Klei Aê Diê Blŭ: Y‑Luk 1: 67-73
Êlan kliăng: “Mpŭ mni kơ Khua Yang, Aê Diê Israel, kyuadah Ñu čhưn leh anăn bi tui leh phung ƀuôn sang Ñu” (Y‑Luk 1:68).
Klei êmuh ksiêm mĭn: Hlei Y‑Sakari jing? Ya klei ñu mmuñ bi mni kơ Aê Diê? Si ngă drei ngă čiăng mâo ai tiê msĕ si Y‑Sakari hlăm yan Noel thŭn anei?
Y‑Sakari jing ama Y‑Yôhan, ñu kmlô kyua amâo đaŏ ôh klei dĭng buăl jăk hưn mô̆ ñu jing H’Êlisabet srăng ba tian leh anăn kkiêng sa čô anak êkei (Y‑Luk 1:20). Leh arăng kkiêng kơ Y‑Yôhan, Aê Diê bi mrâo ñu leh anăn ñu lŏ thâo blŭ. Leh mphŭn dưi ha ƀăng êgei, kđưt êlah leh anăn dưi blŭ, ñu mmuñ bi mni kơ Aê Diê (Y‑Luk 1:64). Hlăm klei ñu mmuñ bi mni, ñu bi êdah klei hơ̆k mơak jih ai tiê kyua ñu thâo anei jing mmông Aê Diê čuă čhưn phung ƀuôn sang Ñu mơ̆ng bruă Ñu brei Yang Mêsi kơ digơ̆.
Tal sa, Y‑Sakari mmuñ bi mni kơ Aê Diê kyua Ñu čuă čhưn leh anăn bi mtlaih phung ƀuôn sang Ñu (êlan 68). Boh blŭ “Bi tui” jing bi mtlaih hŏng ênoh tla, năng ai čiăng lač kơ bruă phưi phung mnă, amâodah mtlaih phung hlŭn. Hdră kñăm Khua Yang Yêsu trŭn hriê ti lăn ala jing čiăng hluê ngă hdră bi tui anak mnuih hŏng ênoh yuôm snăk jing êrah yuôm Khua Yang. Tal dua, Y‑Sakari lač Yang Mêsi jing “Pô Bi Mtlaih Myang” (êlan 69), ai ktang leh anăn klei tŭ dưi Khua Yang Yêsu mâo phung khua pô hưn êlâo hlăk đưm lač leh, Ñu srăng bi mtlaih phung ƀuôn sang Ñu mơ̆ng djăp phung roh leh anăn phung bi êmut mâo klei mĭn čiăng ngă jhat kơ phung ƀuôn sang Aê Diê.
Y‑Sakari thâo klei Yang Mêsi trŭn hriê jing bi êdah klei pap leh anăn klei sĭt suôr Aê Diê hŏng phung ƀuôn sang Aê Diê ruah (êlan 72 -73). Amâo mâo ôh ya klei mơak hĭn kyua mơ̆ng leh klei Khua pô hưn êlâo Y‑Êsai hưn kơ Yang Mêsi truh kơ ênuk Y‑Sakari giăm 700 thŭn, leh anăn hlăm wưng anăn mâo leh 400 thŭn Aê Diê dôk ñăt kriêp hŏng phung ƀuôn sang Ñu.
Hruê anei, drei ƀuh hơ̆k mơak mơ̆ leh mŭt hlăm yan bi hdơr hruê Khua Yang Yêsu trŭn hriê, amâodah drei ƀuh anei knŏng jing knăm mơak klei đaŏ msĕ aguah tlam hlăm grăp thŭn, boh nik drei lŏ luč klei êđăp ênang hĭn hlăm yan Noel leh ƀuh klei rŭng răng hlăk mâo dlông rŏng lăn. Yan Noel truh, mñă kơ drei klei Khua Yang Yêsu jing Aê Diê pô tal dua tŭ ư hriê ti lăn ala jing mnuih čiăng hluê ngă hdră bi mtlaih anak mnuih, drei ăt mâo klei mñă Ñu jing Pô mâo klei tŭ dưi leh anăn Ñu brei klei tŭ dưi kơ hlei pô jing dŏ Aê Diê. Wăt tơdah drei dôk hdĭp hlăm lăn ala amâo mâo klei êđăp ênang leh anăn bŏ hŏng rŭng răng kơ klei ruă duam, klei ruă tưp, luč bruă mă… ƀiădah akâo kơ Aê Diê brei kơ drei ur hơ̆k mmuñ bi mni klei mmuñ hơ̆k mơak kyua drei thâo Aê Diê, đaŏ kơ Ñu leh anăn hlăk dôk hlăm klei Ñu răng mgang kluôm ênŭm.
Drei dôk mmuñ bi mni klei jăk mơak hlăm klei hdĭp grăp hruê leh mơ̆ ka? Ya klei bi găn drei amâo dưi mmuñ bi mni kơ kơ Aê Diê?
Wah lač: Ơ Khua Yang Yêsu, kâo bi mni lač jăk kơ Ih kyua Ih hriê leh ti lăn ala čiăng bi mtlaih kâo, akâo kơ Ih brei kâo mmuñ bi mni nanao kơ Aê Diê kyua kâo thâo kral Ih, đaŏ kơ Ih leh anăn dôk thâo kơ klei myang Ih hlăm grăp hruê.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Bruă Mtao 19:1-28
Kênh Youtube BHKTHN:
