Klei Aê Diê Blŭ: Klei Mphŭn Dơ̆ng 25:27-34
Êlan kliăng: “Y-Isăk khăp kơ Y-Êsâo kyuadah ñu ƀơ̆ng čĭm hlô gơ̆, ƀiădah H’Rêƀêka khăp kơ Y-Yakôp.” (Klei Mphŭn Dơ̆ng 25:28)
Klei êmuh ksiêm mĭn: Si Klei Aê Diê Blŭ hưn mdah knuih jing Y-Êsâo leh anăn Y-Yakôp? Ya boh tŭ jhat mơ̆ng klei anak ama khăp, anak amĭ khăp? Si drei ngă čiăng tlaih mơ̆ng klei khăp lu ƀiă hĭn mdê mdê kơ phung anak hlăm gŏ sang?
Y-Isăk leh anăn H’Rêƀêka mâo klei jăk mơak snăk hlăk Aê Diê brei kơ diñu mâo dua čô anak êkei leh sui hruê dôk čang guôn (Klei Mphŭn Dơ̆ng 25:20-26). Tơdah dua čô anak đĭ hriê kơ prŏng, knuih jing diñu êdah klă, lŏ mâo klei dleh truh kyuadah knuih jing diñu mdê êdi. Leh anăn ăt lŏ mâo klei amâo mơak ôh truh tơdah amĭ ama khăp kơ anak amâo mâo mtăp mđơr (êlan 27-28). Kyua Y-Isăk khăp ƀơ̆ng čĭm hlô leh anăn Y-Êsâo jing mnuih êgap snăk, kreh ba wĭt čĭm hlô kơ ama kyuanăn ama khăp kơ gơ̆. Klei khăp Y-Isăk pioh kơ anak ñu ktang hĭn kyua bi hrăp klei ñu khăp čiăng. Kyua klei anei yơh bi mjing hlăm Y-Êsâo knuih “mâo wĭt nao hriê ”. Anak ba wĭt čĭm hlô kơ ama kyuanăn ama khăp. Anei jing klei khăp bi mlih nao hriê leh anăn mâo hnơ̆ng čuăn. Bi Y-Yakôp jing mnuih ênăp ai, dôk wĭr wĭr hlăm sang leh anăn jĕ giăm hŏng amĭ, kyuanăn H’Rêƀêka khăp kơ gơ̆ hĭn. Kyua jĕ giăm amĭ snăn gơ̆ hriăm mơ̆ng amĭ knuih kiêr leh anăn klei tŭk knă mnơ̆ng ƀơ̆ng. Sĭt yơh, tơdah H’Rêƀêka khăp ti anak lu hĭn, ñu čiăng klei jăk hĭn kơ pô anăn yơh, jing klei hmăng hmưi kơ anak ñu khăp mâo klei dưi pô jing ayŏng khua.
Mơ̆ng klei khăp amâo tăp mđơr amĭ ama ba klei rŭng răng leh anăn amâo thâo bi djŏ hlăm gŏ sang. Y-Yakôp yua mmông găl mplư ayŏng ñu pô, bi mlih mă klei jing ayŏng khua hŏng sa čhiên bur êtak êjai ayŏng ñu dôk êpa (êlan 29-33). Klă nik yơh Y-Êsâo amâo mpŭ ôh kơ klei ñu jing ayŏng khua leh anăn bi mlih êlưih pưih čiăng khă bi trei tian ñu hĭn (êlan 32).
Rup gŏ sang Y-Isăk leh anăn H’Rêƀêka đru kơ drei ƀuh sa hdră êlan čiăng dưi găn gao klei lông dlăng hlăm klei čiêm rông mtô lač khăp kơ phung anak. Năng ai hlăm dŭm čô anak, mâo pô anei guôp hŏng knuih ama, pô dih guôp hŏng knuih amĭ. Ƀiădah brei knang kơ klei pap Khua Yang čiăng dưi dôk dơ̆ng ƀơ̆ng huă mtăp mđơr sơăi hŏng phung anak đăm ba ôh klei bi êmut bi nač hdơ̆ng phung anak. Brei amĭ ama hriăm thâo khăp kơ phung anak msĕ sơăi, khă mdê hŏng knuih drei amâodah mdê hŏng klei drei hmăng hmưi tŭ mơh. Klei khăp lu ƀiă hĭn mdê mdê hlăm gŏ sang, atăt truh boh tŭ jhat nanao kơ hruê êdei anăp msĕ si gŏ sang Y-Yakôp leh anăn H’Rêƀêka. Khăp kơ phung anak amâo mtăp mđơr ăt dưm gru êka sui dlông hlăm klei hdĭp phung anak mơh. Thâodah phung anak mâo klei tŭ jing amâodah dluh lĕ hlăm klei hdĭp diñu dưn, amĭ ama ăt kăn dưi dlăng mdê mdê rei hlăm klei dôk dơ̆ng huă leh anăn amâo dưi bi mkă bi msĕ ôh anak anei hŏng anak dih, kyuadah klei anăn yơh jing mjeh čăt đĭ klei bi êmut bi nač hdơ̆ng pô hlăm gŏ sang. Grăp čô drei brei dôk hdĭp leh anăn khăp kơ anak tui si Klei Aê Diê Blŭ mtô, čiăng kơ gŏ sang mâo klei jăk mơak sĭt sui dlông.
Si ngă ung mô̆ diih sa ai mơ̆ hlăm klei mtô lač leh anăn dôk dơ̆ng ƀơ̆ng huă mtăp mđơr hŏng phung anak?
Wah lač: Ơ Khua Yang, akâo Ih đru kâo dôk dơ̆ng ƀơ̆ng huă mtăp mđơr nanao hŏng phung anak. Đru kâo amâo khăp ƀiă lu hĭn mdê mdê kơ anak čô ôh, čiăng kơ gŏ sang kâo jing sa gŏ sang huĭ mpŭ kơ Aê Diê leh anăn jăk mơak nanao. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Mathiơ 28
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
