Klei Aê Diê Blŭ: II Kôrantô 13:1-4
Êlan kliăng: “Nĕ anei jing tlâo bliư̆ yơh kâo nao kơ diih. “Jih klei kčŭt arăng srăng bi sĭt hŏng klei dua amâodah tlâo čô hưn”. Kâo hưn leh kơ phung ngă soh leh êlâo brei diñu răng, leh anăn kâo brei jih jang phung mkăn răng mơh, leh anăn kâo brei diñu răng ară anei êjai kâo êkŭt, msĕ si kâo ngă leh êjai kâo nao čhưn kơ diih tal dua, tơdah kâo lŏ truh kâo amâo srăng pap kơ diñu ôh” (II Kôrantô 13:1-2)
Klei êmuh ksiêm mĭn: Ya klei phung đăo Kôrantô čiăng kơ Khua ƀĭng kna Y‑Pôl ngă? Si ñu lŏ wĭt lač? Ya klei hriăm mñă kơ diih leh anăn Sang Aê Diê?
Khua ƀĭng kna Y‑Pôl hưn klei ktang, klei kjăp pô amâo djŏ hŏng hdră kñăm hưn kơ pô ôh ƀiădah kyua mâo sa êpul phung đăo ti Kôrantô tui hlue klei mplư phung khua ƀĭng kna mgưt lông dlăng klei dưi ñu, digơ̆ brei mâo klei bi mklă ya klei Khua ƀĭng kna Y‑Pôl mtô jing hriê mơ̆ng Aê Diê (êlan 3a), lŏ lač Khua ƀĭng kna Y‑Pôl tơdah čih hră snăn ktang ƀiădah leh ñu truh hŏng digơ̆ snăn êdu awăt, klei ñu blŭ amâo yuôm ôh (II Kôrantô 10:10).
Khua ƀĭng kna Y‑Pôl hưn leh rup Khua Yang Yêsu Krist “Arăng pơ̆ng Ñu ti kyâo bi kal hlăm klei Ñu awăt, ƀiădah Ñu hdĭp hŏng klei myang Aê Diê. Kyuadah hmei jing awăt hlăm Ñu, ƀiădah hlăm klei hmei bi mguôp hŏng diih, hmei srăng dôk hdĭp mbĭt hŏng Ñu hŏng klei myang Aê Diê” (êlan 4a), anei jing klei sĭt nik phung đăo Kôrantô thâo sơăi leh anăn đăo, mơ̆ng anăn ñu thâo phung dôk hlăm Krist leh anăn ñu pô wăt tơdah êdu awăt ƀiădah kyua klei myang Khua Yang Yêsu kbiă lŏ hdĭp čiăng lŏ hdĭp hŏng Ñu leh anăn jing ktang “hmei bi mguôp hŏng diih” (êlan 4b). Kyua anăn hlăm gưl tal tlâo nao hŏng digơ̆, ñu srăng brei klei myang Khua Yang kbiă lŏ hdĭp mă bruă hlăm phung ayŏng adei ngă soh čiăng bi mklă ñu jing khua ƀĭng kna sĭt mơ̆ng Khua Yang.
Khua ƀĭng kna Y‑Pôl tuôm lač kơ phung đăo Kôrantô ngă ngơi mang kơ bruă ayŏng adei pô ngă soh, knuih anei amâo đru ôh kơ bruă bi mđĭ ai ayŏng adei hlăm Krist, ƀiădah lŏ ngă kơ phung ngă soh hơĭt ai tiê lŏ dơ̆ng ngă soh (I Kôrantô 5:2). Ƀiădah Khua ƀĭng kna Y‑Pôl brei thâo ñu srăng nao hŏng digơ̆ “…amâo srăng pap kơ diñu ôh”, amâo djŏ kyua ñu kƀah klei khăp amâodah ngă mgao čiăng bi êdah klei dưi khua ƀĭng kna pô ôh, ƀiădah kyua ñu hưn brei răng leh lu blư̆ ƀiădah digơ̆ ăt khăng ai tiê, anăn tơdah ñu nao hŏng digơ̆ tal tlâo snăn diñu srăng thâo pô mă bruă kơ Aê Diê mă klei dưi mơ̆ng Aê Diê čiăng ngă bruă hlăm mngăt ti krah phung amâo mâo kmhal.
Tơdah drei bi mlih Sang Aê Diê Kôrantô hŏng Sang Aê Diê alŭ wăl pô snăn si Khua ƀĭng kna Y‑Pôl srăng lač hŏng drei? Klei hriăm mñă kơ drei Aê Diê gĭr snăk hŏng phung ƀuôn sang ƀiădah Ñu srăng bi kmhal tơdah drei amâo kmhal klei soh. Phung đăo wăt tơdah đăo leh kơ Khua Yang ƀiădah ăt lĕ hlăm klei soh mơh, klei yuôm bhăn hĭn jing phung ngă soh thâo kmhal klei soh êlâo kơ êgao mmông.
Drei kmhal klei soh mtam mơ̆ tơdah ƀuh pô ngă soh hŏng Khua Yang?
Wah lač: Ơ Aê Diê! Kâo bi mni kơ Ih kyua bi tui leh kâo leh anăn gĭr ƀuah mkra, bi hriăm kâo hlăm grăp hruê. Akâo kơ Ih đru kâo krăng hriăm Klei Aê Diê Blŭ čiăng mơ̆ng Klei Ih Blŭ kâo thâo leh si pô soh čiăng hmao kmhal êlâo kơ êgao mmông.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 8:26-9:9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
