Klei Aê Diê Blŭ: II Klei Yăl Dliê 21:11-15
Êlan kliăng: “Mô̆ ih srăng jing msĕ si sa phŭn boh kriăk ƀâo mboh lu, hlăm lam sang ih. Phung anak ih srăng jing msĕ si kƀiêng ana boh ôliwơ, jŭm dar jhưng huă ih. Msĕ snăn pô huĭ mpŭ kơ Yêhôwa srăng mâo klei jăk jĭn” (Klei Mmuñ Hđăp 128:3-4)
Klei êmuh ksiêm mĭn: Ya ngă Khua pô hưn êlâo Y-Êli čih hră mơĭt kơ Mtao Y-Jôram? Mâo dŭm klei soh yap hlăm hră mơĭt anăn? Ya boh jhat Mtao Y-Jôram mă tŭ? Si ngă ih srăng hdĭp čiăng amâo tui kru Mtao Y-Jôram ôh?
Bruă Khua pô hưn êlâo Y-Êli jing knŏng blŭ klei hưn êlâo kơ sang Y-Ômri, boh nik nak kơ Y-Ahap, mtao Israel. Ƀiădah lĕ, knŏng sa blư̆ anei Aê Diê yua Khua pô hưn êlâo Y-Êli blŭ klei hưn êlâo Y-Jôram, mtao Yuđa, kyuadah ñu tui leh klei soh phung mtao Israel, “msĕ si sang Y-Ahap ngă leh…klei jhat ti anăp ală Yêhôwa” (êlan 6).
Hră mơĭt mâo dua kdrêč: yap klei soh (êlan 12-13) leh anăn phat kđi (êlan 14-15). Mâo tlâo mta klei soh prŏng Mtao Y-Jôram ngă leh, anăn jing êbat tui êlan phung mtao Israel, atăt phung Yuđa leh anăn phung dôk hlăm ƀuôn Yêrusalem kơ klei amâo dôk sĭt suôr, leh anăn bi mdjiê jih phung adei ñu pô. Khua pô hưn êlâo Y-Êli lŏ bi hdơr klei Aê Diê blŭ kơ Mtao Y-Jôram, hlăm anăn ñu amâo lač Yêhôwa jing Aê Diê phung Israel msĕ si ñu khăng lač yang đar ôh, ƀiădah lač “Yêhôwa Aê Diê Y-Đawit aê ih”, čiăng lač bruă klam kơ mtao jing dôk sĭt suôr hŏng Aê Diê kyuadah arăng kkiêng kơ mtao mơ̆ng tian prôč sa čô mtao khăp snăk kơ Aê Diê. Aê Diê ngă leh klei bi mguôp hŏng Mtao Y-Đawit, leh anăn Mtao Y-Jôram jing pô dưn klei bi mguôp anei mơh. Mtao srăng dôk sĭt suôr hŏng Aê Diê leh anăn Aê Diê srăng ngă tui si klei bi mguôp anăn răng kriê leh anăn brei klei jăk jĭn kơ sang mtao, leh anăn ƀuôn ala mtao – mtao srăng dôk kjăp hlŏng lar (II Y-Samuel 7:12-16).
Ƀiădah lĕ, Mtao Y-Jôram lhiăr leh kơ klei bhiăn găp djuê mtao ñu pô, amâo tui ôh knuih huĭ mpŭ kơ Aê Diê msĕ si hlăm phung găp djuê ñu jing Mtao Y-Đawit, Y-Jôsaphat, Y-Asa, ƀiădah ñu tui klei jhat Y-Ahap, mtao Israel. Kyuanăn, klei bi kmhal jing Yêhôwa srăng bi truh klei ruă bi mdjiê kơ phung ƀuôn sang mtao, mô̆ anak, dŏ ngăn leh anăn wăt kơ asei mlei mtao pô. Klei Aê Diê ƀuăn pô êbat tui êlan Aê Diê srăng mă tŭ klei jăk jĭn kơ ñu pô leh anăn kơ gŏ sang ñu (Klei Mmuñ Hđăp 128), bi pô êbat tui êlan lăn ala srăng bi luč jih klei jăk jĭn leh anăn srăng tŭ klei Aê Diê phat kđi.
Phung đăo kơ Krist jing anak Mtao kơ phung mtao, mă tŭ leh klei Ñu bi mtlaih, bruă klam kơ jih jang drei jing êbat tui hlue êlan Khua Yang leh anăn ngă klei Krist ngă leh. Klei soh Mtao Y-Jôram leh anăn klei Aê Diê bi kmhal mñă brei drei răng hlăm klei hdĭp, weh đuĕ mơ̆ng êlan Mtao Y-Jôram leh anăn tui knuih phung huĭ mpŭ kơ Aê Diê hlăm gŏ sang drei pô leh anăn phung đăo thâo huĭ mpŭ kơ Aê Diê ênuk phŭn dô hlăm Phung Sang Aê Diê. Klei jăk jĭn hĕ amâodah klei phat kđi jing dŏ drei pô ruah mă, amâodah êbat tui hlue êlan Aê Diê mtô leh hlăm Klei Aê Diê Blŭ amâodah êbat tui hlue êlan lăn ala, ngă klei kđeh tluh, klei ală tluh leh anăn klei mgao hlăm klei hdĭp (I Y-Yôhan 2:16).
Drei dôk êbat hlăm êlan Aê Diê hĕ amâodah êlan lăn ala?
Wah lač: Ơ Khua Yang, đru kâo dôk sĭt suôr nanao hlăm êlan Ih leh anăn lui êlan lăn ala čiăng kâo dưi mă tŭ klei jăk jĭn kơ kâo pô leh anăn kơ gŏ sang kâo.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 23:11-35
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
