II Xwmtxheej Vajntxwv 21:11-15
Nqe cim:
“Koj tus pojniam yuav zoo ib yam li tsob txiv hmab uas txi txiv ncw heev hauv koj lub tsev, koj cov menyuam yuav zoo ib yam li tej ntsuag ntoo roj uas nyob puagncig koj lub rooj mov. Tus neeg uas mloog tus TSWV lus yuav tau koob hmoov nplua mias li ntawd.” (Phau Ntawv Nkauj 128:3-4).
Lus nug rau sawvdaws xav:
– Vim li cas tus cevlus Eliyas xa tsab ntawv mus rau Vajntxwv Yehaulas?
– Muaj pestsawg yam kev txhaum hais hauv tsab ntawv?
– Nqi zog Vajntxwv Yehaulas tau txais yog dabtsi?
– Peb yuav ua neej li cas kom tsis txhob ua li Vajntxwv Yehaulas ua?
Eliyas tes haujlwm yog cev Vajtswv lus rau Aumelis cuab kwvtij, tshwjxeeb yog cov Yixalayees tus Vajntxwv Ahaj. Zaum no yog thawj zaug uas Vajtswv txib Eliyas cev Nws tej lus rau cov Yudas tus Vajntxwv Yehaulas, vim vajntxwv ua kev txhaum raws li cov Yixalayees tej vajntxwv, “ib yam li…lwm tus vajntxwv uas kav tebchaws Yixalayees.” (nqe 6).
Tsab ntawv muaj ob feem: hais kev txhaum (nqe 12-13) thiab rau txim (nqe 14-15). Muaj peb yam kev txhaum uas Vajntxwv Yehaulas ua tau hais tawm, yog nws ua raws li cov Yixalayees tej vajntxwv ua, ua cov Yudas thiab tej pejxeem hauv nroog Yeluxalees tsis muab siab npuab Vajtswv thiab tua nws cuab kwvtij povtseg. Tus cevlus Eliyas qhia Vajtswv Txojlus rau Vajntxwv Yehaulas, nws tsis hais tias tus Tswv yog cov Yixalayees tus Vajtswv raws li ibtxwm hais, tiamsis hais tias “tus Tswv uas yog koj yawgkoob Daviv tus Vajtswv”, xav hais kom vajntxwv muaj lub siab ncaj ncees rau tus Tswv rau qhov vajntxwv yug los ntawm cajces cov vajntxwv hlub tus Tswv. Nws twb cog lus rau Vajntxwv Daviv, thiab Vajntxwv Yehaulas kuj yog tus uas tau txais tej lus cog tseg no. Vajntxwv yuav tsum ncaj ncees rau tus Tswv thiab Nws yuav ua raws Nws tej lus cog tseg, hwj thiab foom koob hmoov vajntxwv lub tebchaws nyob ruaj khov (II Xamuyees 7:12-16).
Txawm yog li ntawd los, Vajntxwv Yehaulas tseem tawmtsam tej uas cov yawgkoob ibtxwm ua, tsis ua raws tus qauv ntseeg li lawv cajces xws li Vajntxwv Daviv, Yehausafas thiab Axas, nws ua kev phem kev qias li cov Yixalayees tus Vajntxwv Ahaj. Yog li ntawd, lub txim hais tawm ntawm no yog tus Tswv yuav tso kev puastsuaj los rhuav cov pejxeem, pojniam tubse, txhua yam khoom thiab vajntxwv. Vajtswv Txojlus coglus rau tus neeg uas ua raws li tus Tswv yuav tau txais koob hmoov rau tus kheej thiab tsevneeg (Phau Ntawv Nkauj 128), tus neeg uas mus caum ntiajteb yuav tsis tau koob hmoov thiab yeej yuav raug tus Tswv txiav txim xwb.
Cov ntseeg Tswv Yexus yog tus Vajntxwv ntawm txhua tus vajntxwv cov menyuam, tau txais tus Tswv txojkev cawm dim, peb yuav tsum muaj feem nrog tus Tswv mus thiab ua raws li Tswv Yexus Khetos ua. Vajntxwv Yehaulas qhov kev txhaum thiab lub txim qhia rau peb xyuam xim rau kev ua neej, qaij dej tej kev tsis zoo uas Vajntxwv Yehaulas tau ua, tiamsis yuav tau xyaum cov neeg uas ntseeg zoo hauv tsevneeg tus qauv thiab cov neeg muaj kev ntseeg coj yus nyob hauv Pawg Ntseeg. Koob hmoov lossis kev txiav txim yog nyob ntawm peb xaiv, lossis ua raws li tus Tswv qhia hauv Phau Vajluskub, lossis ua li ntiajteb ua, tsis hais tej uas qhov muag pom, lub siab ntshaw thiab tej uas neeg qhuas (I Yauhas 2:16).
Thov Vajtswv,
Tus Tswv, thov Koj pab kom nyuam yaus ncaj ncees taug Koj txojkev thiab tso txojkev qub uas phem nyob hauv ntiajteb no mus kom nyuam yaus thiab tsevneeg tau Koj tej koob hmoov. Amees.
Peb tabtom taug tus Tswv txojkev lossis yog ntiajteb txoj?
Nyeem Vajluskub hauv peb lub xyoo: Tes Haujlwm 23:11-35
Kênh Youtube BHKTHN:
