Klei Aê Diê Blŭ: Klei Mtô Mñă Klei Bhiăn 11:12-23
Êlan kliăng: “Ih jing Khua Yang kâo; kâo amâo mâo klei jăk ôh mơ̆ng pô mkăn.” (Klei Mmuñ Hđăp 16:2b)
Klei êmuh ksiêm mĭn: Si klei jăk mơak Aê Diê brei kơ phung ƀuôn sang Ñu? Ya bruă brei phung ƀuôn sang Aê Diê ngă čiăng mâo klei jăk mơak? Ya klei diih akâo hlăm hruê akŏ thŭn mrâo tơdah thâo knŏng hjăn Khua Yang yơh jing akŏ phŭn klei jăk mơak?
Phung Asia krĭng Ngŏ bi mĭn kơ “êma klei jăk mơak” snei: klei mdrŏng sah, klei mpŭ, klei hdĭp jŏk, klei suaih pral leh anăn klei êđăp ênang. Mŭt hlăm thŭn mrâo lu mnuih khăng bi hơêč hmưi hdơ̆ng găp êma mta klei jăk mơak anei msĕ si sa klei mưng ƀiădah amâo mđing mĭn kơ boh tŭ si jing ôh. Trăn Klei Aê Diê Blŭ hruê anei brei drei ƀuh klei mdrŏng sah (êlan 14-15), klei hdĭp sui (êlan 21) leh anăn klei êđăp ênang (êlan 23) jing klei jăk mơak mơ̆ng Aê Diê sơăi mâo klei dưi brei kơ phung ƀuôn sang Ñu, leh anăn knŏng hjăn Ñu yơh jing Pô brei klei jăk mơak amâodah bi truh klei tăm pah tui si klei diñu gưt asăp (êlan 26-28). Tơl wăt klei Aê Diê dưi bi mbliư̆ klei jŭ jhat jing klei jăk mơak (Klei Mtô Mñă Klei Bhiăn 23:5). Hlăm êlan 16, Khua Yang hưn êlâo brei diñu răng amâo dưi knang kơ rup yang mkăn hlăm čar Kanaan huĭdah diñu mĭn rup yang anăn ba hriê êa hjan đru lăn brei boh leh anăn brei hlô mnơ̆ng rông đĭ kyar. Ƀiădah boh sĭt gơ̆, hlăk diñu lui wir Khua Yang,“Yêhôwa čuh ai ngêñ kơ diih, leh anăn Ñu kđăl adiê, snăn amâo mâo êa hjan ôh, lăn amâo brei boh ôh, leh anăn diih rai tuč djăl mơ̆ng čar jăk Yêhôwa brei kơ diih.” (êlan 17).
Lu mnuih hruê anei hmăng hmưi klei jăk mơak tui si hdră êlan mdê mdê. Hruê Tết diñu kna ti anăn pia (tui si klei Yuăn) pă mta boh kroh, mâo: boh kčĭl, boh tai hung, boh đung, boh soai, dăp ti knưl ngă yang čiăng hưn klei diñu hmăng hmưi, “akâo mâo djăp yua”! amâo ƀiă ôh mnuih nao ti anôk diñu kkuh mpŭ, myơr mnơ̆ng ngă yang kơ yang anei yang adih hŏng klei hmăng hmưi kơ thŭn mrâo klei bruă duah ƀơ̆ng đĭ lu… hŏng Khua Yang amâo tuôm mâo ôh klei ƀri myun amâodah ƀri jhat, klei mdian, amâodah yua prăk kăk pioh blei klei jăk mơak. Êlan 12-13 leh anăn 18-19 brei thâo, čiăng mâo klei jăk mơak brei kkuh mpŭ kơ Aê Diê leh anăn gưt ngă tui si Klei Ñu Blŭ. Klei Mmuñ Hđăp 1:1-2 ăt mtô msĕ mơh,“Jăk mơak yơh mnuih amâo êbat ôh tui si klei phung ƀai kčĕ, kăn dôk rei hlăm êlan phung soh, kăn dôk gŭ rei mbĭt hŏng phung mưč. Ƀiădah ñu mơak hlăm klei bhiăn Yêhôwa, leh anăn ñu dôk mĭn kơ klei bhiăn anăn hruê mlam.”
Klei jăk mơak hlăm kđeh đru phung ƀuôn sang Aê Diê mâo klei hdĭp trei mđao. Ƀiădah lĕ, klei anăn amâo djŏ jing klei kñăm knhal tuč kơ drei ôh, kyua tơdah drei yap yuôm đei, huĭdah klei anăn srăng bliư̆ jing klei jhat. Kyuadah klei kđeh tluh srăng mplư drei wơr bĭt amâodah lui wir Khua Yang. Khua Yang hưn leh êlâo brei răng:“Tơdah Yêhôwa Aê Diê ih atăt ih mŭt hlăm čar Ñu kat asei leh kơ phung aê đưm ih,… Tơdah ih srăng ƀơ̆ng leh anăn trei, răng bĕ huĭdah ih wơr ƀĭt Yêhôwa, pô atăt ih leh kbiă mơ̆ng čar Êjip mơ̆ng sang klei jing hlŭn.” (Klei Mtô Mñă Klei Bhiăn 6:10-12; Klei Bi Hriêng 30:8-9). Grăp čô drei brei dlăng phă klei jăk mơak myang jăk siam leh anăn yuôm bhăn, kyuadah klei jăk mơak hlăm kđeh êlưih bliư̆ jing klei mplư leh anăn klei jŭ jhat.
Khua Yang jing akŏ phŭn klei jăk mơak leh anăn knŏng hjăn Ñu yơh jing Pô brei klei jăk mơak. Grăp čô drei nao bĕ kơ Khua Yang hlăm hruê akŏ thŭn mrâo (Thŭn Mlan Ƀlĕ) čiăng ƀuăn rơ̆ng hŏng Ñu, mŭt hlăm thŭn mrâo kâo srăng tui duah klei jăk mơak myang mơ̆ng jih anôk hlăm adiê.
Mơ̆ng anôk klei jăk mơak drei dôk tui duah?
Wah lač: Ơ Ama, bi mni lač jăk kơ Ama jing akŏ phŭn klei jăk mơak kơ kâo, kâo čuăn gưt leh anăn kkuh mpŭ knŏng kơ hjăn Ih. Akâo Ih đru kâo tui duah klei jăk mơak myang mơ̆ng jih anôk hlăm adiê, čiăng kơ kâo srăng jing akŏ klei jăk mơak kơ lu mnuih mkăn msĕ mơh. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mphŭn Dơ̆ng 41
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
