Lukas 1:26-33
Nqe cim
“Tus timtswv los hais rau Malis hais tias, “Koj yuav tau zoo nyob kaj siab lug! Tus Tswv nrog nraim koj nyob thiab foom koob hmoov ntau kawg rau koj lawm!” (Lukas 1:28).
Lus nug rau sawvdaws xav:
– Vim li cas Malis tau tus Tswv xaiv los ua tus yug Tswv Yexus?
– Txojkev zoo siab thiab tej kev txhawj uas Malis ntsib thaum tau tus Tswv xaiv yog dabtsi?
– Peb tau txhawb zog dabtsi dhau zaj kawm hnub no?
Dhau ntau tiam los, Malis tau qhuas hais tias yog tus uas tau koob hmoov vim nws yog tus uas tau Vajtswv xaiv ua tus yug Tswv Yexus, neeg ntiajteb tus cawmseej. Timtswv hais tias Malis yog tus tau “koob hmoov ntau kawg nkaus” (nqe 28), txhais tau hais tias Vajtswv xaiv Malis raws li Nws txoj koob hmoov thiab Nws lub siab nyiam. Qhov ntawd tsis yog vim Malis txawj ntse, muaj peevxwm lossis kawm qib siab. Yog li, tsis txhob xav hais tias Vajtswv qhov kev xaiv muaj nrim, Nws tabtom thiab yuav siv peb yog hais tias peb ntseeg thiab txaus siab hlo cia Nws siv.
Tau tus Tswv xaiv yog kev zoo siab, kaj siab, vim tus neeg ntawd tau Vajtswv nrog nraim ib yam li timtswv hais rau Malis, “Koj yuav tau zoo nyob kaj siab lug! Tus Tswv nrog nraim koj nyob” (nqe 28). Tus neeg ua tus Tswv tes haujlwm tsis nyob ib leeg, tiamsis muaj kev kaj siab zoo ib yam li Daviv tau txais, “txawm yog kuv taug txojkev uas txaus ntuj nti los kuv tsis ntshai dabtsi, rau qhov koj nrog nraim kuv. Koj tus pas thiab tus cwj nrig tsomkwm kuv” (Phau Ntawv Nkauj 23:4). Thaum hnov tus timtswv qhia Malis muaj tus cwjpwm txhawj ntshai (nqe 29), tom qab ntawd nws muaj tus cwjpwm mloog lus thiab zoo siab. Qee lub sijhawm peb kuj muaj tus cwjpwm zoo li Malis, vim peb tsis paub yam dabtsi yuav tshwm los raug yus, tiamsis thaum hnov timtswv tej lus hais! Tsis txhob txhawj thiab tsis txhob ntshai, rau qhov koj yog tus neeg Vajtswv xaiv, txhais tau tias “Vajtswv twb foom koob hmoov rau koj lawm” (nqe 30) ces Nws yuav pub koob hmoov rau peb ua haujlwm li Nws teem cia. Ntawm peb tus kheej yog txaus siab hlo hais rau tus Tswv ib yam li Malis, “kuv yog Vajtswv tus ntxhais qhev, thov kom muaj raws li koj hais ko rau kuv” (nqe 38a). Malis yog ib tug ntxhais los nws tau tus Tswv siv ua tes haujlwm cia tus cawmseej los yug ua neeg, Nws yog “Vajtswv tus uas muaj hwjchim loj kawg nkaus tus Tub…Nws yuav ua vajntxwv kav Yakhauj cov xeebntxwv mus ibtxhis; thiab nws lub tebchaws yuav nyob mus tsis paub kawg li!” (nqe 32-33). Peb cia li zoo siab, vim Vajtswv kuj siv peb ua tej haujlwm loj rau Nws thiab.
Tus neeg uas tau tus Tswv xaiv kuj yuav tsum lees yuav tej kev nyuaj. Malis ntsib tej kev uas luag xav tsis zoo thiab raug Yauxej tus uas yog nws tus txiv qhaib lawm yuav tso tseg (Mathais 1:18-19). Raws li Mauxes txoj kevcai tsimnyog muab pobzeb txawb Malis kom tuag (II Kevcai 22:23-24). Qeezaus tus neeg uas kub siab lug ua Vajtswv tes haujlwm yuav raug thuam, saib tsis taus, hais phem los ntawm cov neeg tsis ua haujlwm. Los cia li zoo siab vim tus Tswv nrog nraim peb nyob, txhawb zog thiab tuaj peb tog.
Zaj kawm hnub no txhawb peb lub zog rau kev ua tus Tswv haujlwm. Thov kom peb txhua tus hais rau tus Tswv hais tias “thov kom Leej Txiv koj lub siab nyiam ua tiav hauv nyuam yaus lub neej”.
Thov Vajtswv,
Vajtswv tus muaj hwjchim, thov Koj qhia kom nyuam yaus paub tias koj nrog nraim nyuam yaus txhua lub sijhawm thaum ua Koj tes haujlwm. Thov cia nyuam yaus muaj kev zoo siab thiab tau kev txhawb zog fij lub siab rau Koj. Nyuam yaus tuav Tswv Yexus lub npe thov. Amees.
Ib tsoom cov mloog uas hmov thiab tshua,
Peb puas muaj kev zoo siab, txaus siab hlo cia tus Tswv xaiv thiab siv peb ua Nws tes haujlwm?
Nyeem Vajluskub hauv peb lub xyoo: Tshwmsim 8:7-9:21
Kênh Youtube BHKTHN:
