II Hơ’mon 30:6-9
“yua kơ Kră Yang ‘Bok Kei-Dei lu iĕm Tơ’ngla găt băt ‘mêm mơnat, huay pă tơwih rŏng kơ iĕm tơdah lu iĕm wih brŏk tơ Sư.” (II Hơ’mon 30:9b)
Nơ̆r jet tơchĕng pơwao:
– Pơtao Hesekia chih kơthơ krao kon pơlei athei pơm kiơ?
– Lăng đơ̆ng tơdrong kiơ na pơtao krao athei thoi noh?
– Lu tơdra kiơ tơ’bôh bơ̆n tŏk bŏk oei tơwih rŏng kơ Kră Yang?
Lăm kơthơ krao kon pơlei Kră Yang akŭm Phĕt Năm Brih, Pơtao Hesekia athei lu sư wơ̆t brŏk tơ Kră Yang ‘Bok Kei-Dei Abraham, Isăk, păng Isơrael, wă khan Sư bơih ‘Bok mă wei dôm nơ̆r pơkă lăm rim adrĕch adrung rim jơ hnơ̆r, ‘nĕ kơ rok kiơ̆ lu ‘bok kơdră păng ‘nhŏng oh bơ̆n blah plơ̆ Kră Yang. Bơ̆n kăl kơ lăng đêl lĕch đơ̆ng tơdrong achăng tŭk nơ̆r Kră Yang, pơm kơ lu mơ’nah lăm bơngai Isơrael păng bơngai Juđa, đe rôp pơm bơnă tơchar đe. Kư̆m ‘nĕ kơ khăng kơ̆l thoi lu ‘bok kơdră bơ̆n, yua kơ đei hơ’mon tơdrong arih bơngai Isơrael khăng kơ̆l đơ̆ng chăl kră sơ̆ bơih (LĐ Êyiptơ 32:9). Wă kơ klĕch hlôi đơ̆ng tơdrong truh răm “lu sư athei yơ̆r ti lu sư” tơ Kră Yang, noh tơdrong ti pơpơ̆ wă pơma kơ tơdrong lu sư pơkă kiơ̆ Kră Yang tơnăp kơjăp (II Pơtao 10:15; Êsêkiên 17:18). Wă rôp tơpang ti Kră Yang ‘bĕnh tơdrong ‘mêm mơnat dim găt păng năm tơ hnam rơgoh Kră Yang wă kơkuh kơ Sư.
Pơtao Hêsekia tơbăt mưh lu sư wơ̆t dơ̆ng tơ Kră Yang, Kră Yang gô “wơ̆t dơ̆ng tơ lu bơngai mă oei lăm char gah yă nâm, lu bơngai mă đe lon huay kơ rôp chông ba pơm bơnă tơ char đe noh, lu sư ei, Kră Yang kư̆m huay kơ hil mĭl kơ lu sư mơ̆n. Lu mĕ ‘bă, ‘nhŏng oh đêl đe rôp chông ba pơm bơnă noh kư̆m gô “wơ̆t brŏk” (trong 9). Đơ̆ng lu chư “wơ̆t” ‘nâu, hla bơar Hơ’mon roi tơ’bôh tơdrong wơ̆t dơ̆ng tơ Kră Yang noh kăl tơpă wă kơ huay pă đei tơdrong truh răm. Wă kơ pơ̆n nuih wơ̆t brŏk dơ̆ng tơ Kră Yang, lu sư lăng đơ̆ng jơhngơ̆m Kră Yang dim găt băt mơnat noh Kră Yang gô ưh kơ tơwih rŏng kơ lu sư mưh lu sư wơ̆t brŏk dơ̆ng tơ Kră Yang. Tơdah lu sư ưh kơ wơ̆t brŏk dơ̆ng tơ Kră Yang, lei lu sư gô tơ’bơ̆p lu tơdrong truh pơmat thoi lu ‘bok kơdră lu sư sơ̆. Kơthơ pơtao Hêsekia chih ‘nâu tơdrong Kră Yang Sư ‘bok sek tơlang, kư̆m tơ’bôh Kră Yang Tơ’ngla mă iơ̆m dim gơh găt mơnat, lăp đon mơnat yoch bơngai bu mă wơ̆t brŏk tơ Sư dơ̆ng.
Bơnê kơ Kră Yang yua kơ lu bơngai lui bơ̆n âu kư̆m bơngai wơ̆t brŏk tơ Kră Yang bơih. Đêl bơ̆n arih oei sa kơnê̆ yoch, trŏ kơ wă pŭ iŏk tơdrong Kră Yang hil mĭl ră (Êsêkiên 7:8). Mălei ‘Bok Krist hlôi pŭ tang yoch bơ̆n, wă kơ bơ̆n gơh đei Kră Yang ‘Bok Kei-Dei jơhngơ̆m ‘bĕnh kơ dim găt băt mơnat noh, Sư mơnat huay kơ jô̆ kơ yo tơdrong yoch bơ̆n. Mă khan lei ră, lơ wơ̆t bơ̆n kư̆m “tơwih rŏng” kơ Kră Yang wă tơwih muh măt lăng tơ lu rup yang tơ ala teh âu, jên tơmam dah tơdrong chơt hiôk lăm chăl arih ‘nâu. Lu tơdra tơ’bôh tơdrong bơ̆n tơwih rŏng kơ Kră Yang noh ‘bơ̆t bơ̆n ưh pă akŭm băl kơkuh bơ̆jang kơ Sư bơih noh. Kơplah noh bơ̆n kư̆m pă ‘maih krao khan, ưh pă ‘maih đŏk Sơ̆p hla bơar ‘Bok Kei-Dei, bơ̆n ‘maih năm tơ lu tơdrong ala teh đĕch. Bơ̆n pơm thoi noh rai đunh, mưh ưh pă jê̆ Kră Yang bơih bơ̆n gô lăng tơdrong yoch hơi bơih, bơ̆n ‘bônh kơ pơm yoch dêh. Tơwih rŏng kơ Kră Yang noh gô pơm kơ bơ̆n năm tơ tơdrong răm ‘băm (trong 7). Yua kơ thoi noh phŏ kơnh Kră Yang mă ‘bĕnh jơhngơ̆m ‘mêm mơnat, Sư ăn tơdrong truh gleh pơmat wă kơ bơ̆n hơdơ̆r ‘blŏk kơ Sư, wơ̆t tơ Sư dơ̆ng.
Kơkuh kơ Ih Kră Yang, apinh Ih mơnat pă jô̆ yo đêl inh tơwih rŏng kơ Ih. Inh tơwih muh măt lăng tơ lu rup yang ala teh âu. Apinh Ih ăn kơ inh tơbral wơ̆t brŏk tơ Ih dơ̆ng. Apinh Ih rôp dui ti rơdu tơrăn inh âu wă kơ inh huay kơ bơ̆l hăl, kiơ̆ Ih kơjăp. Inh krao khan yua anăn Kră Yang Yêsu Krist, Amen!
Bơ̆n hăm băt kơnăl kơ Kră Yang Sư dim găt băt mơnat rơkah rơkai, wă wơ̆t brŏk dơ̆ng tơ Sư ưh?
Đŏk Sơ̆p Hla bơar ‘Bok Kei-Dei lăm pêng sơnăm: I Lu Pơtao 9
Kênh Youtube BHKTHN:
