Klei Aê Diê Blŭ: Klei Bi Hriêng 24:13-14
Êlan kliăng: “Klei huĭ mpŭ kơ Yêhôwa jing doh, ñu dôk nanao hlŏng lar; klei Yêhôwa mtrŭn jing sĭt nik, leh anăn djŏ sơăi. Diñu yuôm hĭn kơ mah, kơ lu mah điêt aruăt; diñu mmih hĭn kơ êa hnuê, êa hnuê rôč mơ̆ng ksing” (Klei Mmuñ Hđăp 19:9-10)
Klei êmuh ksiêm mĭn: Si Mtao Salômôn bi msĕ klei thâo mĭn hŏng êa hnuê? Ya klei tŭ dưn klei thâo mĭn ba hriê? Si ngă ih ngă čiăng dưi mă tŭ klei thâo mĭn?
Mtao Salômôn bi msĕ klei mmih êa hnuê hŏng klei mmih kbiă mơ̆ng klei thâo mĭn. Ñu lač kơ anak ñu khăp hơiêng “ƀơ̆ng bĕ êa hnuê kyuadah ñu jing jăk” (êlan 13). Êa hnuê jing mnơ̆ng phung Čar Ngŏ ƀơ̆ng aguah tlam, amâo djŏ knŏng mmih ôh ƀiădah wăt jăk kơ asei mlei leh anăn dưi mdrao klei ruă mơh. Si êa hnuê jing jăk kơ asei mlei snăn mơh klei thâo mĭn jing mmih, jăk leh anăn ba klei tŭ dưn kơ mngăt. Pruê̆ blŭ “brei ih thâo klei thâo mĭn jing mmih kơ mngăt ih” (êlan 14) lŏ mblang jing ih srăng thâo kral leh anăn mă tŭ klei thâo mĭn. Pô tui duah hŏng jih ai tiê, mă tŭ klei thâo mĭn sĭt nik srăng mă tŭ klei mưn leh anăn klei dưi. Pô duah klei thâo mĭn srăng mâo leh anăn mă tŭ klei jăk mơak hlŏng lar. Amâodah lač snei, bruă ngă djŏ hlăm klei thâo kral klei thâo mĭn leh anăn ƀuh klei thâo mĭn jing êlan jăk hĭn čiăng dưi mâo klei hơ̆k mơak sĭt leh anăn hơ̆k mơak hlăm jih jang klei čang hmăng.
“Klei thâo mĭn kơ mngăt ih” knŏng dưi mă tŭ mơ̆ng Aê Diê jing akŏ kơ klei thâo mĭn kyuadah “klei huĭ mpŭ kơ Yêhôwa jing klei kčưm kơ klei thâo săng” (Klei Bi Hriêng 1:7). Phung đăo srăng duah leh anăn mă tŭ klei thâo mĭn tơdah huĭ mpŭ kơ Aê Diê hŏng jih ai tiê, gưt jih klei Ñu mtrŭn. Klei Aê Diê Blŭ jing sĭt nik, jing djŏ sơăi, yuôm hĭn kơ mah, mmih hĭn kơ êa hnuê, êa hnuê rôč mơ̆ng ksing (Klei Mmuñ Hđăp 19:10). Hruê anei, Aê Diê brei kơ drei Hdruôm Hră Klei Aê Diê Blŭ jing Klei Blŭ Aê Diê, jing mnơ̆ng ktrâo êlan kơ klei hdĭp, ba klei thâo mĭn kơ mngăt drei. Tơdah drei thâo kral klei mmih Klei Aê Diê Blŭ, brei grăp čô drei hur har ksiêm mĭn, hriăm Klei Aê Diê Blŭ hjăn tui si klei Yang Mngăt Jăk atăt gai (Y‑Yôsuê 1:8). Brei Phung Sang Aê Diê mtrŭt phung đăo hur har hriăm Klei Aê Diê Blŭ, brei phung đăo hur har hlăm klei bi kƀĭn kkuh mpŭ kơ Khua Yang, hmư̆ klei mtô Klei Aê Diê Blŭ, hriăm klei hriăm hruê kjuh, hriăm Klei Aê Diê Blŭ êpul đơ điêt…
Akâo Khua Yang brei kơ drei mâo ai tiê êpa mhao kơ klei thâo mĭn čiăng duah klei thâo mĭn hŏng jih ai tiê tui si klei Ñu mtă, grăp hruê đĭ hriê kơ prŏng hlăm klei thâo săng êlam kơ Klei Aê Diê Blŭ, leh anăn bi đru hdơ̆ng drei dôk kjăp hlăm klei đăo. Mnuih thâo mĭn hriăm Klei Aê Diê Blŭ leh anăn gưt klei Ñu mtă amâo djŏ knŏng mă tŭ klei hơ̆k mơak, klei êđăp ênang kơ klei hdĭp ti lăn ala anei ôh, ƀiădah wăt srăng mâo klei hdĭp hlŏng lar hlăm klei hdĭp ênuk êdei msĕ si Khua Yang ƀuăn leh.
Si ngă drei duah klei thâo mĭn hŏng jih ai tiê leh anăn mă tŭ leh mơ̆ klei mmih mơ̆ng klei thâo mĭn Aê Diê brei?
Wah lač: Ơ Khua Yang, kâo lač jăk kơ Ih brei kâo thâo kral leh klei mmih hlăm Klei Ih Blŭ. Akâo Khua Yang brei kâo mâo klei đăo, hur har hlăm klei ksiêm mĭn, hriăm Klei Ih Blŭ, dôk kjăp leh anăn huĭ mpŭ kơ Ih hŏng jih ai tiê, gưt kơ klei Ih mtă jih hruê kâo dôk hdĭp. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Philip 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
