Mathiơ 20:29-34
“Krao khan apinh ‘Bok Kei-Dei khŏm khŏm na Sư gô asong kơ iĕm. Iĕm nŏng kơ chă khŏm khŏm, Sư gô tơ’bôh kơ iĕm. Iĕm dơdŭ ‘măng Sư khŏm khŏm, na Sư gô pơih ăn.” (Mathi-ơ 7:7)
Nơ̆r jet tơchĕng pơwao:
– Đei ‘bar ‘nu bơngai măt tol oei ngôi ‘bơ̆t cheng trong krao apinh tơdrong kiơ kơplah kơtơ̆ng Yêsu wă brih trong ei?
– Yua kơ kiơ ‘bar ‘nu bơngai măt tol adrin krao apinh mă khan lơ bơngai khă bre sư?
– Lu bơ̆n pơhrăm iŏk tơdrong kiơ gah jơhngơ̆m adrin krao apinh?
‘Nâu bơih trong yak năm tuch luch Kră Yang Yêsu đơ̆ng dêh Galilê năm truh tơ dêh Jêrusalem lăm Phĕt Năm Brih. Na Sư wă năm dơ̆ng tơ pơlei Jêrikô, gah hơlĕch kơ Jêrusalem, dang 27 kơsô̆. Pơlei Jêrikô lăm Pah so sơ̆ đe pơrăm đĭ bơih jing juơ, đei pơlei ‘nao đơ̆ng pơtao Hêrôt man pơjing dang 2 kơsô̆ năm tơ Gơal. Yêsu weh đơ̆ng Jêrikô (trong 29) păng năm tơ pơlei ‘nao (Luka 18:35). Phĕt Năm Brih đei pơjing lăm tơpơh năr (Lêwi 23:5-6). Đĭ đăng lu bơngai drŏnglo athei năm tơ pơlei Jêrusalem wă pơm Phĕt Năm Brih (Bơtho khôi juăt 16:16). Thoi noh, na lăm jơ akŭm noh đei lơ bơngai đơ̆ng nai wang năm akŭm. ‘Nâu bơih năr mă lu bơngai chă apinh tơmam sa đe.
Lăm năr ei, đei ‘bar ‘nu bơngai măt tol oei ngôi ‘bơ̆t cheng trong, bre sư kơtơ̆ng đei lơ bơngai brih trong ei, na bre măt tol jet đe păng băt Yêsu wă yak trong bre sư ei na bre sư krao ‘bơ̆r re khan: “Ơ Yêsu, ơ ‘Bok Krist kon sâu pơtao Đawit, apinh Ih mơnat kơ nhi ‘biơ̆ bĕ.” Nơ̆r “kon sâu pơtao Đawit” jơ̆ anăn ‘măn krao anăn Yang Mêsi mă lu ‘bok khan lê̆ adrol lăm Pah so đei chih roi (Êsai 9:5-6; 11:1; Jêrêmi 23:5-6). ‘Bar ‘nu bơngai măt tol ‘nâu lui ngeh Kră Yang Yêsu âu bơih Yang Mêsi đei tơbăt lê̆ adrol bơih. Sư ‘bĕnh kơ tơdrong mơsêh pơklaih lu bơngai jĭ jăn, hơwen hơwo, “kơplah noh lu bơngai măt tol gô ‘bôh lu bơngai klĭk klot gô kơtơ̆ng.” Kơlih kơ thoi noh nơ̆r bre sư krao ôr ưh kơ trŏ wă apinh tơmam sa mălei bre sư krao apinh wă kơ măt ‘bôh hơdah.
Lơ bơngai kiơ̆ Yêsu lu sư tơchĕng khan Yêsu ‘noh bơih bơngai gĭt dêh, wă yak năm tơ pơlei Jêrusalem wă jang tơdrong jang tih, lu sư ưh kơ wă Yêsu pơjuăl tơdrong jang iĕ thoi lĕ đơ̆ng lu bơngai chă apinh tơmam đe, tơdrong arih lu bơngai noh lŭch dêh, thoi noh na lu sư khă bre măt tol, ‘nĕ pă krao ‘bơ̆r re. Mălei mă khan đe khă găn ră, bre sư oei adrin krao ‘bơ̆r re: “Ơ ‘Bok Krist, kon sâu pơtao Đawit, apinh Ih mơnat kơ nhi ‘biơ̆ bĕ.” Tuch luch Kră Yang tơl tơwih nơ̆r bre sư krao apinh, Kră Yang pơklaih măt bre sư ‘bôh hơdah hloi, na bre sư kiơ̆ hloi Yêsu.
Bre ‘bar ‘nu bơngai măt tol adrin krao khan apinh yua kơ bre sư lui ngeh sĭt tơpă Kră Yang Yêsu noh bơih Tơ’ngla pơklaih bre sư. Bre sư krao apinh Kră Yang tơdrong kơnhăm rơđah dêh, thoi noh na bre sư ưh kơ wă đei tơdrong pơgăn, Kră Yang Yêsu khan: “Krao khan apinh ‘Bok Kei-Dei khŏm khŏm na Sư gô asong kơ iĕm, iĕm nŏng kơ chă khŏm khŏm, Sư gô tơ’bôh, iĕm dơdŭ ‘măng khŏm khŏm, na Sư gô pơih ăn” (Mathiơ 7:7-8). Apinh Kră Yang tơgŭm bơ̆n ling lang pơjao chăl arih lăm tơpang ti ‘mêm mơnat Kră Yang. Thoi kon nge lăm tơpang ti mĕ sư, huay kơ hli mă đei tơ’bơ̆p pơmat, mălei oei adrin krao apinh păng dơdŭ ‘măng ding mă “Ăn tơdrong tơchĕng Ih gơh jing, mă tơ teh âu kư̆m thoi tơ plĕnh ti.”
Ơ Kră Yang ‘Bok Kei-Dei Ih bơih Kră Yang ‘mêm mơnat, apinh Ih tơgŭm inh pơ̆n nuih năm jê̆ anih pŭn hiôk, adrin krao apinh tơdrong kiơ Kră Yang lăp đon. Mă tơ’bơ̆p tơdrong pơgăn thoi yơ hĭ oei adrin krao apinh. Krao khan yua anăn Kră Yang Yêsu Krist, Amen.
Lu bơ̆n hăm ‘bônh kơhăl dah lu bơ̆n krao apinh đunh năr kơ tơdrong kiơ noh ưh?
Đŏk Sơ̆p Hla bơar ‘Bok Kei-Dei lăm pêng sơnăm: Êsai 30
Kênh Youtube BHKTHN:
