Chivkeeb 25:27-34
Nqe cim:
“Ixaj nyiam Exaus dua, rau qhov Ixaj nyiam noj tej nqaij tsiaj qus uas Exaus mus plob tua tau los, tiamsis Lenpekas nyiam Yakhauj dua” (Chivkeeb 25:28).
Lus nug rau sawvdaws xav:
– Vajluskub hais txog Exaus thiab Yakhauj tus cwjpwm zoo licas?
– Teebmeem thaum ib tug tau txiv hlub, ib tug tau niam hlub yog dabtsi?
– Yuav ua licas peb thiaj qaij dhau kev xaiv cov menyuam ntsejmuag hauv cuabyig?
Ixaj thiab Lenpekas zoo siab heev thaum tau tus Tswv pub muaj ob tug tub tomqab uas tos ntev ntau xyoo (Chivkeeb 25:20-26). Thaum ob tug tub loj hlob, nyias coj nyias cwjpwm sib txawv, thiab qhov ntawd ua rau muaj teebmeem. Thiab kuj ntsib tej kev tu siab thaum niam txiv hlub menyuam tsis sib npaug (nqe 27-28). Vim Ixaj nyiam noj tej nqaij tsiaj qus thiab Exaus txawj mus plob tua tsiaj, pheej coj tej tsiaj los rau txiv noj thiaj tau txiv hlub. Ixaj txojkev hlub menyuam qaug mus rau qhov uas menyuam ua haum nws siab. Qhov no ua rau Exaus coj tau tus cwjpwm “muaj pub muaj pauj”. Menyuam coj tau nqaij tsiaj qus los rau txiv noj thiaj tau txiv hlub. Ntawd yog kev hlub sib pauv thiab muaj tus nqi. Tiamsis Yakhauj yog neeg ncauj lus tsawg, tsuas nyob ncig vaj ncig tsev xwb thiab nyob ze niam, thiaj tau Lenpekas hlub dua Exaus. Vim nyob nrog niam ntau thiaj kawm tau tus cwjpwm xyuamxim thiab txawj ua zaub mov noj ntawm leejniam. Muaj tseeb, thaum Lenpekas hlub tus tub twg dua ces yeej xav kom tus ntawd tau yam zoo tshajplaws, ntawd yog ntshaw kom nws tus tub tau lub meejmom uas yog tijlaug.
Vim kev hlub xaiv ntsejmuag ntawm niam txiv thiaj ua rau lub cuabyig muaj kev kub ntxhov thiab teebmeem. Yakhauj tau dag nws tijlaug pauv lub meejmom ua tijlaug thaum Exaus tshaib plab heev (nqe 29-33). Qhov tseeb Exaus kuj tsis saib taus lub meejmom ua tijlaug thiaj txaus siab muab pauv kom tau noj tsau plab (nqe 32).
Ixaj thiab Lenpekas lub tsevneeg qhia peb kawm tau ib txoj haukev pab peb tiv dhau kev khwv hauv kev tu qhia menyuam thiab kev hlub menyuam. Tej zaug nyob hauv cov menyuam, muaj tus no coj cwjpwm haum txiv, tus tod coj cwjpwm haum niam. Tiamsis niam txiv yuav tsum vamkhom tus Tswv txoj koobhmoov ua ncajncees rau menyuam kom lawv tsis muaj kev sib ntxub. Niam txiv yuav tsum kawm hlub menyuam sib npaug zos, txawm lawv yuav muaj tus cwjpwm zoo thooj lossis txawv peb. Kev xaiv ntsejmmuag hauv cuabyig ua rau muaj teebmeem tsis zoo, xws li tej teebmeem uas tomqab no Ixaj thiab Lenpekas ntsib. Hlub menyuam tsis sib npaug kuj ua rau muaj qhov tsis zoo hauv menyuam lubneej. Txawm yog menyuam yuav yeej, yuav swb hauv lubnneej, los niam txiv kuj txhob xaiv ntsejmuag thiab kuj txhob muab tug piv rau tug vim ntawd yog lub hauvpaus ua rau muaj kev sib khib sib ntxub hauv lub cuabyig. Peb txhua tus yuav tsum ua neej thiab sib hlub raws li Vajtswv Txojlus qhia kom lub cuabyig muaj kev kaj siab ruaj khov.
Thov Vajtswv,
Tus Tswv, thov pab nyuam yaus ua ncajncees rau tej menyuam, tsis hlub menyuam los ntawm kev xaiv ntsejmuag, kom nyuam yaus tsevneeg tuav ruaj kev ntseeg thiab muaj kev kaj siab. Nyuam yaus tuav Yexus Khetos lub npe thov, Amees.
Koj tus pojniam lossis tus txiv puas nrog koj koom siab hauv kev qhia menyuam thiab hlub menyuam tsis xaiv ntsejmuag lawm tau?
Nyeem Vajluskub hauv peb lub xyoo: Mathais 28
Kênh Youtube BHKTHN:
