Klei Aê Diê Blŭ: Y‑Luk 1:26-33
Êlan kliăng: “Dĭng buăl jăk truh kơ H’Mari leh anăn lač, “Kkuh kơ ih, Ơ pô Aê Diê pap. Khua Yang dôk mbĭt hŏng ih!” (Y‑Luk 1:28)
Klei êmuh ksiêm mĭn: Ya ngă Aê Diê ruah H’Mari ba tian kơ Hđeh điêt Yêsu? Ya klei mơak leh anăn klei huĭ hyưt H’Mari tuôm tơdah Aê Diê ruah? Ya klei mđĭ ai kơ diih mơ̆ng klei hriăm hruê anei?
Găn hlăm djăp ênuk, H’Mari mâo klei bi mni nanao kơ ñu jing mnuih mâo klei jăk mơak kyua ñu mâo Aê Diê ruah ba tian kơ Hđeh điêt Yêsu, Pô Bi Mtlaih kơ jih jang anak mnuih. Dĭng buăl jăk lač ñu jing “pô Aê Diê pap” (êlan 28), jing Aê Diê ruah leh ñu hlue si klei pap leh anăn klei jăk mơ̆ng Khua Yang. Klei anăn amâo jưh hlăm klei thâo amâodah klei hriăm mơ̆ng ñu ôh. Kyua anăn, grăp čô đăm mkhư̆ ôh klei Aê Diê ruah, Ñu dôk yua leh anăn srăng yua drei tơdah drei đăo knang leh anăn mprăp ai tiê mă bruă kơ Ñu.
Mâo Aê Diê ruah jing klei mơak, klei jăk, kyua pô anăn mâo Aê Diê dôk mbĭt msĕ si klei dĭng buăl jăk lač hŏng H’Mari “Kkuh kơ ih, Ơ pô Aê Diê pap. Khua Yang dôk mbĭt hŏng ih!” (êlan 28). Phung mă bruă kơ Aê Diê amâo dôk hjăn păn ôh, ƀiădah mâo klei êđăp ênang msĕ si pô čih Y‑Đawit găn leh, “Wăt tơdah kâo êbat hlăm troh êyui klei djiê, kâo amâo srăng huĭ kơ sa mta klei jhat ôh; kyuadah Ih dôk mbĭt hŏng kâo; giê dra leh anăn giê knuăk Ih bi juh kâo” (Klei Mmuñ Hđăp 23:4). Klă sĭt knuih tal êlâo mơ̆ng H’Mari amâo djŏ jing klei mơak ôh ƀiădah jing rŭng răng (êlan 29) ƀiădah êdei anăn jing knuih gưt asăp leh anăn hơ̆k mơak. Klă sĭt năng ai drei ăt srăng mâo knuih rŭng răng msĕ si ñu, kyua drei amâo thâo ôh ya klei srăng truh hŏng pô tơdah hmư̆ klei dĭng buăl jăk lač! Đăm rŭng răng leh anăn đăm huĭ ôh, kyua mnuih Aê Diê ruah, jing “ mâo leh klei pap ti anăp Aê Diê” (êlan 30) snăn Ñu srăng brei klei pap čiăng mă bruă hlue si klei Ñu ktrâo. Bruă drei jing wah lač hŏng Aê Diê msĕ si H’Mari, “Nĕ anei, kâo jing dĭng buăl mniê kơ Khua Yang. Brei klei anăn truh kơ kâo tui si klei ih blŭ leh” (êlan 38a). H’Mari, sa čô mniê dưi mâo Aê Diê ruah čiăng kơ Pô Bi Mtlaih dưi kkiêng jing mnuih, Ñu jing “…Anak Pô Ti Dlông Hĭn; … Ñu srăng kiă kriê găp djuê Y‑Yakôp nanao hlŏng lar, leh anăn ƀuôn ala mtao Ñu amâo srăng thâo tuč ôh”(êlan 32-33). Brei drei hơ̆k mơak, kyua Aê Diê ăt mơak yua phung msĕ si drei čiăng ngă bruă yuôm bhăn kơ Ñu.
Mnuih Aê Diê ruah ăt brei tŭ kơ klei huĭ hyưt. H’Mari tlă anăp hŏng klei đing leh anăn Y‑Yôsep jing ung ƀuăn ñu mâo klei mĭn čiăng lui ñu (Y‑Mathiơ 1:18-19). Năng ai ñu ăt srăng tŭ klei arăng bhĭr hŏng tâo tơl djiê hlue si klei bhiăn (Klei Mtô Mñă Klei Bhiăn 22:23-24). Lu blư̆ phung hur har mă bruă kơ Khua Yang tŭ klei arăng mưč mač, ƀuah ăl, mčeh luar kyua phung amâo mâo mă bruă. Ƀiădah brei drei mơak nanao kyua Khua Yang dôk mbĭt nanao, bi juh leh anăn mgang phung Ñu ruah leh.
Klei hriăm hruê anei mđĭ ai drei hlăm klei mă bruă kơ Khua Yang. Akâo kơ grăp čô drei wah lač hŏng Khua Yang snei “Akâo kơ klei Ih čiăng srăng jing hlăm klei hdĭp kâo”.
Drei mơak leh anăn mprăp ai tiê čiăng kơ Khua Yang ruah leh anăn mă bruă kơ Ñu mơ̆?
Wah lač: Ơ Ama hlăm adiê, kâo akâo kơ Ih mñă kơ kâo thâo Ih dôk mbĭt hŏng kâo nanao hlăm djăp boh klei hlăk êjai kâo mă bruă Ih. Akâo kơ Ih đru kâo hơ̆k mơak leh anăn bi mđĭ ai hdơ̆ng pô jih ai tiê mă bruă kơ Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Bi Êdah 8:7-9:21
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
