Galati 2:1-10
“Bơ̆n kư̆m đei lăp minh ‘nu Yŏng Tơ’ngla đĕch, na minh tơdrong lui bơ̆n, lui lei-lăi ngăl. Tơdrong bơ̆n iŏk ‘batem kư̆m lei-lăi mơ̆n.”(Êphêsô 4:5)
Nơ̆r jet tơchĕng pơwao:
– ‘Bok Pôl oei roi tơdrong kiơ jơ’nâu?
– Tơdrong ‘Nao ‘Lơ̆ng mă ‘bok Pôl bơtho khŭl bơngai wei lăng pơgơ̆r đei jô̆ tơdrong noh gĭt kăl thoi yơ hăm khul bơngai Galati?
– Lu bơ̆n kăl kơ pơm tơdrong kiơ kơ plah đei mơ̆ng tơdrong bơtho ‘nao?
Đơ̆ng rŏng kơ sư bơtho Tơdrong ‘Nao ‘Lơ̆ng mă sư đei ră roi noh jơ̆ đơ̆ng ‘Bok Kei-Dei, ‘bok Pôl đei pơma thim jrŭ păng gĭt kăl lăm Tơdrong ‘Nao ‘Lơ̆ng noh. Sư đei roi mơjĭt puăn sơnăm hơdrol tơdrong noh thoi âu “Đei bơngai đơ̆ng dêh char Juđê năm tơ Pơlei Antiôs bơtho lu bơngai lui khan: “Bơngai bu ưh kơ chu kăt tơdra akar sư kơdih kiơ̆ tơdrong juăt Môis pơkă sơ̆, lei ưh kơ gơh klaih đơ̆ng tơdrong yoch.” (Tơdrong Jang 15:1). ‘Nâu jơ̆ tơdrong bơtho glăi jrok, tơplơ̆ kơ Tơdrong ‘Nao ‘Lơ̆ng mă ‘bok Pôl đei bơtho. Thoi noh , đei tơdrong pơjah băl ‘bok Pôl, Banaba pơjah hăm lu bơngai noh. Galati 2:1-10 đei chih tơƀôh kơ ‘bok Pôl, Banaba, hăm Tit năm tơ plei Jêrusalem đei năm tơ’bơ̆p bơngai pơgơ̆r gah tơdrong lui wă kơ rơđah hơđăl lăm tơdrong noh. Lu sư đei tơ’bơ̆p Yakơ, Yôhan, Pêtrôs kŭm đei “lu bơngai kiơ̆ gah Pharisi ‘nao kiơ̆ tơdrong lui” kŭm dai đei hơdai na lu sư wă kơ lu bơngai nguaih kơ lu bơngai Israel athei kăt tơdra akar (Tơdrong Jang 15:5). Tuch luch, ‘bok Pêtrôs đei pơma thoi âu: “Bơ̆n băt bơ̆n klaih đơ̆ng tơdrong yoch yua kơ Kră Yang Yêsu ‘mêm mơnat đĕch păng lu bơngai tơmoi kư̆m lei-lăi mơ̆n” (Tơdrong Jang 15:11), Đơ̆ng rŏng kơ noh lu sư đei “rôp ti sơng iŏk dih băl”(trong 9), wă khan lu sư đei drơ̆ng ăn kơ ‘bok Pôl hăm Banaba wă kơ măr sư adrin ră roi Tơdrong ‘Nao ‘Lơ̆ng kơ bơngai tơmoi.
Lu bơ̆n phŏ đei tơchĕng ‘bar pang thoi âu: Mă 1 lu bơ̆n nhen thoi khul bơngai lui kiơ̆ tơdrong lui Juđê, athei đĭ đăng bơngai lui kiơ̆ kơ “tơdrong juăt” so. Lu bơ̆n đei pơthim ming tơdrong pŭ trăp kơ ‘nhŏng oh bơ̆n, thim tơdrong âu, thim tơdrong to. Mă 2, lơ wơ̆t bơ̆n ưh kơ wă thim tơdrong ‘nao. Phŏ bơ̆n tơchĕng khan bơ̆n hloh kơ bơngai nai păng khan “Yang Bơhngol ‘Lơ̆ng khan kơ inh”, păng bơ̆n khan “bơngai bơtho âu iă dêh pran dêh, bơtho ‘nao plơ̆ng” v.v…mă lei bơ̆n ưh kơ lăng rơđah kơ tơdrong noh hăm đei lăm nơ̆r ‘Bok Kei-Dei drơ̆ng hơdai tơdrong noh dah ưh.
Mă khan ‘bok Pôl sư đei bơtho Tơdrong ‘Nao ‘Lơ̆ng sư noh đơ̆ng Kră Yang ăn kơ sư kơ dih ưh kơ sĭ sư mơ̆ng đơ̆ng bơngai nai ôh, mă lei sư kŭm băt wă kơ tơproh hăm tơdrong bơtho đơ̆ng lu bơngai nai nai bơtho mơ̆n. Mă lei lăm khŭl bơngai lui tơplei Galati nâu jơ̆ hŭt Tơdrong ‘Nao ‘Lơ̆ng mă sư lu sư đei iŏk đơ̆ng lu Jơ̆ng ƀang tơpă kơ Kră Yang na kiơ̆ “tơdrong ‘nao ‘lơ̆ng pha”ưh kơ đei drơ̆ng đơ̆ng khŭl bơngai jơ̆ng ƀang Kră Yang.
Lu bơ̆n nhen thoi khul ayơ? Nhen thoi lu bơngai lui Juđê nhen thoi chĭt bơ̆n hăm bơngai nai lăm “khôi juăt so” lei mă nhen thoi lu bơngai Galati ưh kơ đei tơchĕng lăm tơdrong mă bơ̆n đei mơ̆ng đe nai bơtho tơdrong ‘nao plơ̆ng.
Ơ Kră Yang, Inh bơnê kơ Ih yua kơ dang ei inh đei bơih nơ̆r đơ̆ng Ih tơgŭm lu bơngai Jơ̆ng ‘bang đei chih keh đang bơih nơ̆r ‘Bok Kei-Dei. Apinh ih tơgŭm inh băt tơchĕng pơ’lơ̆ng dôm tơdrong đei bơtho lăm nơ̆r Ih. Yua anăn Kră Yang Yêsu Krist, Amen!
‘Bai pơhrăm năr âu bơtho lu bơ̆n tơdrong kiơ?
Đŏk Sơ̆p Hla bơar ‘Bok Kei-Dei lăm pêng sơnăm: Luka 15
Kênh Youtube BHKTHN:
