Krao Apinh Kră Yang Kơplah Đei Tơdrong Truh – 4/7/2025

II Samuel 22:1-7, 17-20

Kơkuh kơ đĭ đăng bơngai mơ̆ng,

Năr ‘nâu lu bơ̆n gô tơchĕng pơwao ‘bai pơhrăm đei kơ̆l ‘bai: Krao Apinh Kră Yang Kơplah Đei Tơdrong Truh kiơ̆ kơ Sơ̆p Hla bơar ‘Bok Kei-Dei II Samuel 22:1-7, 17-20.

¹ Pơtao Đawit pơyơ̆r kơ Kră Yang lu nơ̆r hơri ‘nâu, đơ̆ng rŏng kơ Kră Yang dŏng pơklaih sư đơ̆ng ti bơngai ayăt păng đơ̆ng ti pơtao Sôl. ² Pơtao hơri: “Kră Yang jơ̆ kông tơmo păng kơđông kơjăp inh, Tơ’ngla dŏng pơklaih inh! ³ Kră Yang ‘Bok Kei-Dei jơ̆ kông tơmo anih inh gơnang jơ̆ khêl pĕng inh, hơke dŏng pơklaih inh, hnam Thôt kơjung kơjăp anih inh gơ’nơp; Tơ’ngla dŏng pơklaih! Ih boih dŏng inh đơ̆ng bơngai pơm kơnê̆. ⁴ Ơ Kră Yang, inh hơri ư-ang kơ ih; inh krao apinh Ih, na inh gơh klaih đơ̆ng lu bơngai ayăt kơ inh. ⁵ Tơdrong lôch thoi đak dơsĭ poh-yă wang tăp dăr kơ inh, tơdrong lôch thoi chơkơi đak huơ̆r pơdăr răp lê̆ tơ noh boih. ⁶ Tơlei anih lôch wăr tăp kơ inh, hơđong tơdrong lôch oei răp inh. ⁷ Lăm tơdrong truh pơmat inh krao apinh Kră Yang. Inh ôr krao Kră Yang ‘Bok Kei-Dei inh, đơ̆ng anih hnam Kră Yang kơtơ̆ng nơ̆r inh krao ôr, Ih pơgling đon mơ̆ng inh krao apinh.

¹⁷ Đơ̆ng plĕnh kơjung Kră Yang chro ti rôp iŏk inh, dui hơtŏk inh đơ̆ng đak jrŭ. ¹⁸ Kră Yang dŏng pơklaih inh đơ̆ng lu bơngai ayăt pơm kơtang dêh. Hlôi kơ đơ̆ng lu bơngai areh kơ inh, yua kơ lu sư pran hloh kơ inh. ¹⁹ Lăm năr truh kơ inh pơmat-tat lu sư bruh tơ inh. Mă-lei Kră Yang dŏng tơgŭm inh. ²⁰ Kră Yang dui anhăk inh lĕch tơ anih rơhơi, Sư dŏng pơklaih inh yua kơ Sư ‘mêm kơ inh.

Trong tơm ‘bai pơhrăm ‘nâu:

“Lăm tơdrong truh pơmat inh krao apinh Kră Yang. Inh ôr krao Kră Yang ‘Bok Kei-Dei inh” (II Samuel 22:7a)

Nơ̆r jet tơchĕng pơwao:

– Pơtao Đawit đei hlôi tơ’bơ̆p tơdrong truh ayơ lăm chăl arih?

–  Pơm liơ đei tơgŭm sư hlôi đơ̆ng tơdrong truh noh?

– Kon pơlei Kră Yang kăl kơ pơm kiơ wă kơ kĕ jei lăm tơdrong tơblah gah bơhngol ‘bĕnh hăm tơdrong anat anot truh tih?

Kơkuh kơ đĭ đăng,

II Samuel 22 kư̆m đei chih lăm Hơriso 18, ‘bai hơri pơtao Đawit kơkuh ư-ang kơ Kră Yang yua kơ Sư đei dŏng pơklaih đơ̆ng lu ayăt. lu nơ̆r blŭng a lăm ‘bai hơri đei chih roi mơn đêl sư đei dŏng pơklaih kơplah đei tơ’bơ̆p lu ayăt thoi yơ noh. Adrol kơ pơm pơtao, lơ ‘măng pơtao Sôl chă wă pơlôch sư. Đĭ khei sơnăm pơgơ̆r, pơtao Đawit ling lang tơblah hăm lơ lu ayăt đơ̆ng rim adrĕch adrung phara pha. Sư chih roi lu ayăt năm blah sư thoi “Kial hơbŭt tơdrong lôch” “tơdrong kơnê̆ thoi đak lơ̆p” “tơlei dơnâu ŭnh”, “hơnhuăl tơdrong lôch” wang dăr sư. (trong 5-6). Lăm năr đei tơdrong gleh glăn pơmat tat, sư ling lang băt lui gơnang păng krao apinh lăp minh Kră Yang ‘Bok Kei-Dei đĕch (trong 7). Sư hơri bơnê kơ Kră Yang ‘Bok Kei-Dei yua kơ Sư đei dŏng pơklaih. Tơpăt sư mơn đêl Kră Yang  jơ̆ “tơmo tih” păng “kơđông kơjăp” păng thoi “khêl pĕng tang” “kông kơjung păng anih gơnang” ‘bok Đawit (trong 2-3). Lăm năr anat anot păng pơmat tat, sư băt krao apinh Kră Yang jơ̆ “Tơ’ngla trŏ kơ hơri bơnê kơkuh” (trong 4 BTTHĐ).

Pơtao Đawit bơnê kơ Kră Yang, yua kơ Sư mơ̆ng dôm nơ̆r sư krao apinh (trong 7b). Đơ̆ng kơpal plĕnh ti, Kră Yang chro ti rôp kơjăp păng dui hơtŏk sư đơ̆ng sơlŭng jrŭ. Mă khan lu ayăt pran hloh ră, mălei sư đei Kră Yang ‘Bok Kei-Dei mơ̆ng păng lăng tông, pôk pơng glơng hơtŏk păng dŏng pơklaih (trong 17-20). Mă khan pơtao Đawit jơ̆ minh ‘nu bơngai nuih kơtang, pơtao tơblah, mălei sư ưh kơ pơang jơhngơ̆m kơdih, gơh hơgei păng jơhngơ̆m kơdih, mălei sư ling lang lui gơnang kơ jơhngơ̆m, tơdrong gơh hơgei păng tơdrong dŏng pơklaih đơ̆ng Kră Yang ‘Bok Kei-Dei. Sư băt tơpă, dôm tơdrong sư kĕ jei noh tă kơ đơ̆ng Kră Yang ngăl. Sư gơh pơm tôm tơdrong wă kơ kĕ jei noh đơ̆ng Kră Yang. Pơm liơ wă kơ gơh kĕ jei hlôi đơ̆ng gleh glăn pơmat tat ‘noh jơ̆ yua đơ̆ng krao khan. Păng ‘bôh nhen hơđăl Kră Yang ‘Bok Kei-Dei  arih ling lang ưh kơ layơ hiơt kơ sư, Sư ling lang mơ̆ng dôm nơ̆r sư krao apinh kơplah đei tơdrong pơmat tat. Pơtao Đawit đei chih iŏk dôm tơdrong đêl sư mơn kơdih thoi âu: “Lăm năr pơmat tat, inh krao apinh Kră Yang ‘Bok Kei-Dei. Inh krao apinh ‘Bok Kei-Dei inh. Tơ hnam ‘lơ̆ng rơgoh, Sư mơ̆ng nơ̆r inh krao khan. Nơ̆r inh krao apinh truh tơ đon Sư kơtơ̆ng.” (trong 7 BTTHĐ).

Kon pơlei Kră Yang rim năr ngăl tơ’bơ̆p hăm tơdrong tơblah gah bơhngol. Yang kơnê̆ măng năr chop răp wă blah lu bơ̆n đei lơ tơdrong thoi ‘bok Pôl đei chih khan: “Tơdrong noh ưh kơ sĭ tơblah tơduă bơ̆n kon bơngai ôh, bơ̆n tơblah hăm lu yŏng yang kơnê̆, sư kư̆m pran mơ̆n, sư kư̆m oei tơ kơpal plĕnh ti mă tơ anih nai; sư pơgơ̆r lu bơngai oei tơ ala teh âu, lu bơngai mă oei lăm măng mu.” (Êphêsô 6:12). Tơmam tơblah gah bơhngol lu bơ̆n đei hơmet lê̆ wă kơ gơh kĕ jei ‘noh jơ̆ athei kơchăng, krao khan, apinh Yang Bơhngol ‘Lơ̆ng bơtho tơ’bôh, chông anhăk păng kư̆m athei krao khan tơgŭm lu ‘nhŏng oh bơ̆n kơdih wă kơ đĭ đăng lu bơ̆n kĕ jei lăm tơdrong tơblah ‘bĕnh hăm tơdrong pơlong anat anot tih lăm chăl arih.

Lu bơ̆n wang pôm đon lăm nơ̆r krao khan,

Ơ Kră Yang, apinh Ih tơ’blŏk kơ inh wă kơ ling lang ‘blŏk kơ Ih, pơyơ̆r nơ̆r krao khan, apinh lăm năr đei tơdrong gleh truh. Apinh Ih ăn kơ inh ‘blŏk mơn đêl đei tơdrong dŏng pơklaih đơ̆ng Ih, kơplah inh đĭ jơhngơ̆m krao khan apinh Ih. Yua anăn Kră Yang Yêsu Krist, Amen.

Ơ đĭ đăng bơngai mơ̆ng mă ‘mêm kơeng,

Lăm bơ̆n hăm ‘măn tơdrong krao khan adrol hloh kơplah đei tơdrong anat anot ưh?

Lăm năr pơmat tat, inh krao apinh

Gơnang kơ pŭn hiôk đơ̆ng Kră Yang tuh ăn

Mă khan yang kơnê̆ chop, răp wă rôp sa inh

Đei Kră Yang dŏng pơklaih, ưh kơ hli kơ kiơ

Đŏk Sơ̆p Hla bơar ‘Bok Kei-Dei lăm pêng sơnăm: Êsai 64