Klei Aê Diê Blŭ: II Klei Yăl Dliê 32:9-20
Êlan kliăng: “Aê Diê jing anôk hmei đuĕ dăp leh anăn klei ktang hmei, pô kăp dŏng hmei hlăm mông knap mñai. Kyuanăn hmei amâo srăng huĭ ôh wăt tơdah mâo klei bi mlih lăn ala, wăt tơdah čư̆ lĕ hlăm êa ksĭ.” (Klei Mmuñ Hđăp 46:1-2)
Klei êmuh ksiêm mĭn: Ya mnêč Y-Sênakêrip yua wang čiăng ngă kơ phung ƀuôn sang Yuđa? Ya hdră Mtao Hêsêkia ngă čiăng bi kdơ̆ng? Tơdah yang jhat rah klei đing, klei huĭ hyưt hlăm ai tiê, si drei ngă čiăng bi kdơ̆ng?
Êjai Y-Sênakêrip mtao Asiri dôk wang ƀuôn Lakis giăm ƀuôn Yêrusalem, ñu tiŏ nao leh phung dĭng buăl ñu nao bi huĭ phung ƀuôn sang Yuđa ti Yêrusalem čiăng kơ phung ƀuôn sang êdu ai leh anăn tŭ klei amâo lŏ dưi. Mtao Sênakêrip ksŭng ngă hŏng đa đa klei êmuh “Kơ ya mnơ̆ng diih knang tơl diih bi kdơ̆ng hŏng klei arăng wang čiăng ngă kơ ƀuôn Yêrusalem? (êlan 10). Diih amâo thâo ôh hĕ ya klei mtao Asiri ngă leh kơ dŭm ala čar, leh anăn mâo hlei yang phung ƀuôn sang bi mtlaih diñu mơ̆ng kngan mtao Asiri? Snăn đăm đăo, đăm hmư̆ ôh klei mtao Hêsêkia mplư leh anăn atăt gai, kyua Aê Diê phung ƀuôn sang Yuđa amâo dưi bi mtlaih digơ̆ mơ̆ng kngan ñu ôh.
Phung dĭng buăl Y-Sênakêrip ăt lŏ blŭ lu klei mkăn bi kdơ̆ng hŏng Yêhôwa Aê Diê leh anăn bi kdơ̆ng hŏng dĭng buăl gơ̆ Y-Hêsêkia. Leh anăn, Mtao Sênakêrip čih hră mưč kơ Yêhôwa leh anăn lač yang phung ƀuôn sang amâo bi mtlaih ôh phung ƀuôn sang pô mơ̆ng kngan mtao Asiri snăn yang mtao Hêsêkia ăt srăng msĕ snăn mơh.
Mtao brei phung dĭng buăl ur driâo hŏng klei blŭ Yuđa čiăng kơ phung ƀuôn sang krưp huĭ. Diñu lač Aê Diê Yêrusalem amâo mdê ôh hŏng yang phung ƀuôn sang mkăn, jing bruă kngan mnuih ngă sơăi.
Mtao Sênakêrip yua mnêč bi rŭng ai tiê hŏng tlâo mnêč: mdưm klei êmuh ngă klei bi đing, čih hră bi krưp huĭ, ngă bi êdu ai mnuih ƀuôn sang čiăng kơ digơ̆ huĭ hyưt leh anăn tŭ klei amâo lŏ mâo klei dưi. Mtao lŏ ksŭng ngă hlăm klei đăo phung ƀuôn sang Yuđa kơ Aê Diê kpă ênô, Pô digơ̆ đăo knang; yua klei blŭ luar bi kdơ̆ng hŏng knuih leh anăn klei myang Aê Diê tơdah lač Aê Diê ăt msĕ hŏng phung yang hơăi mang.
Čiăng bi kdơ̆ng hŏng klei anăn, Mtao Hêsêkia leh anăn Khua pô hưn êlâo Y-Êsai “wah lač kyua klei anăn leh anăn ur krao kơ adiê” (êlan 20). Ti anăp klei Mtao Asiri bi kdơ̆ng, dua čô dĭng buăl sĭt suôr Aê Diê knang kluôm dhuôm kơ Aê Diê, mđing kơ Ñu wah lač leh anăn akâo kơ ur krao kơ Ñu srăng bi mtlaih.
Mnêč phung yang jhat jing duah hdră ngă kơ drei đing, huĭ hyưt leh anăn luč klei đăo knang kơ Khua Yang, boh nik hlăm boh klei dleh dlan. Khua ƀĭng kna Y-Pôl mñă klă, drei bi blah, amâo djŏ hŏng kđeh leh anăn êrah ôh ƀiădah bi kdơ̆ng hŏng phung yang jhat (Êphêsô 6:12). Yang jhat mplư drei đăo Khua Yang amâo srăng bi mtlaih ôh, Ñu srăng jao drei hlăm klei knap mñai tơl djiê (êlan 11). Boh nik, diñu rah klei đing Aê Diê amâo mâo klei myang ôh leh anăn amâo sĭt ôh! Phung ƀuôn sang Aê Diê đăm hmư̆ ôh klei yang jhat mplư “kyuadah ñu jing pô luar leh anăn ama klei luar” (Y-Yôhan 8:44). Brei jih ai tiê knang kơ Khua Yang, mđing kơ Ñu, wah lač hŏng Ñu kyua drei thâo Aê Diê jing Pô sĭt nik, myang hĭn leh anăn mâo klei khăp dôk mbĭt nanao hŏng drei.
Mâo mơ̆ tăp năng drei đing kơ klei myang leh anăn klei khăp Khua Yang?
Wah lač: Ơ Khua Yang, akâo kơ Ih đru kâo jhŏng wĭt lač hŏng lăn ala leh anăn yang jhat wăt tơdah klei hdĭp dleh dlan dưn mơh kâo ăt knang nanao hlăm Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Y-Pêtrôs 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
