơgŭm dih băl ưh?
Đŏk Sơ̆p Hla bơar ‘Bok Kei-Dei lăm pêng sơnăm: Êsai 34
Kênh Youtube BHKTHN:
