II Kevcai 28:1-14
Nqe cim:
“Yog nej mloog tus Tswv uas yog nej tus Vajtswv lus thiab ua raws li nws tej kevcai uas hnub no kuv qhia rau nej, tus Tswv yuav tsa nej ua haivneeg uas muaj hwjchim loj dua lwm haivneeg hauv ntiajteb no” (II Kevcai 28:1).
Lus nug rau sawvdaws xav:
– Cov Yixalayees yuav tsum ua dabtsi thiaj tau txais Vajtswv tej koob hmoov zoo?
– Tej koob hmoov tus Tswv coglus muab pub yog dabtsi?
– Yuav ua licas peb thiaj ua tau lubneej mloog tus Tswv lus nyob hauv txhua lub tsamthawj?
Tus Tswv haivneeg tabtom yuav mus txeeb lub tebchaws ntawm ib haivneeg uas phem kawg nkaus thiab pe dab pe mlom, tshwjxeeb yog pe Npa-as, ntawd yog ib tug vajtswv uas tsis muaj tseeb tiamsis haivneeg ntawd yeej cia siab ntsoov rau thiab ntseeg hais tias Npa-as pub koobhmoov rau lawv. Tus Tswv yeej paub ua ntej lawm hais tias Nws haivneeg yuav tsis mloog lus tua kom tagnrho cov Kana-as phem qias povtseg, yog li thiaj tseem muaj lwm haivneeg nrog Nws haivneeg nyob ua ke. Thaum hloov pauv lubneej nyob tsev ntaub uas tau tus Tswv pub noj manas, los mus rau lubneej ua liaj ua teb hauv lub Tebchaws Coglus Tseg, tus Tswv haivneeg ntau tsawg kuj yuav qaug mus rau lwm haivneeg tej kev ntseeg. Vim li ntawd, tus Tswv thiaj qhia rau lawv nco ntsoov hais tias tsuas muaj Vajtswv tibleeg xwb thiaj yog lub hauv paus ntawm txhua txoj koobhmoov, thiab yuav tau txais tus Tswv tej koob hmoov yuav tsum “mloog tus Tswv… lus thiab ua raws li Nws tej kevcai” (nqe 1). Txhua yam koobhmoov tus Tswv muab pub yog tej koobhmoov hauv lawv lubneej thiab lub cuabyig, zaub mov noj txhua hnub, muaj nag los raws caij kom sau tau qoob loo puv txhab, txhua tus yeebncuab yuav raug tus Tswv ua rau puastsuaj thiab txhua haiv neeg yuav pom hais tias lawv yog tus Tswv haivneeg dawbhuv, yog haivneeg tau xaiv, tau nyob hauv Vajtswv txojkev tsomkwm (nqe 2-12). Vajtswv Txojlus tseem rov hais ib zaug ntxiv hais tias yog lawv ua raws li tus Tswv tej kevcai txhua nqe thiab pehawm Nws tsis tso tseg, ces tsis yog lawv tsuas tau koobhmoov xwb, tiamsis tseem yuav tau tsa ua ntau haivneeg tus thawj thiab (nqe 13-14).
Tebchaws Coglus Tseg uas tus Tswv pub yog lub tebchaws “av rog thiab zoo qoobloo”, thiab Vajtswv Txojlus qhia Nws haivneeg paub hais tias qhov uas yuav tau tus Tswv tej koobhmoov hauv lub tebchaws av rog no tsis yog los ntawm qhov uas mus raws ib txoj kev ntseeg twg tiamsis qhov tseemceeb tshaj yog kev mloog lus. Txhua txoj koobhmoov puavleej yog tus Tswv muab pub, tus Tswv haivneeg yuav tsum mloog lus thiaj yuav txais tau.
Tus Cevlus Xamuyees hais rau vajntxwv Xa-ules hais tias, “Koj ua tib zoo xav saib, tus Tswv txaus siab rau yam twg: tus Tswv xav kom neeg mloog nws lus lossis muab tsiaj tua fij rau nws? Mloog tus Tswv lus zoo dua qhov uas muab tej yaj zoo nkauj tua fij rau nws” (I Xamuyees 15:22). Mloog tus Tswv lus yog ib yam tseemceeb hauv tus ntseeg lubneej nrog tus Tswv mus. Txawm yog ntau zaug kuj tsis yoojyim ua neej mloog lus, vim qee zaug muaj tej kev txiav txim siab ua raws Vajtswv Txojlus yuav ua rau peb raug poob tej yam peb qhov muag pom. Tiamsis cia li cia siab ntsoov rau tus Tswv, uas yog lub hauvpaus koobhmoov heev dua tej yam peb qhov muag pom. Thaum peb txiav txim siab ua lubneej ncajncees raws li tus Tswv txojkev, Nws yuav foom koob hmoov rau peb vim Nws yog tus uas ncajncees.
Thov Vajtswv,
Tus Tswv uas yog hauvpaus ntawm tej koobhmoov. Thov pab nyuam yaus txhob nrhiav tej koob hmoov hauv ntiajteb tiamsis niaj hnub ua lubneej hwm Koj kom txais tau tej koob hmoov Koj muab pub nyuam yaus thiab nyuam yaus cajces. Nyuam yaus tuav Yexus Khetos lub npe thov, Amees.
Peb puas mloog tus Tswv lus nyob hauv txhua lub tsamthawj lawm tau?
Nyeem Vajluskub hauv peb lub xyoo: Levis Kevcai 8
Kênh Youtube BHKTHN:
