2 Xwmtxheej Vajntxwv 32:9-20
Nqe cim:
“Vajtswv yog peb lub chaw nkaum thiab yog peb lub dag lub zog, thaum twg peb muaj kev txomnyem nws npaj txhij pab peb. Txawm yog lub ntiajteb no qeeg ua zog koog thiab tej roob saus tas rau hauv qabthu hiavtxwv” (Ntawv Nkauj 46:1-2)
Lus nug rau sawvdaws xav:
– Vajntxwv Xenakhelis siv tej tswvyim phem dabtsi los tawmtsam cov Yudas?
– Vajntxwv Hexekiyas siv kev tawmtsam los ntawm qhov twg?
– Thaum dab Ntxwjnyoog tseb kev ua xyem xyav, hauv lub siab ntshai, peb yuav ua li cas tawmtsam?
Cov Axilias tus vajntxwv Xenakhelis thiab nws cov tubrog tabtom vij lub nroog Lakhis uas nyob ze lub nroog Yeluxalees, Xenakhelis txib nws cov tubtxib tuaj hem cov Yudas uas nyob hauv Yeluxalees kom lawv poob siab thiab ua cov swb nws. Vajntxwv Xenakhelis tawmtsam cov Yudas los ntawm qee lo lus hem nug lawv, “Kuv nug hais tias dabtsi ua rau nej tso siab nyob hauv lub nroog Yeluxalees uas luag twb vij tas lawm?” (nqe 10). Nej txawm tsis paub tej yam ua vajntxwv Axilias tau ua rau lwm lub tebchaws los lawm lov? Nej tsis txhob ntseeg, tsis txhob mloog tej lus dag ntawm vajntxwv Hexekiyas lawm, yuav ua li cas cov Yudas tus Vajtswv thiaj cawm tau nej? Cov Axilias tej nomtswv hais lus thuam tus TSWV uas yog Vajtswv thiab thuam Hexekiyas uas yog tus TSWV tus tubtxib. Tom qab ntawd Xenakhelis sau ib tsab ntawv tuaj thuam tus TSWV uas yog cov Yixalayees tus Vajtswv hais tias, “Lwm haivneeg tej vajtswv twb cawm tsis tau lawv dim ntawm kuv txhais tes, txawm yog Hexekiyas tus Vajtswv los yeej cawm tsis tau nws haivneeg dim ntawm kuv txhais tes li thiab.” Cov Axilias tej nomtswv cem ua lus Henplais nrov nrov kom cov neeg hauv nroog Yeluxalees uas tuaj nyob saum tus ntsayeej hnov lawv ntshai thiab poob siab. Lawv hais tias, lub nroog Yeluxalees tus Vajtswv kuj zoo ib yam li lwm haivneeg tej vajtswv uas yog neeg txhais tes puab thiab xwb.
Vajntxwv Xenakhelis siv peb lub tswvyim phem los hem cov Yudas: Siv lus nug kom lawv ua xyem xyav, sau ntawv hem thiab lus thuam kom cov Yudas poob siab cia lawv lees swb nws. Xenakhelis tseem ua rau cov Yudas sab kev ntseeg txog Vajtswv tus uas yog qhov tseeb, kev vamkhom Vajtswv ua yojyees. Nws siv tej lus thuam Vajtswv tus ua muaj hwjchim loj kawg nkaus thiab muab Vajtswv piv rau tej vajtswv uas tsis muaj qabhau kom lawv tsis tso siab rau Vajtswv.
Vajntxwv Hexekiyas tau tawm tsam tus vajntxwv Xenakhelis tej lus hem ib yam li tus cevlus Yaxayas los ntawm “quaj thov Vajtswv pab” (nqe 20). Thaum tabmeeg ntawm vajntxwv Axilias tej lus tuam mom Vajtswv, Vajntxwv tso siab plhuav rau Vajtswv thiab tig mus thov Vajtswv pab.
Dab Ntxwjnyoog lub tswvyim yog muab lus hem thiab lus nug kom peb ua xyem xyav tsis ruaj khov rau Vajtswv, kom ntshai thiab poob kev ntseeg txog Vajtswv, thaum muaj kev txomnyem. Timthawj Paulus tau ntuas cov ntseeg hais tias, tsis yog tawmtsam tibneeg tiamsis yog tawmtsam tej hwjchim tsaus ntuj uas yog dab Ntxwjnyoog (Efexus 6:12). Dab Ntxwjnyoog pheej dag ntxias kom cov ntseeg tsis tso siab rau Vajtswv, kom cov ntseeg ua xyem xyav hais tias ntshai Vajtswv tsis pab cawm peb thiab peb yuav raug kev txomnyem mus txog thaum tuag (nqe 11). Tsis tas li ntawd xwb, dab tseem tseb kev ua xyem xyav rau peb hais tias Vajtswv tsis muaj hwjchim thiab tsis muaj tseeb! Cov ntseeg yuav tsum ceevfaj tsis txhob mus mloog dab lus “rau qhov nws yeej yog tus niag dag thiab nws yog txhua tus uas dag leej txiv” (Yauhas 8:44). Cia li tas siab vamkhom Vajtswv, tig mus rau ntawm Vajtswv, thov Vajtswv pab, vim paub hais tias Vajtswv yog qhov tseeb, muaj hwjchim thiab muaj kev hlub tsis hloov li.
Thov Vajtswv,
Vajtswv, thov pab nyuam yaus muaj zog khov kho teb tau lub ntiajteb no thiab dab Ntxwjnyoog tej lus dag ntxias, lus hem, lus tawmtsam los ntawm txoj kev vamkhom Koj kawg siab ntsws. Nyuam yaus tuav Tswv Yexus Khetos lub npe thov, Amees.
Puas muaj tej lub sijhawm uas peb ua xyem xyav rau Vajtswv lub hwjchim thiab Nws txoj kev hlub?
Nyeem Vajluskub hauv peb lub xyoos: 1 Petus 2
Kênh Youtube BHKTHN:
