II Kevcai 28:46-57
Nqe cim:
“Tej xwmtxheej no yog lub cim uas qhia txog Vajtswv txojkev txiav txim rau nej thiab nej tej xeebntxwv mus tas ibtxhis li” (2 Kevcai 28:46)
Lus nug rau sawvdaws xav:
– Mauxes qhia hais tias tej lus foom tsis zoo yuav los raug tus Tswv haivneeg thaum twg?
– Yuav ua cas thiaj qaij dhau tej lus foom tsis zoo?
– Peb yuav tsum ua neej zoo li cas kom tau txais tej koob hmoov tus Tswv pub?
Nyob hauv phau 2 Kevcai tshooj 28 qhia txog tej teebmeem txaus ntshai uas yuav los raug cov Yixalayees yog hais tias lawv tsis ua neej raws li tus Tswv tej lus qhia. Tej teebmeem txaus ntshai uas Mauxes qhia txog hauv ntu Vajluskub no feem ntau yog hais txog teebmeem ntawm lwm haivneeg tuaj tua, tuaj huab noj thiab kev tshaib nqhis. Tej teebmeem no hnyav txog qib uas tus txivneej thiab tus pojniam uas muaj lub siab dawb siab zoo tshajplaws los tseem muab tej menyuam los noj! Tej no yog yam uas yuav muaj los txaus ntshai kawg li, leejtwg hnov txog los yeej ntshai ib ce tshee hnyo. Vajtswv tej lus foom tsis zoo yuav los raug rau cov Yixalayees thaum lawv ntxeev siab rau tus Tswv. Tej ntawd txaus ntshai txog qib uas coob leej xav hais tias lub txim ntawd hnyav kawg nkaus li, luag yuav xav hais tias Vajtswv tsis muaj kev hlub txog haivneeg uas Nws xaiv tseg lawm.
Txawm li ntawd los Vajtswv Txojlus qhia meej hais tias, tej lus foom tsis zoo ntawd tsuas los raug thaum tus Tswv haivneeg muaj lub siab tawv tsis ua raws li lawv tej lus cogtseg rau tus Tswv lawm xwb. Vim tej lus foom tsis zoo hauv tshooj no tsis yog tej lus hais txog yam yuav muaj los rau tus Tswv haivneeg yav tomntej, tiamsis tej ntawd tsuas tshwmsim thaum tus Tswv haivneeg tsis mus raws li tus Tswv txojkev thiab tso lawv tus Vajtswv tseg mus pe lwm haivneeg tus vajtswv xwb. Thaum cov Yixalayees ua neej raws nraim li lawv tej lus cogtseg rau tus Tswv ces tej lus foom tsis zoo uas hais tseg hauv ntu Vajluskub no yuav tsis tshwmsim los thiab tus Tswv tej lus foom koob hmoov yuav muaj tiav rau Nws haivneeg.
Niaj hnub nimno, peb ua neej nyob hauv tiam koobhmoov, tiamsis tus Tswv tej lus cogtseg yuav foom koob hmoov kuj taij kom peb yuav tsum ua haujlwm raws Vajtswv siab nyiam, yuav tsum mloog tus Tswv lus, ua neej raws nraim li tus Tswv tej lus qhia thiaj yuav tau txais. Tiamsis yog peb ua neej rov qab, ua neeg ntsejmuag ncaj siab nkhaus, muaj lub siab tawv, hnov tiamsis tsis ua raws, ces thaum kawg yeej yuav raug Vajtswv tej lus foom tsis zoo xwb. Vajtswv tus uas dawbhuv, tus ncaj ncees yeej yuav rau txim thaum peb ua txhaum, tiamsis tus Tswv qhia tshwm Nws txojkev hlub rau Nws haivneeg thaum Nws ceebtoom ua ntej hais tseg hauv Vajluskub txog kev txiav txim, kom lawv paub ntshai thiab tig los ua raws li Nws tej lus qhia. Txawm peb yuav tawv ncauj thiab yeej yuav raug tus Tswv rau txim, los tus Tswv tseem hlub peb vim; “tus Tswv qhuab ntuas txhua tus uas nws hlub” kom peb tsim dheev rov los lees txim thiab tso kev txhaum tseg thiaj yuav tau txais tus Tswv tej koobhmoov. Cia li nco tus Tswv txiajntsig thiab ua lub neej raws li Nws tej lus qhia, vim tus Tswv txojkev hlub pub rau peb loj kawg nkaus li.
Thov Vajtswv:
Tus Tswv uas ncajncees thiab muaj kev hlub, thov pab nyuam yaus ua tau lub neej mloog Koj lus thiab mus raws Koj txoj kev. Thaum nyuam yaus tsis mloog lus, thov qhuab ntuas kom nyuam yaus paub tsim dheev, lees txim thiab tso kev txhaum tseg kom tau txais Koj txoj koobhmoov txhua hnub. Nyuam yaus tuav Cawmseej Tswv Yexus lub npe thov, Amees.
Ib tsoom cov mloog uas hmov thiab tshua,
Peb puas ua neej kom tsimnyog nyob hauv kev coglus rau tus Tswv lawm tau?
Nyeem Vajluskub hauv peb lub xyoos: Henplais 11
Kênh Youtube BHKTHN:
