Titus 2:11-15
Nqe cim.
“Vajtswv ua li ntawd twb yog nws xav kom peb mloog nws lus, thiab tso peb tej kev phem kev qias tseg. Thiab kom peb paub tswj peb lub siab, ua tau neeg ncaj ncees thiab ua peb lub neej kom Vajtswv tau ntsejmuag” (Titus 2:12)
Lus nug rau sawvdaws xav.
– Vajtswv kev hlub pub dawb yog dabtsi?
– Kev hlub pub dawb thiab lubneej ntseeg zoo muaj kev sib txuas licas?
– Peb yuav tsum ua lubneej licas thaum txais tau tus Tswv txojkev hlub pub dawb?
Timthawj Paulus hais tias: “Vajtswv twb qhia txojkev dim txim uas nws pub dawb dawb rau sawvdaws rau peb paub lawm” (nqe 11). “Txojkev dim txim… pub dawb” lossis kev hlub pub dawb yog txojkev hlub tsis cheemtsum ua pauj, tau Vajtswv qhia rau peb uas yog tibneeg txhaum tsis tsimnyog txais, tiamsis Vajtswv pub rau peb hauv Tswv Yexus Khetos thaum Nws: “muab nws txojsia los txhiv peb kom peb dim txhua yam kev phem, thiab pab peb txhua tus uas nws tau xaiv cia lawm kom peb ua tau neeg zoo kawg nkaus, thiab kom peb muaj lub siab kub lug ua txhua yam haujlwm zoo” (nqe 14). Vim li ntawd, thaum ntseeg Tswv Yexus, peb tau zam txim thiab tau txais txojkev cawmdim. “Vajtswv cawm peb dim, tsis yog vim peb ua ncaj ncees tiamsis yog Vajtswv txojkev khuvleej uas nws ntxuav peb…” (Titus 3:5 HMOWSV).
Tus Tswv txojkev hlub pub dawb tsis yog tsuas cawm peb tus ntsujplig xwb tiamsis tseem cawm peb dim ntawm kev txhaum txoj saw hlau thiab. Vim li ntawd, thaum ib tug neeg txais yuav Tswv Yexus, yog Tswv Yexus tug lawm, ces txojkev hlub ntawd kuj “xav kom peb mloog nws lus, thiab tso peb tej kev phem kev qias tseg. Thiab kom peb paub tswj peb lub siab, ua tau neeg ncaj ncees thiab ua peb lub neej kom Vajtswv tau ntsejmuag” (nqe 12). Lub neej ntseeg zoo tomqab txais yuav kev hlub pub dawb tsis yog tsuas tso kev txhaum thiab tej kev ntshaw phem tseg xwb, tiamsis tseem yuav tsum vamkhom tus Tswv lub zog kom ua tau lubneej zoo thiab ua Nws haujlwm. Rau qhov peb “tabtom cia siab ntsoov tos hnub uas Yexus Khetos tus uas yog peb tus Cawmseej rov qab los. Nws yog tus Vajtswv uas muaj hwjchim loj kawg nkaus” (nqe 13). Nqe 14 qhia paub txog kev sib txuas ntawm txojkev hlub pub dawb thiab lubneej ntseeg zoo yuav ua muaj nqis rau lwm tus, “Yexus Khetos tau muab nws txojsia los txhiv peb kom peb dim txhua yam kev phem, thiab pab peb txhua tus uas nws tau xaiv cia lawm kom peb ua tau neeg zoo kawg nkaus, thiab kom peb muaj lub siab kub lug ua txhua yam haujlwm zoo” (nqe 14).
Thaum ntseeg Tswv Yexus ua peb tus Tswv Cawmseej, peb txhua tus tau txais txojkev hlub tus Tswv pub dawb, peb tsis txhob tsaug zog hauv txojkev hlub pub dawb ntawd tiamsis thaum tseem muaj sia ua neej nyob ibvuag hauv ntiajteb no, peb yuav tsum vamkhom tus Tswv lub zog qaij deb tej kev dag ntxias, muab “Vajtswv tej cuabyeej” los hnav (Efexus 6:10-18) thiaj kovyeej dab ntxwsnyoog, thiab txaus siab hlo ua haujlwm rau tus Tswv vim Nws yog tus tuag txhiv peb tej kev txhaum. Yuav tsum nco ntsoov hais tias, tus Tswv cawm peb dim thiab cob qhia kom peb ua tau ib haivneeg pub rau Nws. Cia li kub siab lug ua tej yam zoo thiab ua neej zoo thaum tos hnub tus Tswv rov los tos peb mus nrog Nws nyob saum ntuj.
Thov Vajtswv,
Tus Tswv, nyuam yaus ua Koj tsaug vim Koj tau cawm nyuam yaus dim. Thov pub dag zog rau nyuam yaus kom muaj lub siab tawv, kovyeej kev sim siab, dag ntxias, ua lubneej haum Koj siab, thiab pab tau lwm tus koom rhais ruam los rau Tebchaws Ceeb Tsheej. Nyuam yaus tuav Tswv Yexus lub npe thov, Amees.
Peb puas ua lubneej ntseeg zoo thaum txais tau tus Tswv txojkev hlub pub dawb lawm tau?
Nyeem Vajluskub hauv peb lub xyoos: Ntawv Nkauj 37
Kênh Youtube BHKTHN:
