Klei Aê Diê Blŭ: Klei Mtô Mñă Klei Bhiăn 28:46-57
Êlan kliăng: “Klei tăm pah anăn srăng dôk ti dlông diih jing sa klei bi knăl leh anăn klei yuôm bhăn, leh anăn dôk ti dlông phung anak čô diih nanao hlŏng lar.” (Klei Mtô Mñă Klei Bhiăn 28:46)
Klei êmuh ksiêm mĭn: Y-Môis čih klă mngač kơ klei truh jhat tăm pah kơ phung ƀuôn sang Aê Diê hbĭl srăng truh? Hlăm ya boh klei dŭm klei tăm pah anei srăng jing hơăi mang? Si drei hdĭp čiăng dưi mâo klei jăk mơak Aê Diê brei?
Kdrêč 28 hdruôm hră Klei Mtô Mñă Klei Bhiăn čih klă mngač kơ klei truh jhat huĭ hyưt snăk srăng mâo tơdah phung ƀuôn sang Israel amâo hdĭp hlue si Klei Aê Diê Blŭ mtô. Dŭm klei truh mơ̆ng klei tăm pah Y-Môis lač hlăm trăn anei jing klei truh kơ phung roh nao blah, tlĕ mnơ̆ng, klei ư̆ êpa, tơl phung êkei mduôn awăt amâodah phung mniê êwang êweh hĭn srăng ƀơ̆ng boh mơ̆ng tian prôč diih pô, kđeh phung anak êkei leh anăn anak mniê diñu! Anei jing sa klei bŏ hŏng huĭ hyưt luč jih knuih anak mnuih klă sĭt grăp čô huĭ snăk tơdah hmư̆ klei anei. Klei bi êdah kơ klei tăm pah Aê Diê srăng tuh kơ phung ƀuôn sang Israel tơdah diñu amâo gưt asăp hŏng Aê Diê huĭ hyưt tơl lu mnuih ƀuh kjham đei, boh nik mâo mnuih lŏ lač Aê Diê amâo mâo klei pap ôh tơdah ngă snăn hŏng sa djuê ana jing phung Ñu pioh hjăn snăn.
Khădah snăn Klei Aê Diê Blŭ brei ƀuh klei tăm pah kjham anăn srăng truh tơdah phung ƀuôn sang Ñu khăng ai tiê amâo gưt asăp Aê Diê đuč. Kyua klei tăm pah čih hlăm trăn anei amâo djŏ jing klei hưn êlâo kơ klei srăng truh kơ phung ƀuôn sang Aê Diê hlăm mgi dih ôh, ƀiădah ñu srăng jing sĭt tơdah phung ƀuôn sang Aê Diê amâo êbat hlăm êlan Ñu, lui Aê Diê diñu čiăng kkuh kơ rup yang ti êngao. Tơdah phung ƀuôn sang Israel hdĭp djŏ hlue si klei bi mguôp diñu ƀuăn leh hŏng Aê Diê snăn klei hưn brei răng kơ klei tăm pah anei srăng jing hơăi mang leh anăn klei ƀuăn rơ̆ng jăk Ñu brei kơ phung ƀuôn sang diñu srăng jing sĭt.
Hruê anei, drei hdĭp hlăm ênuk klei pap, ƀiădah klei ƀuăn jăk mơak mơ̆ng Aê Diê mâo nanao klei mtui, anăn jing tơdah drei mă bruă kơ Aê Diê, drei hdĭp djŏ hlue si klei Aê Diê mtô. Bi tơdah drei hdĭp mgưt, ai tiê khăng, hmư̆ ƀiădah amâo hlue ngă ôh snăn boh jhat srăng tŭ jing klei tăm pah lĕ kơ drei. Pô doh jăk, kpă ênô srăng bi kmhal tơdah drei ngă soh, ƀiădah Aê Diê bi êdah klei khăp hŏng phung ƀuôn sang Ñu tơdah Ñu hưn êlâo hlăm Klei Aê Diê Blŭ kơ klei bi kmhal čiăng kơ drei ktư̆ huĭ leh anăn hdĭp gưt asăp Aê Diê. Leh anăn wăt tơdah drei amâo gưt asăp, Khua Yang bi kmhal drei, Ñu ăt bi êdah klei khăp Ñu kyua “Khua Yang ƀuah mkra phung Ñu khăp” čiăng đru drei thâo, kmhal čiăng dưi dưn klei jăk mơak Aê Diê brei. Brei bi mni nanao kơ Aê Diê leh anăn hdĭp gưt asăp ñu, kyua klei Ñu khăp kơ drei prŏng snăk.
Drei hdĭp djŏ hŏng bruă klam pô hlăm klei bi mguôp hŏng Khua Yang mơ̆?
Wah lač: Ơ Khua Yang jing Pô kpă ênô, bŏ hŏng klei khăp, akâo kơ Ih đru kâo hdĭp gưt asăp Ih leh anăn êbat hlăm êlan Ih. Grăp blư̆ kâo amâo gưt asăp Ih, akâo kơ Ih đru kâo thâo, kmhal klei soh čiăng kơ kâo thâo klei jăk mơak Aê Diê brei grăp hruê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Hêbrơ 11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
