Klei Aê Diê Blŭ: Hêbrơ 13:9-16
Êlan kliăng:“Snăn hlăm Ñu brei drei myơr nanao mnơ̆ng ngă yang bi mni kơ Aê Diê, boh mơ̆ng kƀông hưn anăn Ñu jing Khua Yang. Đăm wơr bĭt ôh ngă klei jăk leh anăn bi mbha mnơ̆ng diih mâo kơ phung mkăn, kyuadah klei ngă yang msĕ snăn bi mơak kơ Aê Diê” (Hêbrơ 13:15-16)
Klei êmuh ksiêm mĭn: “Klei mtô soh mdê mdê” pô čih hră Hêbrơ mtă leh brei phung đăo răng ya jing? Si klei mdê klei drei kkuh mpŭ ênuk anei hŏng klei kkuh mpŭ ênuk Klei Bi Mguôp Hđăp? Si ngă drei srăng myơr mnơ̆ng ngă yang čiăng Aê Diê mâo klei mơak?
Pô čih hră Hêbrơ mtă kơ phung đăo răng, “đăm diih klah đuĕ tui klei soh mdê mdê ôh” (êlan 9). Drei amâo thâo klă ôh kơ “klei mtô soh mdê mdê” tinei ya jing, ƀiădah sĭt nik hlăm klei mtô soh anăn mâo wăt klei mtô kơ klei gưt kơ klei bhiăn djŏ tuôm hŏng mnơ̆ng ƀơ̆ng huă jing dŏ pioh brei mdê phung Israel mơ̆ng phung găp djuê mkăn. Sĭt nik klei djă pioh klei bhiăn anăn amâo ba hriê klei bi mtlaih ôh. Knŏng hŏng klei pap, kyua klei đăo yơh drei mâo klei bi mtlaih. Anei yơh jing klei sĭt nik kơ Klei Mrâo Mrang Jăk. Khua Yang Yêsu Krist amâo tuôm bi mlih ôh. Klei Mrâo Mrang Jăk Ñu kăn tuôm bi mlih rei. Kyuanăn yơh brei phung đăo weh đuĕ kơ klei mtô “soh” wăt tơdah mrâo hmư̆ jing msĕ si jăk sơnăk, ƀiădah bi mdjŏ hŏng Klei Aê Diê Blŭ snăn klei mtô anăn bi klăk hŏng klei mtô sĭt leh anăn bi jhat kơ klei đăo drei.
Phung đăo kơ Krist amâo lŏ yua klei bhiăn kkuh mpŭ msĕ si ênuk Klei Bi Mguôp Hđăp ôh. Mphŭn dô knưl ngă yang jing anôk phung khua ngă yang bi ala kơ phung ƀuôn sang bi êdah klei diñu sĭt suôr kơ Aê Diê hŏng mnơ̆ng ngă yang, ƀiădah jih jang klei ngă anăn mâo kdriêl sơăi. Knŏng tơdah Khua Yang Yêsu hriê, jing mnơ̆ng ngă yang hdĭp jăk klă, myơr Ñu pô sa blư̆ man djăp kơ jih jang čiăng bi tui klei soh jih jang mnuih. Hŏng klei anăn, jih jang hlei pô đăo dưi hriê leh anăn kkuh mpŭ kơ Aê Diê hŏng mngăt leh anăn hŏng klei sĭt nik amâo djŏ hŏng bruă ngă tui si klei bhiăn ôh.
Hruê anei, drei kkuh mpŭ kơ Aê Diê hŏng mnơ̆ng ngă yang amâo djŏ hŏng hlô mnơ̆ng ôh, ƀiădah hŏng klei blŭ leh anăn bruă drei ngă (êlan 15-16). Anăn jing klei mmuñ bi mni hưn Anăn Khua Yang čiăng bi guh kơang kơ Ñu; klei mmuñ bi mni anăn kbiă hriê mơ̆ng klei mĭn leh anăn ai tiê thâo kral hlei Khua Yang jing leh anăn ya klei Ñu ngă leh kơ drei. Anăn jing bruă jăk drei ngă čiăng đru pô mkăn kyuadah, “snei klei đăo doh leh anăn amâo čhŏ ôh ti anăp Aê Diê Ama: đru phung anak êrĭt leh anăn phung mniê djiê ung hlăm klei knap mñai digơ̆, leh anăn răng kriê amâo bi čhŏ ñu pô hŏng klei mưng lăn ala” (Y-Yakơ 1:27). Djă pioh bĕ klei khăp kơ Khua Yang, čiăng hơêč hmưi kơ Ñu nanao hlăm djăp mta klei truh, leh anăn duah nanao êlan đru phung riêng gah čiăng kơ digơ̆ dưi thâo kral klei khăp Khua Yang, anăn yơh jing klei ngă yang bi mơak kơ Aê Diê sĭt.
Drei dôk kkuh mpŭ kơ Khua Yang knŏng hŏng klei bhiăn ti êngao hĕ amâodah tui duah nanao klei ngă yang bi mơak kơ Ñu?
Wah lač: Ơ Khua Yang Yêsu, kâo lač jăk kơ Ih kyua jih jang klei Ih ngă leh kơ kâo ti kyâo bi kal. Đru kâo kkuh mpŭ kơ Ih amâo djŏ knŏng hŏng klei bhiăn kkuh mpŭ ôh ƀiădah wăt hŏng klei thâo gưt asăp, mpŭ mni nanao kơ Anăn Ih leh anăn bi êdah klei Ih khăp hŏng bruă ngă, đru mnuih mkăn. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Hêbrơ 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
