Klei Aê Diê Blŭ: Y‑Tit 2:11‑15
Êlan kliăng: “Klei pap anăn bi hriăm drei brei hngah klei amâo thâo mpŭ kơ Aê Diê leh anăn klei tluh tui si lăn ala, leh anăn dôk hdĭp hŏng klei êngeh, kpă ênô, leh anăn thâo mpŭ kơ Aê Diê hlăm ênuk anei” (Y‑Tit 2:12)
Klei êmuh ksiêm mĭn: Si klei pap Aê Diê? Si klei bi mguôp klei pap leh anăn klei hdĭp huĭ mpŭ? Si brei drei hdĭp tơdah mâo leh klei pap Aê Diê brei?
Khua ƀĭng kna Y‑Pôl lač kơ “klei Aê Diê pap ba brei klei bi mtlaih bi êdah leh kơ jih jang mnuih” (êlan 11). “Klei pap” jing klei khăp amâo mâo klei mtui Aê Diê brei kơ drei jing mnuih soh amâo năng ôh, ƀiădah mâo brei leh hlăm Khua Yang Yêsu Krist tơdah Ñu “Ñu jao leh Ñu pô kyua drei čiăng bi tui drei mơ̆ng jih jang klei wê, leh anăn čiăng bi doh jăk drei pioh kơ Ñu pô sa phung ƀuôn sang hur har kơ bruă jăk” (êlan 14). Kyua anăn, tơdah đăo kơ Khua Yang Yêsu, drei mâo klei pap brei klei soh leh anăn mâo klei bi mtlaih “amâo djŏ kyua bruă kpă drei ngă leh ôh, ƀiădah tui si klei Ñu pô pap” (Y‑Tit 3:5).
Klei pap Khua Yang amâo djŏ knŏng bi mtlaih mngăt drei ôh ƀiădah lŏ bi mtlaih drei mơ̆ng klei soh. Kyua anăn, tơdah sa čô mnuih tŭ mă klei bi mtlaih Aê Diê, jing dŏ Ñu, snăn klei pap anăn ăt “bi hriăm drei brei hngah klei amâo thâo mpŭ kơ Aê Diê leh anăn klei tluh tui si lăn ala, leh anăn dôk hdĭp hŏng klei êngeh, kpă ênô, leh anăn thâo mpŭ kơ Aê Diê hlăm ênuk anei” (êlan 12). Klei hdĭp huĭ mpŭ tơdah mâo leh klei pap Khua Yang brei amâo djŏ knŏng jing hngah kơ klei soh leh anăn klei čiăng soh jhat hruê êlâo ôh, ƀiădah lŏ knang ai ktang Khua Yang čiăng hdĭp đăo huĭ mpŭ leh anăn mă bruă kơ Ñu hlăm klei hdĭp anei mtam. Kyua drei “êjai dôk guôn klei drei čang hmăng jăk mơak, klei bi êdah klei guh kơang Aê Diê prŏng leh anăn Pô Bi Mtlaih drei, Yêsu Krist” (êlan 13). Êlan 14 brei ƀuh klei bi mguôp plah wah klei pap bi mtlaih hŏng klei hdĭp ba klei tŭ dưn kơ lu mnuih, “Ñu jao leh Ñu pô kyua drei čiăng bi tui drei mơ̆ng jih jang klei wê, leh anăn čiăng bi doh jăk drei pioh kơ Ñu pô sa phung ƀuôn sang hur har kơ bruă jăk” (êlan 14).
Tơdah đăo kơ Khua Yang Yêsu jing Pô Bi Mtlaih klei hdĭp pô, grăp čô drei mâo mă leh sơăi klei pap Aê Diê brei, drei amâo dưi dôk hơĭt hlăm klei pap bi mtlaih Aê Diê ôh ƀiădah hlăm dŭm hruê dôk hdĭp ti lăn ala êjai anei, brei drei knang kơ Khua Yang čiăng đuĕ kbưi hŏng klei mplư, mprăp kơ pô “mnơ̆ng bi blah Aê Diê brei yua”(Êphêsô 6:10‑18) čiăng dưi hĭn hŏng klei yang jhat mplư, leh anăn srăng mă bruă jih ai tiê kơ Khua Yang jing Pô săn leh asei bi tui pô. Brei hdơr nanao Khua Yang mtlaih drei leh anăn bi hriăm drei jing sa găp djuê hjăn kơ Ñu. Brei drei hur har mă bruă jăk leh anăn dôk hdĭp hŏng klei êngeh, kpă ênô hlăm wưng dôk guôn Khua Yang lŏ hriê drông drei wĭt dôk hŏng Ñu lă lar.
Drei mđing uêñ kơ knuih hdĭp huĭ mpŭ, doh êngeh, kpă ênô tơdah mă tŭ leh klei pap Aê Diê brei mơ̆?
Wah lač: Ơ Khua Yang, kâo bi mni kơ Ih bi tui leh kâo jing mnuih amâo năng ôh. Akâo kơ Ih brei kơ kâo ai ktang čiăng kơ kâo jhŏng găn leh anăn dưi hŏng klei lông dlăng, klei mplư, hdĭp bi mơak kơ Ih, leh anăn đru phung mkăn kjăp ai tiê hlăm êlan wĭt kơ Ƀuôn Ala Mtao. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 37
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
