Klei Aê Diê Blŭ: Y-Yêrêmi 20:1-6
Êlan kliăng: “Jih jang mnuih srăng bi êmut kơ diih kyua anăn Kâo. Ƀiădah hlei pô gĭr tơl knhal tuč srăng tlaih.” (Y-Markôs 13:13)
Klei êmuh ksiêm mĭn: Ya ngă Y-Pashur čăm leh anăn bi hnuh Khua pô hưn êlâo Y-Yêrêmi? Leh phưi mơ̆ng hnuh, ya klei Khua pô hưn êlâo Y-Yêrêmi ngă? Hruê anei, hiu hưn Anăn Khua Yang ya klei lông dlăng drei khăng tuôm?
Y-Pashur jing anak khua ngă yang leh anăn jing sa čô khua prŏng hlăm Sang Yang. Hdơ̆ng jing phung mă bruă kơ Aê Diê sơăi, năng djŏ gơ̆ Y-Pashur đru yơh bruă khua pô hưn êlâo Y-Yêrêmi dôk ngă, bi tinei ñu lŏ “čăm leh anăn bi hnuh” hĕ Khua pô hưn êlâo Y-Yêrêmi kyuadah gơ̆ jhŏng hưn Klei Aê Diê hưn êlâo brei răng kơ klei srăng truh kơ ƀuôn Yêrusalem (Y-Yêrêmi 19:14-15; êlan 2). Phŭn knhal kơ klei anăn, kyuadah Y-Pashur amâo čiăng đăo kơ klei blŭ mơ̆ng khua pô hưn êlâo sĭt anăn ôh, leh anăn amâo čiăng kơ Khua pô hưn êlâo Y-Yêrêmi lŏ hưn Klei Blŭ mơ̆ng Aê Diê ôh.
“Hnuh” jing sa mta klei bi kmhal ruă knap snăk, arăng čăp jih kngan wăt jơ̆ng pô mnă. Klei bi kngăr jing arăng bi hnuh dưm khua pô hưn êlâo ti krah tač hlăm wăl Sang Yang, “hlăm ƀăng jang Benjamin tal dlông hlăm sang yang Yêhôwa”. Anei jing anôk kơ jih jang mnuih dưi ƀuh sơăi. Khua pô hưn êlâo Y-Yêrêmi ruă knap hlăm kđeh asei mlei wăt tŭ klei arăng bi hêñ ai tiê klei mĭn. Êlâo kơnăn lu blư̆ leh arăng arưp aram čiăng ngă jhat, ƀiădah anei jing tal êlâo hĭn gơ̆ tŭ sĭt klei arăng bi knap. Mĭndah leh sa mlam arăng bi knap bi hêñ, khua pô hưn êlâo Y-Yêrêmi srăng phưi lui yơh ngă bruă khua pô hưn êlâo. Ƀiădah mklăk wĭt. Leh hruê arăng phưi mơ̆ng hnuh yơh, ñu ăt lŏ hưn mtam kơ klei Aê Diê srăng phat kđi phung Yuđa. Bi hjăn kơ Y-Pashur, klei bi mlih anăn pia kơ ñu “Magor Misabip” mblang jing “klei bi huĭ mơ̆ng djăp kiêng”, jing klei hưn êlâo snei, ñu pô, jih jang phung hlăm sang ñu leh anăn kluôm jih ƀuôn Yêrusalem srăng lĕ hlăm kngan phung Ƀaƀilôn (êlan 4-6). Klei huĭ hyưt wang jŭm dar.
Khua pô hưn êlâo Y-Yêrêmi amâo êdu ai ôh tuôm hŏng klei lông dlăng hlăm bruă ñu. Hnuh leh anăn giê čăm amâo bi kgăn ôh ñu ăt hiu hưn Klei Aê Diê Blŭ. Dlăng jih hdruôm hră Y-Yêrêmi, drei srăng ƀuh êdei kơnăn arăng arưp aram bi mdjiê ñu. Mčeh luar kơ ñu leh anăn mă krư̆ hlăm war, dlăm hlăm ƀăng êlam leh anăn lu mta klei lông dlăng mkăn hlăm bruă mă, ƀiădah ñu dưi găn jih leh anăn dôk sĭt suôr tơl knhal tuč.
Hruê anei, hiu hưn Klei Mrâo Mrang Jăk klei bi mtlaih mơ̆ng Khua Yang ăt khăng tuôm hŏng lu klei bi kdơ̆ng msĕ mơh, kyuadah yang jhat duah nanao hdră êlan čiăng bi kgăn. Năng ai ñu yua phung ƀĭng găp, phung hlăm sang hngah leh anăn bi êmut kơ drei. Tơl lu blư̆ wăt ngă jhat čăm biêng krư̆ kdăl mơh. Anăn yơh jing klei lông dlăng kơ phung mă bruă kơ Khua Yang ăt srăng tlă anăp nanao. Khua Yang Yêsu hưn êlâo leh snei: “Jih jang mnuih srăng bi êmut kơ diih kyua anăn Kâo. Ƀiădah hlei pô gĭr tơl knhal tuč srăng tlaih.” (Y-Markôs 13:13). Akâo kơ Khua Yang brei drei knang nanao kơ klei pap Khua Yang čiăng dưi dôk kjăp leh anăn gĭr mă bruă hŏng jih ai tiê, wăt tơdah tlă anăp hŏng ya mta klei lông dlăng dưn mơh.
Si ngă drei gĭr mă bruă kơ Khua Yang tơl knhal tuč mơ̆?
Wah lač: Ơ Khua Yang, wăt tơdah mâo lu mnuih bi êmut kơ kâo kyua Anăn Khua Yang dưn, brei thiăm kơ kâo ai tiê jhŏng leh anăn klei gĭr, čiăng đăm kâo êdu ai, ƀiădah knang kơ klei pap Khua Yang dưi găn gao jih klei lông dlăng leh anăn ăt dôk kjăp mă bruă kơ Khua Yang tơl knhal tuč. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Phung Khua Phat Kđi 15
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
