Henplais 13:9-16
Nqe cim:
“Yog li ntawd, peb cov uas ntseeg Yexus peb yuav tsum niaj hnub ua Vajtswv tsaug. Peb ua li ntawd ib yam li peb muab tej uas haum Vajtswv siab fij rau Vajtswv saum lub thaj. Kuv hais li no yog kuv hais tias peb lub qhovncauj yuav tsum niaj hnub ua Vajtswv tsaug. Nej yuav tsum nco ntsoov ua haujlwm zoo thiab ib tug pab ib tug, rau qhov tej ntawd haum Vajtswv siab” (Henplais 13:15-16)
Lus nug rau sawvdaws xav:
– “Tej lus qhia txawv txawv ntxias” uas sau hauv phau ntawv Henplais ceebtoom cov ntseeg txog yam dabtsi?
– Peb kev pehawm Vajtswv niaj hnub nimno txawv kev pehawm hauv Vajluskub qub li cas?
– Peb yuavtsum fij tej khoom li cas kom haum tus Tswv siab?
Tus sau phau ntawv Henplais qhia cov ntseeg Vajtswv hais tias “Nej tsis txhob cia tej neeg uas qhia txawv txawv ntxias tau nej yuam kev” (nqe 9). Peb tsis paub tseeb “tej lus qhia txawv txawv” ntawd yog yam lus dab tsi, tej zaum yeej yog hais txog tej kevcai uas yuav tsum coj thiab txwv ntsigtxog kev noj kev haus, vim cov Yixalayees yuav tsum coj kevcai kom txawv dua li lwm haivneeg ib ncig ntawm lawv. Yeej tseeb lawm, yog coj raws li tej kevcai qhia los pab tsis tau tibneeg dim txim. Tsuas yog los ntawm Vajtswv koob hmoov thiab los ntawm peb kev ntseeg thiaj pab tau dim txim xwb. Ntseeg xwb thiaj yog qhov tseeb ntawm txoj Moo Zoo. Cawmseej Tswv Yexus yeej tsis hloov, thiab Nws Txoj Moo Zoo los yeej tsis muaj hnub yuav hloov li thiab. Yog li ntawd cov ntseeg yauvtsum txav deb tej lus uas qhia “txawv txawv” txawm yog zoo mloog heev los tsis raws li Vajluskub qhia thiab yuav ua rau peb tso kev ntseeg tseeb tseg.
Cov ntseeg Yexus tsis tas ua tes haujlwm pehawm zoo li tiam Vajluskub Qub lawm. Lub thaj hnub thaud yog qhov chaw uas cov Povthawj hlob sawv cev cov pejxeem mus qhia tshwm lawv lub siab pub rau Vajtswv dhau los ntawm tej khoom fij, tiamsis txhua yam ntawd puavleej muaj nrim uas niaj xyoo ua. Tsuas yog thaum Tswv Yexus los lawm, nws thiaj yog yam khoom fij uas zoo tshaj plaws. Nws muab nws lub cev fij tib zaug xwb txhiv tau tagnrho tibneeg ntiajteb lub txim thiab qhib txoj kev tshiab mus cuag Vajtswv pub rau tibneeg ntiajteb. Yog li ntawd, txhua tus uas ntseeg Yexus thiaj mus cuag taus Vajtswv thiab paub pehawm Vajtswv los ntawm sab ntsujplig thiab qhov tseeb xwb, tsis yog los ntawm tej kab li kevcai.
Niaj hnub nimno, cov ntseeg Yexus pehawm Vajtswv tsis yog los ntawm tej khoom fij uas yog tej tsiaj theej txhoj lawm, tiamsis yog los ntawm peb tej lus hais thiab tes haujlwm ua (nqe 15-16). Tiam tshiab no pehawm los ntawm tej lus qhuas, tej suab nkauj qhuas Vajtswv kom Nws tau koobmeej. Tej lus qhuas ntawd tawm hauv peb lub siab tuaj vim yog peb tus Vajtswv tau pab peb dim lawm. Thiab tej khoom fij yog tes haujlwm zoo uas peb ua pab lwm tus. Vajtswv Txojlus hais tias, “Txoj kevcai uas Vajtswv tus uas yog peb Leej Txiv suav hais tias yog txoj uas zoo thiab tseeb, txoj ntawd yog nej yuav tsum pab cov pojntsuam thiab cov menyuam ntsuag uas raug kev txomnyem quaj ntsuag. Thiab nej tsis txhob mus nrog neeg ntiajteb ua phem ua qias” (Yakaunpaus 1:27). Cia li tu peb lub siab uas hlub Vajtswv, txhawb nqa Vajtswv txhua lub sijhawm thiab nrhiav kev pab lwm tus uas nyob ib ncig ntawm peb kom lawv saj tau Vajtswv kev hlub, ua li ntawd thiaj yog tej khoom fij tseeb uas haum Vajtswv siab.
Thov Vajtswv:
Tus Tswv, nyuam yaus ua Koj tsaug los ntawm tej uas Tswv Yexus ua pub nyuam yaus saum ntoo Khaublig. Thov pab nyuam yaus tsis yog tsuas pehawm Koj raws kev li kevcai xwb tiamsis tagnrho hauv nyuam yaus lub siab, lub neej txhawb nqa Koj thiab txawj ua tes haujlwm zoo pab lwm tus ib ncig ntawm nyuam yaus kom lawv pom Koj txoj kev hlub. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Peb tabtom siv kev pehawm Vajtswv li cas?
Nyeem Vajluskub hauv peb lub xyoos: Henplais 6
Kênh Youtube BHKTHN:
