Luka 11:1-13
“Na Yêsu khan: Iĕm krao khan thoi âu: ‘Ơ ‘Bă, ăn anăn Ih jing ư-ang. Ăn kơ dêh char Ih tĕnh truh.” (Luka 11:2)
Nơ̆r jet tơchĕng pơwao:
– Kră Yang bơtho lu bơngai pơhrăm păng Sư krao khan hăm ‘Bok Kei-Dei yua anăn ayơ?
– Anăn ‘nâu đei gĭt thoi yơ hăm bơngai krao khan?
– ‘Bai pơhrăm ‘nâu tơgŭm lu bơ̆n tơplih tơdrong kiơ lăm tơdrong krao khan?
Tơdrong gĭt kăl hloh kơplah krao khan băt kơnăl bơ̆n krao khan, lu bơ̆n krao khan hăm bu. Trŏ bơih krao khan hăm ‘Bok Kei-Dei. Mălei ‘Bok Kei-Dei mă bơ̆n oei krao khan noh Sư Yang thoi yơ? Yêsu bơtho lăm tơdrong krao khan (trong 1-4). ‘Bok Kei-Dei Sư bơih ‘Bă, păng lăm trong 13 Sư tơbăt hơđăl lăm tơdrong gĭt ‘nâu pă minh wơ̆t dơ̆ng. Buăl Sư ‘nâu lăm tơdrong pơtih gia đei pơgŏ ăn kơ buăl sư ‘bĕng wă pơjuăl sư, mălei Kră Yang ‘Bok Kei-Dei jơ̆ ‘Bă ‘mêm mơnat gô asong tơdrong ‘lơ̆ng hloh kơ kon pơlei Sư (trong 11-13). Bơngai chih hla bơar Hơriso 116:2 “Inh gô krao apinh Kră Yang đĭ chăl arih inh. Yua kơ Sư pơgling đon mơ̆ng inh.” ưh kơ sĭ Sư mơ̆ng inh krao khan đĕch, mălei “pơgling đon” tơ’bôh tơdrong Sư hiơ̆k bơngơ̆t.
Kră Yang ‘Bok Kei-Dei bơih ‘Bă, na lu bơngai mă krao khan noh lu kon pơlei Sư, thoi noh tơdrong krao khan noh bơ̆n lăng thoi tơdrong juăt pơma dơnuh dih băl lăm hnam dơnŏ ‘bă hăm kon. Bơ̆n jing kon Kră Yang bơih bơ̆n athei krao khan hăm Sư. ‘Nâu bơih tơdrong Yêsu krao pơtơm (Yôhan 16:24).
Kră Yang ‘Bok Kei-Dei bơih ‘Bă ‘mêm thoi noh na bơ̆n huay pă tơtăm kơ kiơ hli hlơt, pă ôn mưh krao khan hăm Sư. Bơngai apinh ‘bĕng noh băt kơdih kăl tơdrong kiơ păng năm akŭm apinh bôl buăl sư pêng tŏ ‘bĕng mi. Thoi lăm tơdrong pơtih gia kon sư apinh ‘bă sư ‘bĕng păng ka, noh tơmam sa trŏ kơ apinh (trong 11-12). Rim ‘nu kơ bơ̆n athei krao apinh Kră Yang tơdrong trŏ. Mă khan lei ră. Tơdrong noh ưh kơ trŏ wă pơgŏ Kră Yang athei Sư tơl tơwih kơ bơ̆n tơdrong bơ̆n apinh. Mălei yua kơ Sư bơih ‘Bă mă bơ̆n lui kơ Sư, lui ngeh Sư gô asong kơ bơ̆n tơdrong ‘lơ̆ng hloh.
Yua kơ ‘Bok Kei-Dei bơih ‘Bă thoi noh na lu bơ̆n athei apinh tơpă kơplah bơ̆n krao khan. Tơ’ngla hnam apinh buăl sư pêng tŏ ‘bĕng mi noh tơdrong trŏ kơ apinh. Jơhngơ̆m adrin na đei tơ’bôh tơdrong sư đei tơl tơwih hăm đei layơ bơ̆n krao khan na ưh kơ tơpăt tơpă wă kơ Kră Yang ăn kơ bơ̆n lăm tơdrong krao khan? ‘Bok Augustine jô̆ minh ‘nu bơngai đe băt kơ sư minh ‘nu bơngai đei đon lui tih, đei tơbăt kơplah sư oei ‘lơ̆p sơ̆, mưh pơm tơdrong ‘lơ̆ng, na sư hơpơi rŏ kơ pơm tơdrong kơnê̆; păng kơplah pơm tơdrong kơnê̆, na sư kư̆m hơpơi rŏ kơ pơm tơdrong ‘lơ̆ng! Sư roi kơplah sư krao khan: “Ơ Kră Yang apinh Ih pơm kơ inh ‘lơ̆ng rơgoh; apinh Ih pơm kơ inh ‘lơ̆ng rơgoh” đơ̆ng noh sư pơma thim dơ̆ng: “Mălei ưh kơ trŏ kơ jơ ‘nâu, tam mă ôh! “ ‘Bok Augustine oei krao khan apinh Kră Yang tơgŭm sư mălei ưh kơ wă Kră Yang tơl jơ noh. Rim ‘nu kơ lu bơ̆n kăl kơ krao khan apinh Kră Yang tơplih jơhngơ̆m bơ̆n wă kơ bơ̆n rơhing tơpă tơdrong Kră Yang wă kơ lu bơ̆n pơm.
Ơ Kră Yang, inh bơnê kơ Ih ăn kơ inh jing kon Ih. Bơnê kơ Ih ling lang ‘mêm kơ inh păng mơ̆ng nơ̆r inh krao khan. Bơnê kơ Ih yua kơ Ih ling lang ‘lơ̆ng tơpă păng ăn kơ inh tơdrong ‘lơ̆ng hloh kiơ̆ thoi Ih lăp đon. Krao khan yua anăn Kră Yang Yêsu Krist, Amen.
Kră Yang ‘Bok Kei-Dei bu păng đei tơ’bưh kiơ hăm lu bơ̆n?
Đŏk Sơ̆p Hla bơar ‘Bok Kei-Dei lăm pêng sơnăm: Êsai 32
Kênh Youtube BHKTHN:
