Klei Aê Diê Blŭ: Klei Kbiă 32:7-10
Êlan kliăng: “Đăm brei arăng mplư diih ôh; arăng amâo dưi mưč kơ Aê Diê ôh. Kyuadah ya mjeh arăng rah, ñu srăng wiă boh anăn mơh.” (Galati 6:7)
Klei êmuh ksiêm mĭn: Tui si klei dlăng Aê Diê, snăn ya jing klei soh? Si klei Aê Diê wĭt ngă hŏng klei soh phung ƀuôn sang? Ya klei mñă leh anăn klei hưn brei drei thâo mơ̆ng klei anei?
Hruê anei, lu mnuih dôk tui hlue êlan klei mĭn plă pliê, amâo mâo ya mta klei jing djŏ amâodah jing soh ôh, amâo mâo klei sĭt nik ôh, djăp mta klei hlue si klei grăp cô bi mĭn mdê mdê. Kyuanăn, klei soh ăt jing sa mta êlan klei mĭn plă pliê mơh. Ƀiădah klei đăo kơ Krist dưm ti dlông tur hdruôm hră Klei Aê Diê Blŭ jing Klei Blŭ mơ̆ng Aê Diê. Klei soh amâo bi kčah tui si klei mĭn mnuih ôh, ƀiădah mơ̆ng Aê Diê pô. Tơdah Aê Diê lač kơ ya mta klei jing soh snăn klei anăn jing soh yơh!
Tơdah ƀuh phung ƀuôn sang Israel kkuh mpŭ kơ rup yang êđai êmô mah, Aê Diê lač kơ Y-Môis: “phung ƀuôn sang ih, phung ih bi kbiă leh mơ̆ng čar Êjip, bi čhŏ leh diñu pô” (êlan 7). “Bi čhŏ” mblang jing klei êran nao kơ klei ram rai, dlưh rai, rai luč. Aê Diê mblang hlăm êlan 8-9, “bi čhŏ” jing “lui klei bhiăn Kâo mtă”, jing “buôn kkuh ti anăp rup êmô anăn leh anăn myơr mnơ̆ng ngă yang kơ rup yang”, jing klei diñu lač snei “Ơ Israel, nĕ anei yang ih, pô bi kbiă ih leh mơ̆ng čar Êjip!”, leh anăn jing sa klei mĭn “khăng kŏ”. Blŭ mdê, phung ƀuôn sang Israel bi čhŏ leh diñu pô, jing ngă soh leh hŏng Aê Diê, kyuadah diñu amâo gưt ngă tui si klei Aê Diê mtă ôh, kkuh kơ rup yang, mtô hưn klei soh čhuai, bi kdơ̆ng leh anăn amâo čiăng hmư̆ Aê Diê leh anăn Klei Aê Diê Blŭ ôh.
Lu phung đăo ăt dôk hơĭt ai tiê kyua mĭndah diñu jing pô đăo sĭt suôr yơh, kyua amâo ngă klei knhông, amâo bi mdjiê mnuih, amâodah tlĕ dăp dŏ dô arăng, ƀiădah drei tuôm mơ̆ ksiêm dlăng wĭt kơ drei pô leh anăn ktư̆ yơ̆ng asei mlei, kyuadah lu blư̆ drei ngă soh hŏng Khua Yang, kyua amâo gưt ngă tui si klei Khua Yang mtô, kyua dưm drei pô amâodah sa čô mnuih mkăn amâodah prăk kăk hrô kơ anôk Aê Diê dôk, leh anăn kyua “khăng kŏ” ti anăp klei mtô mơ̆ng Klei Aê Diê Blŭ, amâodah ti anăp ya mta klei bi knăl Khua Yang hưn êlâo brei răng.
Wăt tơdah Aê Diê dôk atăt gai Y-Môis kơ bruă ngă Sang Čhiăm Kkuh mpŭ, ƀiădah Ñu mjưh mtam bhiâo riâo rit čiăng lač hŏng Y-Môis kơ klei soh phung ƀuôn sang (êlan 7). Klei soh jing sa klei jhat kjham êdimi hŏng Aê Diê, kyuanăn brei êlâo hĭn mkra msir bi leh kơh dưi ngă klei bhiăn klei đăo. Tinei, Aê Diê amâo iêô phung Israel jing “phung ƀuôn sang Kâo” ôh, ƀiădah Ñu iêô jing “phung ƀuôn sang ih” (êlan 7). Kyua mơ̆ng klei soh yơh bi kgăn leh klei bi mguôp ti krah Aê Diê leh anăn phung ƀuôn sang Ñu (Y-Êsai 59:1-2).
Lu mnuih pia kơ ñu pô jing phung đăo kơ Krist ƀiădah ăt amâo gưt ngă tui si Klei Aê Diê Blŭ ôh, ăt amâo thâo bi djŏ ôh hŏng ayŏng amai adei. Wăt tơdah diñu ăt djă pioh klei bhiăn klei đăo hlăm sang Aê Diê, ƀiădah brei hdơr Aê Diê ɃUH klei drei ngă soh (êlan 9), Aê Diê bi êmut kheh kơ klei soh, leh anăn knŏng hjăn sa hdră êlan brei ngă hŏng klei soh, anăn jing lui hĕ kluôm dhuôm (êlan 10). Kyuanăn, brei răng bĕ kơ klei hdĭp drei pô, kyuadah “Arăng amâo dưi mưč kơ Aê Diê ôh. Kyuadah ya mjeh arăng rah, ñu srăng wiă boh anăn mơh” (Galati 6:7).
Ya bruă brei drei ngă tơdah drei ngă klei soh anei?
Wah lač: Ơ Khua Yang, akâo Khua Yang brei kơ kâo klei hdĭp doh jăk, kyuadah Ih pô jing doh jăk. Akâo Ih brei kâo thâo răng gưt ngă tui si Klei Blŭ Khua Yang mtô, leh anăn brei ai tiê kâo amâo kkuh mpŭ kơ pô mkăn ôh knŏng hjăn kơ Ih pô yơh. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsai 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
