Khiavdim 32:7-10
Nqe cim:
“Nej tsis txhob xav yuam kev, yeej tsis muaj ib tug yuav dag tau Vajtswv, txhua tus nyias yuav tsum tau sau raws li tej uas nyias tseb” (Kalatias 6:7)
Lus nug rau sawvdaws xav:
– Ntawm Vajtswv txoj kev ntsia tuaj kev txhaum yog dabtsi?
– Vajtswv muaj tus cwjpwm li cas rau Nws haivneeg tej kev txhaum?
– Hauv zaj no peb tau ntuas thiab ceebtoom txog yam dabtsi?
Niaj hnub nim no, muaj ntau leej hais tias tsis muaj yam twg txhaum thiab tsis muaj yam twg yog, tsis muaj ib yam yog qhov tseeb li, txhua yam yog nyob ntawm tus neeg ntawd ntaus nqi xwb. Vim li ntawd, kev txhaum tsuas yog ib yam uas nyob nruab nrab xwb. Tiamsis cov ntseeg txoj kev ntseeg yog muab Vajluskub uas yog Vajtswv Txojlus ua lub chaw tiag. Kev txhaum tsis yog ntaus nqi raws li neeg txoj kev xav, tiamsis yog los ntawm Vajtswv. Yog Vajtswv hais tias qhov ntawd txhaum ces yog txhaum xwb!
Thaum pom cov Yixalayees pe tus mlom nyuj, Vajtswv hais rau Mauxes: “cov pejxeem uas koj coj nram teb chaws Iziv los, lawv ua txhaum thiab tso kuv tseg lawm” (nqe 7). “Tso kuv tseg” txhais hais tias khiav mus rau txoj kev puas tsuaj puas ntsoos kom tu noob. Vajtswv hais ntxiv ntawm nqe 8,9 “tso kuv tseg” yog “tso txoj kev uas Kuv kom lawv taug tseg”, yog “pe tus mlom nyuj kub thiab fij khoom rau tus mlom ntawd”, thiab hais tias “tus no yog tus uas coj peb tawm hauv tebchaws Iziv los!”, thiab yog tus cwjpwm “tawv ncauj”. Hais ua lwm seem, cov Yixalayees twb rau kev puastsuaj, vim lawv ua txhaum thiab tsis mloog Vajtswv lus, pe mlom, qhia yam uas yuam kev, tawmtsam thiab tsis xav mloog Vajtswv lus li lawm.
Coob leej ua neej tso siab vim pom tias yus muaj kev ntseeg zoo, tsis ua txhaum kev nkauj nraug, tsis tua neeg, tsis ua tub sab, tiamsis puas muaj ib zaug uas peb rov tig los saib peb tus kheej thiab txhawj ntshai thaum uas ntau zaug tau ua txhaum rau Vajtswv vim tsis ua raws li Nws tej lus, vim tau muab yus tus kheej lossis lwm tus tibneeg lossis nyiaj txiag los hloov Vajtswv chaw, thiab vim “tawv ncauj” tsis mloog Vajtswv lus thiab tej lus uas Nws samhwm.
Txawm yog Vajtswv tabtom qhia Mauxes ua lub Tsev Ntaub, los Nws tso tseg thiab qhia rau Mauxes txog cov pejxeem tej kev txhaum (nqe 7). Kev txhaum yog qhov teebmeem loj rau ntawm Vajtswv yuav tau muab tshem ua ntej uas ua ib tes haujlwm ntawm txoj kev ntseeg. Ntawm no, Vajtswv tsis hu cov Yixalayees ua “Kuv haivneeg” tiamsis hu ua “koj cov…pejxeem” (nqe 7). Vim kev txhaum tau quas Vajtswv thiab Nws haivneeg lawm (Yaxayas 59:1-2).
Coobleej hais tias lawv yog tus ntseeg tiamsis tsis ua neej raws li Vajtswv Txojlus, tsis sib haum nrog yus tej kwvtij. Txawm yog lawv coj raws li txojcai thiab tseem mus rau hauv tuamtsev, nco ntsoov tias Vajtswv POM peb tej kev txhaum (nqe 9), Vajtswv ntxub ntxaug txoj kev txhaum heev, tsuas muaj ib txoj hauv kev rau kev txhaum xwb yog muab tso tseg huv tibsi mus (nqe 10). Vim li ntawd, yuav tsum tau xyuamxim yus lubneej vim “Nej tsis txhob xav yuam kev, yeej tsis muaj ib tug yuav dag tau Vajtswv, txhua tus nyias yuav tsum tau sau raws li tej uas nyias tseb” (Kalatias 6:7).
Thov Vajtswv,
Vajtswv, thov pab kom nyuam yaus ua tau lub neej dawbhuv vim Koj yog tus dawbhuv. Thov pab kom nyuam yaus xyuamxim ua raws li Koj Txojlus, thov pab kom nyuam yaus lub siab tsuas pehawm Koj tib leeg xwb. Nyuam yaus tuav Tswv Yexus Khetos lub npe thov. Amees.
Peb yuav ua licas thaum ua tej kev txhaum no?
Nyeem Vajluskub hauv peb lub xyoos: Yaxayas 1
Kênh Youtube BHKTHN:
